މިދިޔަ މަހު ގެއްލުނު 109 ސައިކަލް ފުލުހުން ހޯދައިދިފި

މިދިޔަ މަހު ފުލުހުންނަށް ރިޕޯޓުކޮށްފައިވާ ވައްކަމުގެ މައްސަލަތަކުގެތެރެއިން ގެއްލިގެން ރިޕޯޓުކުރި 109 ސައިކަލު އަނބުރާ ހޯދާފައިވާ ކަމަށް ފުލުހުން މަޢުލޫމާތު ދީފިއެވެ. މި ސައިކަލުތަކުގެ ޖުމްލަ އަގު 6.8 މިލިއަން ރުފިޔާއަށް އަރާ ކަމަށް ފުލުހުންގެ ތަފާސްހިސާބުތަކުން ދައްކައެވެ.

ދިވެހި ފުލުހުންގެ ޚިދުމަތުން އާންމުކޮށްފައިވާ ތަފާސްހިސާބުތަކުން ދައްކާ ގޮތުގައި، މިދިޔަ ސެޕްޓެންބަރު މަހު ގެއްލިގެން ރިޕޯޓުކުރި ތަކެތީގެ ތެރެއިން ޖުމްލަ 189 އެއްޗެއް ފުލުހުން ވަނީ ހޯދާފައެވެ. މީގެ ތެރޭގައި 13 މޯބައިލް ފޯނާއި، ފައިސާގެ 20 މައްސަލައާއި، 8 އިލެކްޓްރޯނިކް ތަކެއްޗާއި، 39 އެހެނިހެން ތަކެތި ހިމެނެއެވެ.

ހޯދުނު ތަކެތީގެ ތެރެއިން އެންމެ މަތީ އަގެއްގެ ގޮތުގައި ހިމެނެނީ ސައިކަލުތަކެވެ. އެގޮތުން ހޯދުނު 109 ސައިކަލުގެ އަގު 6،878،766 ރުފިޔާއަށް އަރާއިރު، 13 މޯބައިލް ފޯނުގެ އަގު 154،562 ރުފިޔާއަށް އަރައެވެ. މީގެ އިތުރުން ހޯދުނު ފައިސާގެ އަދަދު 588،822.76 ރުފިޔާއަށް އަރާއިރު، އިލެކްޓްރޯނިކްސް ތަކެތީގެ އަގު 32،300 ރުފިޔާއަށް އަރައެވެ.

މިދިޔަ މަހު މާލޭގެ މަގުމަތީގެ ސަލާމަތާއި ރައްކާތެރިކަން ކަށަވަރުކުރުމަށް ފުލުހުން ވަނީ ފުޅާ ދާއިރާއެއްގައި މަސައްކަތްތަކެއް ކޮށްފައެވެ. އެގޮތުން މާލެ ސަރަހައްދުގެ 27،464 ސަރަހައްދެއް ބަލައި ފާސްކޮށްފައިވާއިރު، 1،029 ގަޑިއިރާއި 55 މިނެޓު ވަންދެން މާލެ ތެރޭގައި ޕެޓްރޯލްކޮށްފައިވެއެވެ.

ފުލުހުންގެ މަސައްކަތްތަކުގެ ތެރެއިން 5،264 މީހަކު ހުއްޓުވައި ސުވާލުކޮށްފައިވެއެވެ. މީގެ ތެރޭގައި ކުށުގެ ރެކޯޑު އޮތް 4،776 މީހުންނާއި ރެކޯޑު ނެތް 488 މީހުން ހިމެނެއެވެ. އަދި ބިދޭސީންނާ ގުޅޭގޮތުން ކުރިއަށް ގެންދިޔަ އޮޕަރޭޝަންތަކުގައި އެއް ބިދޭސީއަކު ވަނީ އިމިގްރޭޝަނާ ހަވާލުކޮށްފައެވެ.