ބައްސާމް ކުށްވެރިވެ ހަތަރު އަހަރަށް ޖަލަށް ލާން ހުކުމްކޮށްފި

އެފްއޭއެމްގެ ކުރީގެ ރައީސް ބައްސާމް އަދީލް ޖަލީލް ހަތަރު އަހަރަށް ޖަލަށްލާން ހުކުމްކޮށްފި އެވެ.

ބައްސާމްގެ މައްޗަށް ދެ ދައުވާއެއް އުފުލާފައި އޮތެވެ. އެއީ ފުޓްބޯލް އެސޯސިއޭޝަން އޮފް މޯލްޑިވްސްއަށް އެކި ފަރާތްތަކުން ދޭ ފައިސާއަށް އެ އެސޯސިއޭޝަންގެ އިސްވެރިން ހިޔާނާތްތެރިވެ، އިތުރު ކުށުގެ އަމަލުތައް ހިންގާކަމަށް ތުހުމަތުކުރެވޭ މައްސަލައިގައި އުފުލި ޖިނާއީ ދެ ދައުވާއެކެވެ.

އެއީ ޚިޔާނާތްތެރިވުމުގެ ދައުވާ އާއި މަނީ ލޯންޑަރިން ދައުވާ އެވެ.

މިއަދު ހުކުމް އިއްވީ ޚިޔާނާތްތެރިވުމުގެ ދައުވާ އެވެ. މި ދައުވާގެ އަސާސީ އަދަބަކީ 1 އަހަރާއި 7 މަހާއި 6 ދުވަހުގެ މުއްދަތަކަށް ޖަލަށްލުމެވެ. ނަމަވެސް ދައުލަތުން ވަނީ އެންމެ ބޮޑު އަދަބެއް ކަނޑައަޅައި ދިނުމަށް އެދިފަ އެވެ.

އެހެން ކަމުން ގާޒީ ނިންމެވީ ޚިޔާނާތްތެރިވުމުގެ ކުށުން ބައްސާމް ކުށްވެރިވާ ކަމަށެވެ. އަދި ހަތަރު އަހަރަށް ޖަލަށް ލުމަށެވެ. މަނީ ލޯންޑަރިން ދައުވާއާ ގުޅިގެން ހުކުމް ކުރުން އަދި އޮންނާނެ އެވެ.

އެ ދައުވާ ސާބިތުވެއްޖެނަމަ އަންނަ އަސާސީ އަދަބަކީ 100,000 ރުފިޔާއާއި 1,000,000 ރުފިޔާއާއި ދެމެދުގެ އަދަދަކުން ޖޫރިމަނާ ކުރުމާއެކު 5 އަހަރާއި 15 އަހަރާއި ދެމެދުގެ މުއްދަތަކަށް ޖަލަށް ލުން ނުވަތަ 5 އަހަރާއި 15 އަހަރާއި ދެމެދުގެ މުއްދަތަކަށް ޖަލަށް ލުމެވެ.

ބައްސާމްގެ މައްޗަށް ދައުވާ އުފުލީ އެފްއޭއެމްގެ ކަންކަމަށް ބޭނުންކުރުމަށްޓަކައި، ފީފާ އިން ދިން 10,000 ޑޮލަރަށް ޚިޔާނާތްތެރިވެ އަމިއްލަ ބޭނުންތަކަށް ނެގި ކަމުގެ ތުހުމަތުގަ އެވެ.