ސައްހަނޫން ނަަންބަރ ހަރުކޮށްގެން، ބާރު ސްޕީޑްގައި ދުއްވި ކާރު ޓޯވ ކުރިޔަނުދީ، ފުލުހުންނަށް ފިލަންއުޅެފި!

ހުޅުމާލޭގައި ސައްހަނޫން ނަންބަރު ޕްލޭޓެއް ހަރުކޮށްގެން، ދުއްވި ކާރެއް، ޓޯވ ކުރުމަށް މަސައްކަތް ކުރުމުން، ފުލުހުންނަށް ފިލަން އުޅުނު މީހަކު ހައްޔަރު ކޮށްފިއެވެ.

ފުލުހުން ބުނީ، ރޭ ދަންވަރު ހުޅުމާލޭގައި ފުލުހުން ވީސީޕީގައި ހަރަކާތްތެރިވަމުން ދަނިކޮށް، ބާރު ސްޕީޑުގައި ދުއްވަމުންދިޔަ ކާރެއް ހުއްޓުވައި ބެލިއިރު، އެއީ ސީ ޒޯނަށް ރަޖިސްޓްރީ ކޮށްފައިވާ ކާރެއްކަން އެނގުނު ކަމަށެވެ.

އަދި ކާރު ދުއްވި ފަރާތަކީ ރ. އަލިފުށި / ސިތުރާ، ހަސަން ސަޢީދު (38 އަހަރު) ކަމާއި، އޭނާއަކީ ކާރު ދުއްވުމުގެ ލައިސަންސް ނެތް މީހެއްކަންވެސް އެނގުނު ކަމަށް ފުލުހުން މައުލޫމާތު ދެއެވެ.

ފުލުހުން އިތުރަށް ބުނީ، ލައިސަންސް ނެތި ކާރު ދުއްވުމާއި އަދި ސައްހަ ނޫން ނަންބަރު ޕްލޭޓް ކާރުގައި ހަރުކޮށްފައިވާތީ، ފުލުހުން އެ ކާރު ޓޯވ ކުރަން އުޅުމުން، ފުލުހުންނަށް އެއްބާރުލުން ނުދޭނެ ކަމަށާއި ކާރުން ނުފައިބާނެ ކަމަށް ބުނެ ކާރު ލޮކްކޮށް ފުލުހުންގެ ދައުރު އަދާކުރުމަށް ހުރަސް އަޅައި ހަސަން ސަޢީދު ފިލަން މަސައްކަތް ކުރި ކަމަށެވެ.

ނަމަވެސް ބާރުގެ ބޭނުން ކޮށްގެން އޭނާ ހައްޔަރުކޮށްފައިވާ ކަމަށްވެސް ބުންޏެވެ.

މި މައްސަލަ ފުލުހުން ގެންދަނީ ތަޙުޤީޤު ކުރަމުންނެވެ.