މި ފަސް އަހަރު ތެރޭ މާލެއާއި އެއް ފެންވަރަށް އައްޑޫ ސިޓީ ތަރައްގީ ކޮަށްދޭނަން: ރައީސް މުޢިއްޒު
ލިޔުންތެރިޔާ
ޚަދީޖާ އަރުފާ
އެމަނިކުފާނުގެ ވެރިކަމުގެ ފަސް އަހަރުގެ ތެރޭގައި ރާއްޖޭގެ ވެރިކަންކުރާ މާލެ ސިޓީއާއި އެއް ފެންވަރަށް އައްޑޫ ސިޓީ ތަރައްގީ ކޮށްދެއްވާނެ ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.
މާލޭގައި ދިރިއުޅޭ އައްޑޫ ސިޓީގެ ރައްޔިތުންނަށް ޚާއްސަކޮށްގެން މިރޭ ބޭއްވި މަޖިލިސް ކެންޕެއިން ޖަލްސާގައި ވާހަކަ ދައްކަވަމުން ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު ވިދާޅުވީ، އައްޑޫ ސިޓީއަށް ވާދަކުރައްވާ ކެނޑިޑޭޓުންވެސް އަދި އެ ސިޓީގެ ރައްޔިތުންވެސް “އައްޑޫ ބަދަލަކަށް” ޝިޢާރު ބޭނުން ކުރައްވަނީ، މީގެ ކުރިން އައްޑޫ ސިޓީއަށް ކެންޑިޑޭޓުން ދެއްކި ހުވަފެންތައް ހަގީގަތަކަށް ނުވެ އެތަކެއް ޒަމާންތަކެއް ވެެގެން ގޮސްފައިވާތީ ކަމަށެވެ.
އަދި މިހާރު އައްޑޫ ސިޓީގެ ރައްޔިތުން ބޭނުންވަނީ ބަދަލެއް ގެނެސްގެން އެ ސިޓީއަށް ތަރައްގީ ގެންނަން ކަމަށާ، ޕީއެންސީގެ ފަރާތުން މަޖިލީހަށް ވާދަކުރައްވާ ކެންޑިޑޭޓުން މަޖިލީހަށް އިންތިޚާބު ކުރައްވައިފި ނަމަ ނަތީޖާ ނެރެދެއްވާނެ ކަމަށް ރައީސް ވިދާޅުވިއެވެ.
ބަދަލު ގެންނަންވީ ހެޔޮ ބަދަލެއް. މިއީ ހެޔޮ ބަދަލެއް. އަޅުގަނޑުމެންގެ ފަރާތުން 8 ދާއިރާއަށް ކުރިމަތިލައްވާފައި ތިބީ ތެދުވެރިކަމާއެކީގައި އަޅުގަނޑު ބޭނުންވާ ގޮަތަށް ނަތީޖާ ނެރެދޭނެ އިހްލާސްތެރި ބޭފުލުން. އެހެންވީމާ އެ ބޭފުޅުން ހޮއްވަވައި ދެއްވަންވީ މިފަހަރު. ދެވަނަ ވިސްނުމަކަށް ދާންވެސް ހައްދަވާނެ ކަމެއް ނެތް
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
ރައީސް ވިދާޅުވީ، އެމަނިކުފާނަށް މުހިންމީ ނަތީޖާ ނެރެދިނުން ކަމަށެވެ. އަދި ރިޔާސީ އިންތިޚާބުގެ ކެންޕެއިން ތެރޭގައިވެސް އެމަނިކުފާނު އެފަދައިން ވިދާޅުވެފައިވާނެކަމަށާ މި ސަރުކާރުގެ އެއްވެސް ބޭފުޅެއް ނަތީޖާ ނެރެދިނުމަށް ނޫން ގޮތަކަށް އެންމެ ވަގުތެއްވެސް ހޭދަ ނުކުރައްވާނެ ކަމަށް އެމަނިކުފާނު ވިދާޅުވިއެވެ.
މިއާއެކު ތަކުރާރުކޮށް ރައީސުލްޖުމްހޫރިއްޔާ ވިދާޅުވީ އެމަނިކުފާނުގެ ފޯކަސް ހުރީ ނަތީޖާ ނެރުމަށް ކަމަށާއި، އެ ނަތީޖާ ނެރެދިނުމަށް ސަރުކާރާއެކު މަސައްކަތް ކުރާނެ ބައެއް މަޖިލީހުގައި ތިބެން ޖެހޭކަމަށެވެ. އަދި ނަތީޖާ ނޫން އެއްޗެއް އެމަނިކުފާނަށް މުހިންމު ނޫންކަން ފާހަގަކުރައްވާ ރައީސް ޑރ. މުޙައްމަދު މުޢިއްޒު ވިދާޅުވީ، އަމިއްލަ ޕާޓީގެ މަސްލަހަތު އެކަނި އިސްކުރާ ބަޔަކު މަޖިލީހަށް ހޮވައިގެން އެކަން ނުވާނެ ކަމަށާ އެހެން ކަމުން އެފަދަ ބަޔަކު މަޖިލީހަށް ހޮވިޔަ ދީގެންވެސް ނުވާނެކަމަށެވެ.
މީގެ އިތުރުން ރައީސް ވިދާޅުވީ މި ސަރުކާރަށް މިވީ ފަސް މަސް ދުވަހުގެ ތެރޭގައިވެސް އައްޑޫ ސިޓީގެ ތަރައްގީއަށް މުހިންމު ކަންކަން ފެށިފައިވާ ކަމަށެވެ. އެކަން ކަން ކުރެވުނީ ވަރަށް ދަތި އުނދަގޫ ކަމާއެކު ކަމަށާ، އެކަމަށްޓަކައި މަޖިީހުގެ އެއްބާރުލުން ނުލިބުނު ކަމަށް އެމަނިކުފާނު ވިދާޅުވިއެވެ. އެހެން ނަމަވެސް، ދަތިތަކާއެކުވެސް ރާއްޖޭގައި މިހާތަނަށް ހިންގާ އެންމެ ބޮޑު ޢުމްރާނީ ތަރައްޤީގެ އެއް މަޝްރޫޢު ކަމަށްވާ އައްޑޫ ބްރިޖުގެ ޑިޒައިން މަސައްކަތް ފެށި މިހާރު ކުރިއަށްދާކަން ރައީސް ފާހަގަކުރެއްވިއެވެ.
މިއާއެކު ރައީސް ވިދާޅުވީ، ސަރުކާރުން ކުރިއަށްގެންދާ ތަރައްގީގެ ޕްރޮޖެކްޓްތައް ހުއްޓުވުމުގެ ވިސްނުން ގެންގުޅުއްވާ ފަރާތްތައް މަޖިލީހަށް ހޮވައިގެން ވާނީ ވަގުތު ބޭކާރު ކަމަށެވެ. އެހެންކަމުން ރައްޔިތުންނަށް ކަމެއްކޮށްދިނުމުގެ ނިޔަތުގައި މަސައްކަތް ކުރަމުންދާ ސަރުކާރަކަށް މަޖިލީހުން ފުރުޞަތު ދޭން ޖެހޭ ކަމަށް ރައީސުލްޖުމުހޫރިއްޔާ ވިދާޅުވިއެވެ
ވަގުތު ބޭކާރު ކޮށްލަން ހަގީގަތުގައިވެސް ނަހައްދަވާ. ވަރަށް އިޚްލާސްތެރިކަމާއެކު ނަތީޖާ ނެރެން ބޭނުންވާތީ ދަންނަވާ ވާހަކައެއް މި ދަންނަވަނީ. އަޅުގަނޑު ބޭނުން މާލެއާ އެއް ފެންވަރަށް އައްޑޫ ސިޓީ ތަރައްގީ ކުރަން. އިރާދަކުރެއްވިއްޔާ ކޮށްދޭނަން މި ފަސް އަހަރުގެ ތެރޭގައި. އަޅުގަނޑުމެންގެ 8 ކެންޑިޑޭޓުން ހޮއްވަވައި ދެއްވާ. އޭރުން ހަމަ ޔަގީނުންވެސް އެކަން ފަސޭހަ ކަމާއެކު ކޮށްދޭނަން މި ފަސް އަހަރު ތެރޭގައި
ރައީސުލްޖުމްހޫރިއްޔާ ޑރ މުހައްމަދު މުޢިއްޒު
.މިއާއެކު ރައީސް ވަނީ އައްޑޫގެ ތަރައްގީއަށް މި ސަރުކާރުން ފަށާފއއުވާ އެހެން ތަރައްގީގެ މަޝްރޫއު ތަކަށްވެސް އަލި އަޅުވާ ލައްވާފައެވެ. އެގޮތުން އައްޑޫގެ ފެނާއި ކަރަންޓު އަޕްގްރޭޑް ކުރުމުގެ މަސައްކަތާ، ހަންކެޑެ މަޝްރޫއު އެމަނިކުފާނު ފާހަގަކުރެއްވިއެވެ. އަދި ޝަންގްރިލާ މައްސަލަވެސް ހައްލު ކޮށްދެއްވާނެ ކަމަށް ވިދާޅުވިއެވެ.
އެހެންކަމުން، އެހުރިހާ ކަމަކާއި، އެމަނިކުފާނު ވެވަޑައިގެންނެވި ހުރިހާ ވައުދެއް ފުއްދުމަށް އެއްބާރުލުން ދެއްވާނެ މެންބަރުން މަޖިލީހަށް ހޮވުމަށް ތަކުރާރުކޮށް ރައީސް މުޢިއްޒު ވަނީ އިލްތިމާސް ކުރައްވާފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
