ގްރިޑް ސިސްޓަމްއާއި ބެޓަރީ އެނަރޖީ ސްޓޯރޭޖް ސިސްޓަމް ހަރުކުރުމުގެ މަސައްކަތްތައް މިދަނީ ކުރަމުން: ވަޒީރު ޠާރިގު

ރަށްރަށުގައި ސޯލާ ހަރުކުރުމުގެ މަސައްކަތްތަކުގެ ތެރެއިން ގްރިޑް ސިސްޓަމްތަކާއި ބެޓަރީ ސިސްޓަމް ހަރުކުރުމުގެ މަސައްކަތްތައް ކުރަމުން އަންނަކަމަށް މޫސުމީ ބަދަލުތަކާއި ތިމާވެއްޓާ ހަކަތައާބެހޭ ވަޒީރު ޠާރިގު އިބްރާހީމް ވިދާޅުވެއްޖެއެވެ.

ވަޒީރު ޠާރިގު މިފަދައިން ވިދާޅުވީ، ދައުލަތުގެ މީޑިއާ، ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަަކަފުޅު ދައްކަވަމުންނެވެ.

މިހާރު ކުރިއަށްގެންދާ އިޔާދަކުރަނިވި ހަކަތައިގެ މަޝްރޫޢުތަކުގެ ތެރެއިން ގްރިޑް ސިސްޓަމްއާއި ބެޓަރީ އެނަރޖީ ސްޓޯރޭޖް ސިސްޓަމް ހަރުކުރުމުގެ މަސައްކަތްތައް ކުރަމުން ދާކަމަށާއި، މިހާރުވެސް 18 ރަށެއްގައި ބެޓެރީ ސިސްޓަމްތައް ހަރުކުރުމުގެ މަސައްކަތް ކުރަމުންއަންނަކަމަށް ވަޒީރު ވިދާޅުވިއެވެ.

ވަޒީރު ޠާރިގު ވިދާޅުވީ، ބެޓެރީ ސިސްޓަމް ލުމުން ސޯލާ ޕެނަލުން އުފައްދާ ހަކަތަ އެވަގުތު ބޭނުން ނުކުރެވުނަސް ބެޓެރީގައި ރައްކާކޮށްގެން ރޭގަނޑު ބޭނުން ކުރެވޭނެކަމަށާއި، މިފަދައިން ކަންކުރާ ރަށްރަށުގައި 8 ގަޑިއިރުވެސް އެއްކޮށް ކަރަންޓް ނިއްވާލެވޭކަމަށެވެ.

"ވަރަށް ގިނަ ރަށްރަށުގައި ގްރިޑްގެ މަސައްކަތްތައްވެސް އެބަ ކުރަން. މިއީ ޕްރައިވެޓް ސެކްޓައިން އިންވެސްޓް ކޮށްގެން ކުރެވޭ މަސައްކަތްތަކެއް ނޫން. އެހެންވީމަ ޕަބްލިކް ސެކްޓަރ އިންވެސްޓްމަންޓްއިން ކުރެވޭ މަސައްކަތްތައް މިއީ. ބެޓަރީ ލީމަ އަޅުގަނޑުމެން ޖަހާ ހުރިހާ ސޯލާ ޕެނަލްއެއްގައި އެ ވަގުތެއްގައި ބޭނުން ނުކުރެވޭނަމަ ބެޓެރީގައި ސްޓޯކުރުމަށްފަހު ރޭގަނޑު ބޭނުން ކުރެވޭނެ. އެކަން ކުރުމުގެ މަސައްކަތް މިދަނީ ކުރަމުން. މިހެން ޖެހިފައި ހުންނަ ރަށްރަށުގައި 8 ގަޑިއިރުވެސް އެއްކޮށް ކަރަންޓް ނިއްވާލެވޭ އެއްކޮށް"

ވަޒީރު ޠާރިގު ވިދާޅުވިއެވެ.

މީގެ އިތުރުންވެސް ވަޒީރު ވިދާޅުވީ، ރަށްރަށުގައި މިހާރު އޮތް ކޭބަލް ނެޓްވޯކް ސިސްޓަމްއަކީ ދުވަސްވެފައިވާ ސިސްޓަމްއެއްކަމަށާއި، ރަށްރަށުގައި ކުރިން އަޅާފައިވާ ކޭބަލް ނެޓްވޯކް ދުވަސްވުމުގެ ސަބަބުން ރަނގަޅު ކުރަން ޖެހިފައިވާކަމަށެވެ.

އިއާދަކުރަނިވި ހަކަތައިގެ މަޝްރޫޢުތައް ކުރިއަށްގެންދާއިރު ރަށްރަށުގެ ނެޓްވޯކްތައް ރަނގަޅުކޮށް ބެޓެރީ ސިސްޓަމްތައްވެސް ހަރުކުރަން ޖެހޭކަން ފާހަގަކުރައްވަމުން ވަޒީރު ވިދާޅުވީ، މިހާރު ކޭބަލް ނެޓްވޯކްތައް ހުރިގޮތުން އެންމެ ގިނަވެގެން ޖެހެނީ އިއާދަކުރަނިވި ހަކަތައިގެ 30 އިންސައްތަ ކަމަށެވެ.