ދިވެހިންނަކީ އިންޑިޔާއިން ދިނީމާ ކައިގެން އުޅޭ ބައެއްނޫން: މުސްޠަފާ

އިންޑިޔާގެ ބޮޑުވަޒީރު ނަރެންދްރަ މޯދީއާއި ދެކޮޅަށް ބަސް ބުނުމަށް ދިވެހިން ލަދުގަންނަން ނުޖެހޭނެ ކަމަށާއި ދިވެހިންނަކީ އިންޑިޔާއިން ދިނީމައި ކައިގެން ބޮއެގެން އުޅޭ ބައެއް ނޫން ކަމުގައި ރައްޔިތުންގެ މަޖިލީހުގެ ތިމަރަފުށީ ދާއިރާގެ ކުރީގެ މެންބަރު މުހައްމަދު މުސްޠަފާ ވިދާޅުވެއްޖެއެވެ.

އިންޑިއާގެ ބޮޑުވަޒީރު ނަރެންދުރަ މޯދީ އިންޑިއާގެ ޓެރިޓަރީއެއްކަމުގައިވާ ލަކްޝައްދީބުގެ ރަށަކަށް ޗުއްޓީއެއް ހޭދަކުރައްވަން ވަޑައިގެންފައި އެރަށުގެ ދޮންވެލީގެ އަތިރިމަތީގައި ނަގާފައިވާ ފޮޓޯތަކެއް ހިއްސާ ކުރެއްވުމާއެކު އެއީ ރާއްޖޭގެ ފަތުރުވެރިކަމާ ދެކޮޅަށް ކުރައްވާ ކެމްޕެއިނެއްގެ ގޮތުގައި ސިފަކޮށް ބައެއް ދިވެހިންނާއި ބައެއް މީޑިޔާ ތަކުން އަންނަނީ ނުރަނގަޅު ޚިޔާލުތަކެއްގެ ފަތުރަމުންނެވެ.

އަދި ގިނަ ދިވެހިންނެއް އަންނަނީ މިކަމާ ގުޅިގެން އިންޑިޔާ އަށާއި އިންޑިޔާގެ ބޮޑުވަޒީރު ނަރެންދްރަ މޯދީއަށް ވަރަށް ބޮޑަށް ފާޑު ކިޔަމުންނެވެ. އަދި މި ފަދައިން ފާޑުކިޔާ ފަރާތްތަކުގެ ފާޑުކިޔުން ކުށްވެރިކޮޒް އެކަމާއި ދެކޮޅަށް އިދިކޮޅު ފަރާތްތަކުން އަންނަނީ ޝުޢޫރު ފާޅުކުރަމުންނެވެ.

މި ދަނޑިވަޅުގައި މުސްތަފާ ކުރެއްްވި ޓުވީޓެއްގައި ވަނީ، އިންޑިޔާގެ ބޮޑުވަޒީރަށް ނިސްބަތްކޮށް އެއްޗިހި ކިޔުމަކުން ދިވެހިން ލަދުގަންނަން ނުޖެހޭނެ ކަމަށެވެ.

" ދިވެހިންނަކީ އެވެރިން ދިނީމައި ކައިގެން ބޮއެގެން އުޅޭ ބައެއް ނޫން " މުސްޠަފާގެ ޓުވީޓުގައި ބުނެފައިވެއެވެ.

މީގެ އިތުރުން މުސްތަފާގެ ޓުވީޓުގައި ވިދާޅުވީ، ރާއްޖޭގެ ބައެއް ސިޔާސީ ލީޑަރުން އިންޑިޔާގެ ބޮޑުވަޒީރުގެ ދަށުވެފައި ތިބި ކަމަކު ހުރިހާ ދިވެހިން ތިބީ އެގޮތުގައި ނޫންކަމަށެވެ.

މީސް މީޑިއާގައި ދައުރުވި މި ފޮޓޯތަކަށް ދެގައުމުގެ އެކްޓިވިސްޓުންތަކެއް ކޮމެންޓްކުރަމުންގޮސް ރާއްޖޭގައި ސަރުކާރުގައި ސިޔާސީ މަގާމްތަކެއް ފުރުއްވާ ސްޓޭޓް މިނިސްޓަރުން ތަކެއް އިންޑިއާގެ ބޮޑުވަޒީރަށް ނިސްބަތްކޮށް ކުރި ނެގެޓިވްކޮމެންޓްތަކަކާ ގުޅިގެން އެމީހުންގެ މަގާމްތަކުން ވަގުތީގޮތުން އިއްޔެ ވަނީ ސަސްޕެންޑްކޮށްފައެވެ.