ހދ.އަތޮޅުގައި ޓޫރިޒަމް ފައްކާކުރުމަށް ގޮތްތަކެއް ހޯދައިފިން: ނަތީޖާ ފެންނާނެ: ރައީސް

ހދ.އަތޮޅުގައި ޓޫރިޒަމް ފައްކާކުރާނެ ގޮތްތަކެއް ސަރުކާރުން ހޯއްދަވާފައިވާކަމަށާއި، އޭގެ ނަތީޖާ ފެންނާނޭކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

ހދ.އަތޮޅަށް ކުރައްވަމުން ގެންދަވާ ދަތުރުފުޅުގައި މިއަދު ނައިވާދޫއަށް ވަޑައިގެން އެރަށުގެ ރައްޔިތުންނާ ވާހަކަދައްކަވަމުން ރައީސް ވިދާޅުވީ، ހދ.އަތޮޅުގައި ޓޫރިޒަމް ތަރައްޤީވެފައި ނެތުމުގެ މައްސަލައަށް ސަރުކާރުން ހައްލު ގެންނާނޭކަމަށާއި، އެކަމުގެ މަސައްކަތްތައް ކުރިއަށްދާކަމަށެވެ. އެގޮތުން ސަރުކާރުންދޭ ލުއިތަކާއެކު އެ ސަހަރައްދުގައި ފަތުރުވެރިކަމުގެ ވިޔަފާރިކުރުމަށް ފުރުސަތު ހުޅުވާލުމުން އިންވެސްޓަރުންގެ ޝައުގުވެރިކަން ލިބިފައިވާަކަމަށް ރައީސް ފާހަގަކުރެއްވިއެވެ.

ރައީސް ވިދާޅުވީ ހދ.އަތޮޅުގައި ޓޫރިޒަމް ނެތްކަމުގެ ލޭބަލް ނައްތާލާނެ ކަމަށާއި އެ ސަރަހައްދަކީ ފަތުރުވެރިކަމުގެ މަންޒިލެއްކަމުގައި މި ސަރުކާރުން ހައްދަވާނޭކަމަށެވެ. އެގޮތުން މިހާރުވެސް 10 ވަރަކަށް ސަރަހައްދު ޓޫރިޒަމަށް ހުޅުވާލާފައިވާކަން ރައީސް ފާހަގަކުރެއްވިއެވެ.

އެގޮތުން އެމްޓީޑީސީން ހދ އަތޮޅުގައި ތަރައްޤީ ކުރަމުންގެންދާ ނާގޯށި ވުޖޫދަށް ގެނައުމަށް ފިނޭންސް މިނިސްޓްރީއާ ގުޅިގެން މަސައްކަތްތަކެއް ފަށާފައިވާކަން ރައީސް ވިދާޅުވިއެވެ. ނާގޯށީގެ މަސައްކަތްތައް އަލުން ފެށުމަށް ކުަރަންޖެހޭ މަސައްކަތްތައް ފެށުމަށް ތައްޔާރުވެފައިވާއިރު، ކުރިއަށްއޮތްތަނުގައި ނާގޯށި ތަރައްޤީކުރުމުގެ މަސައްކަތް ބާރު ސްޕީޑްގައި ކުރިއަށްދާނޭކަން ރައީސް ފާހަގަކުރެއްވިއެވެ.

އެމްޓީޑީސީގެ މިދިޔަ އަހަރުގެ އަހަރީ އާއްމު ޖަލްސާގައި އެކުންފުނީގެ މެނޭޖިންގ ޑިރެކްޓަރު އަހުމަދު ނިޔާޒް ވިދާޅުވެފައިވަނީ، އުއްމީދަކީ އަންނަ އަހަރުގެ ފިނި މޫސުމަށް ހދ.ނާގޯށީގެ މަސައްކަތް ނިންމައި އޮޕަރޭޝަނަށް ގެނައުމަށްކަމަށެވެ.

އެމްޓީޑީސީން ނާގޯށި ތަރައްޤީ ކުރަމުން އަންނަތާ 15 އަހަރު ވެފައިވާއިރު، ނާގޯއްޓަކީ ސަރުކާރުން އެމްޓީޑީސީއަށް އެންމެ ފުރަތަމަ ރިސޯޓް ތަރައްޤީކުރުމަށް ދިން ރަށްތަކުގެ ތެރޭގައި ހިމެނޭ ރަށެކެވެ. އެމްޓީޑީސީން ނާގޯށި ތަރައްޤީކުރުމުގެ މަސައްކަތް މީގެކުރިން ރަޝިއާ އަދި ދުބާއީގެ ކުންފުންޏަކާވެސް ހަވާލުކޮށްގެން ކުރިއަށްގެންދިޔައެވެ. ނަމަވެސް ފައިސާ ލިބުމުގައި ހުރި ގޮންޖެހުންތަކުގެ ސަބަބުން އެރަށުގެ މަސައްކަތް ކުރިއަށްގޮސްފައެއް ނުވެއެވެ.