މަގުމަތީން ފޮށޭތާ ތިން މަސް; މައްސަލަ ފުލުހަށް, ތަހުގީގު ފަށައިފި

ފާއިތުވި ތިން މަސްދުވަހުގެ ތެރޭގައި އެކި ފަހަރު މަތިން، އެ މީހާ ފޮށުނު ކަަމަށް އެކަން ތަހަންމަލު ކުރަން ޖެހުނު އަންހެން މީހާ ކިޔައިދިނެވެ. ހާއްސަކޮށް ބްރިޖަށް ހިންގަން ދާ ވަގުތު އެވެ. އޭނާގެ ހުރިހާ ކަމަކަށް އެ މީހާ ފާލަމުން ދިޔަ އެވެ.

ހިނގަންދާ ވަގުތު އެނގެ އެވެ. ނިންމާލާފައި އަންނާނެ ވަގުތު އެނގެ އެވެ. ސައިކަލު ބަހައްޓާތަން އެނގެ އެވެ. އަންހެން މީހާ ބުނާ ގޮތުން އެވަރަށް އެ މީހާ ބަލަ އެވެ.

އެންމެ ފަހުން އެ އަންހެން މީހާ އޭނާއަށް ފޮށޭ ފިރިހެން މީހާއާ ދިމާކޮށްލި އެވެ. އުމުރުން 50 އަހަރަށް އަޅާފައިވާ އެ ފިރިހެން މީހާއާ ދިމާކޮށްލާ ވީޑިއޯ ކުރި އެވެ. ތަކުރާރުކޮށް ފޮށޭތީ އެކަން ފުލުހަށް ހުށައަޅާނެ ކަމަށް ބުންޏެވެ. އެހެން ބުނުމުން އެ މީހާ މާފަށް އެދެ އެވެ.

އަންހެން މީހާ ވަނީ އެ ވީޑިއޯ އާންމުކޮށްފަ އެވެ. އެ ވީޑިއޯގައި އެ އަންހެން މީހާ ފުލުހަށް މައްސަލަ ހުށައަޅަން ގޮސް އިންނަ މަންޒަރު ވެސް ފެނެ އެވެ.

އެކަމާއި ގުޅޭގޮތުން ސުވާލުކުރުމުން ފުލުހުން ބުނީ ފާއިތުވި ތިން މަސްދުވަހުގެ ތެރޭގައި މީހަކަށް ފުރައްސާރަކުރި ކަމަށް ތުހުމަތުކުރެވޭ މައްސަލައެއް އޮކްޓޫބަރު 7 ވަނަ ދުވަހުގެ ހެނދުނު 06:00 އެހައިކަންހާއިރު ފުލުހުންނަށް ރިޕޯޓްކޮށްފައިވާ ކަމަށެވެ.

މައްސަލައިގެ އިތުރު ތަފްސީލެއް ނުދެ އެވެ. ފުލުހުން ބުނީ މި މައްސަލަ ގެންދަނީ ތަހުގީގު ކުރަމުން ކަމަށެވެ.