ޓޫރިސްޓުން ރާއްޖެ އަންނައިރު، ވަކި ވަރަކަށް ދުންފަތުގެ ބާވަތްތައް ގެނެވިދާނެ

ރާއްޖެއަށް ޒިޔާރަތްކުރާ ޓޫރިސްޓުން، އެމީހުން ރާއްޖެ އަންނައިރު، ވަކި އަދަދަކަށް ދުންފަތުގެ ބާވަތްތައް ގެނެވޭގޮތަށް ހަމަޖައްސައިފިއެވެ.

ޑިއުޓީ ނެގުމުގެ އުސޫލަށް ގެނައި އިސްލާހާ ގުޅޭގޮތުން ކަސްޓަމްސް ބުނީ، ޓޫރިސްޓް ވިސާގައި ރާއްޖެ އަންނަ މީހުނަށް އަމިއްލަ ބޭނުމަށް 200 ސިނގިރޭޓް ނުވަތަ 25 ސުއްޓާ ޑިއުޓީ ދެއްކުމެއްނެތި ގެނެވޭނޭ ކަމަށެވެ. އިސްލާހުގައިވާގޮތުން ރާއްޖެ އަންނަ ކޮންމެ ޓޫރިސްޓަކަށްވެސް 250 ގްރާމް ޑިއުޓީ ނުނަގައި އެތެރެކުރެވޭނެއެވެ.

މީގެ ކުރިންވެސް ޓޫރިސްޓުންނަށް ވަކިވަރަކަށް ހަމަޖެހިފައިވާ އުސޫލުގެ ތެރެއިން ދުންފަތުގެ ބާވަތްތައް ގެނެވެއެވެ. ނަމަވެސް ސަރުކާރުން ވަނީ މިފަހުން ދުންފަތުގެ ބާވަތްތައް އެތެރެކުރުމުގެ އުސޫލަށް ބޮޑެތި ބަދަލުތަކެއް ގެނެސްފައެވެ.

ސަރުކާރުން ވަނީމިފަހުން ދުންފަތުގެ ބާވަތްތަކުން ނަގާ ޑިއުޓީ 50 އިންސައްތަ ބޮޑުކޮށްފައެވެ. ދުންފަތުގެ ބާވަތްތަކުން ނަގާ ޑިއުޓީއަށް ގެނައި ބަދަލާއި ގުޅިގެން މިއަހަރުގެ ތެރޭގައި 180 މިލިއަން ލިބޭނޭކަމަށް ސަރުކާރުން ވަނީ ލަފާކޮށްފައެވެ. މީގެ އިތުރުން ދުންފަތުގެ ބާވަތްތަކުން ނަގާ ޑިއުޓީއާއެކު، އަންނަ އަހަރުގެ ތެރޭގައި ލިބޭ އާމްދަނީ 1.05 ބިލިއަން ރުފިޔާއަށް އަރާނޭކަމަށްވެސް ސަރުކާރުން ވަނީ ލަފާކޮށްފައެވެ.