ދައުލަތުގެ ޚަރަދުގައި އައިވީއެފް ހެދުމަށް އެދި ހުށަހެޅުމަށް ފުރުސަތު ހުޅުވާލައިފި

އައިވީއެފް އަދި އައިޔޫއައި ގެ ފަރުވާގެ ޚަރަދު ކުރުމަށް ދަތިވާ ފަރާތްތަކުން ދައުލަތުގެ އެހީ އަށް އެދި ހުށަހެޅުމުގެ ފުރުސަތު ހުޅުވާލައިފިއެވެ.

ނޭޝަނަލް ސޯޝަލް ޕްރޮޓެކްޝަން އޭޖެންސީ (އެންސްޕާ) އިން ބުނީ ސަރުކާރުގެ ފުރަތަމަ 14 ހަފްތާގެ ތެރޭގައި ހާސިލް ކުރެއްވުމަށް ކަނޑައަޅުއްވާފައިވާ ވައުދުތަކުގެ ތެރޭގައި ހިމެނޭ އައިޔޫއައި އަދި އައިވީއެފް ގެ ފަރުވާތައް އާސަންދަ ސްކީމް މެދުވެރިކޮށް ފޯރުކޮށްދިނުމަށްޓަކައި، ދައުލަތުގެ އެހީއަށް އެދޭ ފަރާތްތަކަށް އިއްޔެއިން ފެށިގެން މޭ މަގުގެ 15 ވަނަދުވަހާއި އެކަމަށް އެދި ހުށައެޅުމުގެ ފުރުސަތު ހުޅުވާލާފައިވާކަމަށެވެ.

އެންސްޕާއިން ބުނީ "އައި.ވީ.އެފް"ގެ ފަރުވާއަށް އެހީ ހަމަޖައްސާދިނުމަށް ހަމަޖެހިފައިވަނީ، އެންމެ މަތިން ޕޮއިންޓް ލިބޭ 100 ދެމަފިރިންނަށްކަމަށާއި މިހިދުމަތް ފޯރުކޮށްދޭނީ އާސަންދަ ސްކީމް މެދުވެރިކޮށް "އައި.ވީ.އެފް"ގެ ފަރުވާ ރާއްޖޭގައި މި ޚިދުމަތް ފޯރުކޮށްދޭ މަރުކަޒުތަކުންނާއި، ރާއްޖެއިން ބޭރުން މި ހިދުމަތް ދޭ މަރުކަޒުތަކުގެ ތެރެއިން އެމްޕެނަލްކުރެވޭ މަރުކަޒުތައް މެދުވެރިކޮށްކަމަށެވެ.

އެންސްޕާއިން ބުނީ "އައި.ވީ.އެފް"ގެ ފަރުވާއަށް އެދޭ ފޯމު އެ އެޖެންސީ އާއި އާސަންދައިގެ ކައުންޓަރުގެ އިތުރުން، އެ ދެ އިދާރާގެ ވެބްސައިޓުން ވެސް ލިބެން ހުންނާނެ ކަމަށެވެ.  ފޯމު ފުރިހަމަކުރުމަށްފަހު ހުށަހަޅާނީ، އިންދިރާ ގާންދީ މެމޯރިއަލް ހޮސްޕިޓަލް، ހުޅުމާލެ ހޮސްޕިޓަލް އަދި މޫކައި ސުއިޓްސް 4 ވަނަ ފަންގިފިލާގައި ޤާއިމްކުރެވިފައިވާ އެ އެޖެންސީގެ ކައުންޓަރުތަކަށް ކަމަށާއި އީމެއިލް މެދުވެރިކޮށްނަމަ، އެންސްޕާގެ މެއިލް އަށް، ނުވަތަ ވައިބަރ މެދުވެރިކޮށްނަމަ 7291402 އަށް ވެސް ފޯމު ހުށައެޅޭ ކަމަށް އެ އެޖެންސީ އިން ބުނެއެވެ.

އެޖެންސީއަށް ފޯމު ލިބޭތާ ރަސްމީ 5 ދުވަހުގެ ތެރޭގައި ހުށަހަޅާފައިވާ ފޯމު ފުރިހަމަކަން، ނުވަތަ އިތުރު މަޢުލޫމާތާއި ލިޔެކިޔުން ބޭނުންވާނަމަ އެކަން، އެސް.އެމް.އެސް ނުވަތަ އީމެއިލްގެ ޒަރީއާއިން ފޯމު ހުށަހެޅި ފަރާތަށް އަންގާނެ ކަމަށާއި، ފޯމު ފުރިހަމަކުރުމަށްފަހު، އެޖެންސީއަށް ފޯމު ބަލައިގަންނަތާ ރަސްމީ 15 ދުވަހުގެ ތެރޭގައި، ޝަރުޠުތައް ފުރިހަމަވާކަން ނުވަތަ ނޫންކަން، ފޯމު ހުށަހެޅި ފަރާތަށް އަންގާނެ ކަމަށް ވެސް އެންސްޕާއިން ބުނެއެވެ.

އެންސްޕާއިން ބުނީ ފޯމު ހުށަހެޅުމަށް ހުޅުވާލެވޭ މުއްދަތު ހަމަވާ ތާރީޚު ކަމަށްވާ 15 މެއި 2024 އިން ފެށިގެން ރަސްމީ 30  ދުވަހުގެ ތެރޭގައި، "އައި.ވީ.އެފް" ގެ އެހީ ފޯރުކޮށްދިނުމަށް މި އަހަރަށް ހަމަޖެހުނު ފަރާތްތަކަށް މިކަން އެސް.އެމް.އެސް ނުވަތަ އީމެއިލްގެ ޒަރީއާއިން އަންގައި، އެފަރާތްތަކުގެ ޒާތީ މަޢުލޫމާތު ހާމަނުވާނެފަދަ ގޮތަކަށް، މި ލިސްޓު އާއްމުކޮށް ޝާއިޢު ކުރެވޭނެ ކަމަށެވެ.

މިއަހަރު އެހީ ހަމަނުޖެހޭ ފަރާތްތަކަށް، ފޯމު ހުށަހެޅުމަށް 2025 ވަނަ އަހަރު ހުޅުވާލުމުން އެހީއަށް އެދުމުގެ ފުރުސަތު އަލުން އޮންނާނެ ކަމަށް ވެސް އެންސްޕާއިން ވަނީ ބުނެފައެވެ.