ދިވެހިން އިހްތިރާމް ކުރަނީ ވައްކަންކުރާ މީހުންނަށް: ރައީސް ޔާމީން

ދިވެހިން އިހްތިރާމް ކުރަނީ ވައްކަން ކުރާ މީހުންނަށް ކަމަށް ކުރީގެ ރައީސް އަބްދުالله ޔާމީން އަބްދުލްޤައްޔޫމް ވިދާޅުވެއްޖެއެވެ.

ރޭގެ ޕީއެންއެފް ބައްދަލުވުމުގައި ވާހަކަދައްކަވަމުން ޔާމީން ވިދާޅުވީ، ދިވެހިރާއްޖޭގެ ޖިނާޢީ އަދުލުގެ ނިޒާމް ބައްޓަންވެފައި އޮންނަ ގޮތާމެދު ލަދުވެތިވާ ކަމަށެވެ.

އެހެން ވިދާޅުވި ސަބަބު ހާމަކުރައްވަމުން ޔާމީން ވަނީ އެމްއެމްޕީއާރްސީ މައްސަލާގައި އެންމެ ބޮޑެތި ތުހުމަތުތަކެއް ކުރެވޭ ކުރީގެ ނާއިބު ރައީސް އަހުމަދު އަދީބު އާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތު މިނިވަންކަމާއެކު ދޫކޮށްލާފައި ހުރިކަން ފާހަގަކުރައްވާފައެވެ.

ކޮބާތޯ އެމްއެމްޕީއާރްސީގެ ގާތްގަނޑަކަށް 400 މިލިއަން ޑޮލަރުގެ ވައްކަން. ކޮބާތޯ މިކަމުގެ ޒިންމާތައް އުފުލައި އަމިއްލަ އިއުތިރާފުން ކޯޓުތަކުގައި އެކަމަށް  އިއުތިރާފްވި އަދީބާއި ޒިޔަތާ. އެތިބީ މާފުވެގެން ގޮސްފައި. އޭރު ޕީޖީ އަކަށް ހުރި ޝަމީމްވެސް ބުނި މީނާގެ މައްޗަށް 800 އަހަރުގެ ހުކުމް އަންނާނޭ. އެހެންވީމާ ވަރަށް ވަރަށް މުޑުދާރު އިނގޭތޯ؟

ކުރީގެ ރައީސް އަބްދުالله ޔާމީން އަބްދުލްޤައްޔޫމް

ކަންމިހެން ހުރުމުން ރާއްޖޭގައި ވައްކަމެއް ކުރާ ނަމަ ކުރަންޖެހޭނީ ބޮޑު އަދަދަކުން ކަމަށާ، ކުޑަ އަދަދަކުން ވައްކަން ކޮށްފި ނަމަ އެ ކުށުގެ ހުކުމް ތަންފީޒުކޮށް ނިންމާނެ ކަމަށް ޔާމީން ވިދާޅުވިއެވެ.

މިތަނުގައި ވައްކަން ކުރަންޏާ ކޮންމެސް ކޮންމެސް ކުޑަކުޑަ އަދަދެއްގެ އެއްޗެއް ނުނަގާތި. އެއީ އެ ހުކުމްތަންފީޒު ކުރާނެ މުއްދަތު ނިމެންދެން. ވައްކަން ކުރަންޏާ ކުރަންވާނީ ބޮޑެތި އަދަދުން. އޭރުން ތަންފީޒެއް ނުކުރާނެ. ތިން ދުވަހު ޖަލުގައި ހުރެފަ ނުކުންނާނެ އިނގޭތޯ؟

ކުރީގެ ރައީސް އަބްދުالله ޔާމީން އަބްދުލްޤައްޔޫމް

ޔާމީން ވިދާޅުވީ، ރާއްޖޭގައި ސަރުކާރުގެ ފައިސާ ނަގާމީހުންނާ ކޮރަޕްޝަން ހިންގާ މީހުންނަށް ޖަލުހުކުމެއް އަޔަސް އެ ތަންފީޒު ނުކުރާނެ ކަމަށާ، ރާއްޖޭގެ ޖިނާއީ ނިޒާމަކީވެސް ކޮރަޕްޝަންގެ ނިޒާމެއް ކަމަށެވެ.

މިއާއެކު ޔާމީން ވިދާޅުވީ، ރާއްޖޭގައި ހިމާޔަތް ލިބެނީވެސް ވައްކަން ކުރާ މީހުންނަށް ކަމަށާ ރައްޔިތުން އިހްތިރާމްވެސް ކުރަނީ ވައްކަން ކުރާ މީހުންނަށް ކަމަށެވެ.

ވައްކަން ކުރަންޏާ ހަމަ ބޮޑުތަނުން ވައްކަންކުރޭ. ދިވެހިރާއްޖޭގައި ހިމާޔަތްވެސް ލިބެނީ ވައްކަންކުރާ މީހުންނަށް. ވައްކަންކުރާ މީހުންނަށް ރައްޔިތުން އިހްތިރާމްވެސް ކުރަނީ. އެ ވަގަށް ނަގާ ފައުސާ އެބަ ބަހާތާ. އޮނެސްޓްކޮށް ލާރި ހޯދާ މީހުން ބަހާނެ ފައިސާއެއް ނުހުންނާނޭ. ވަގަށް ނަގާމީހުން ހަމަ މުށްޖަހަ ޖަހާފައި ދޭންވީތާ.

ކުރީގެ ރައީސް އަބްދުالله ޔާމީން އަބްދުލްޤައްޔޫމް

މީގެ އިތުރުންވެސް ޔާމީން ވަނީ މާލެ ސިޓީ ކައުންސިލްގެ ކޮރަޕްޝަނާއި ސަރުކާރުގެ ތެރޭގައި ހިންގަމުންދާ ކޮރަޕްޝަނުގެ ވާހަކަތައް ދައްކަވާފައެވެ.