ފުލުސް އޮފީހަށް ޣައްސާނާއި އެކު ދިއުމަކީ ސިޔާސީ ކަމެއްނޫން: ފާރިސް

ރައްޔިތުންގެ މަޖިލީހުގެ ގުރައިދޫ ދާއިރާގެ މެންބަރު ޣައްސާން މައުމޫން ރޭ ފުލުހުންގެ އިދާރާއަށް ހާޒިރުކުރެވުނު ވަގުތު އެބޭފުޅާއާއި އެކު އެތަނަށް ވަޑައިގެންނެވީ ސިޔާސީ ސަބަބެއްގައި ނޫންކަމަށް ރައްޔިތުންގެ މަޖިލީހުގެ ދިއްގަރު ދާއިރާގެ ކުރީގެ މެންބަރު އަހުމަދު ފާރިސް މައުމޫން ވިދާޅުވެއްޖެއެވެ.

ފާރިސް މިހެން ވިދާޅުވީ ވޮއިސްއަށް ދެއްވި ބަސްދީގަތުމެއްގައެވެ. ރޭ ޣައްސާން ފުލުހަށް ހާޒިރުކުރެވުނު ވަގުތާއި އެބޭފުޅާ އެތަނުން ނުކުމެވަަޑައިގެންނެވި ވަގުތު އަރިހުގައި ބޭބޭފުޅު ފާރިސް ހުންނެވުމުން ގިނަބަޔެއްގެ ސަމާލުކަން އެކަމަށް ވަނީ ލިބިފައެވެ.

ވޮއިސްއަށް މައުލޫމާތުދެއްވަމުން ފާރިސް ވިދާޅުވީ ޣައްސާނާއި އެކު ފުލުހަށް ވަޑައިގެންނެވީ ހިތްވަރުދެއްވުމުގެ ގޮތުންކަމަށާއި އެކަމަކީ އެއްވެސް ހާލެއްގައި ސިޔާސީ ގޮތުން ކުރިކަމެއް ނޫންކަމަށެވެ. އަދި އެބޭފުޅާގެ ތާއިދު ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހަށް އޮތްކަމަށް ފާރިސް ވިދާޅުވިއެވެ.

ފާހަގަކޮށްލެވޭ ގޮތުގައި ޕީޕީއެމްގެ ތެރޭގައި އުފެދުނު މައްސަލަތަކަށްފަހު، ޣައްސާން ފިޔަވައި އެބޭފުޅާގެ ހުރިހާ އެއްބަނޑު އެއްބަފާ ފަރާތްތަކުން ތިއްބެވީ ބައްޕާފުޅު އަދި ކުރީގެ ރައީސް މައުމޫން އަބްދުލްގައްޔޫމްގެ އަރިހުގައެވެ. ނަމަވެސް ޣައްސާން ވަނީ ރައީސް ޔާމީންގެ ފަޅީގައި ހުންނަވާ، ޕީޕީއެމްގެ ޓިކެޓްގައި މިފަހަރުގެ ގުރައިދޫ ދާއިރާގެ މަޖިލިސް އިންތިޚާބުވެސް ކާމިޔާބުކުރައްވާފައެވެ.

ސިޔާސީ ގޮތުން ޣައްސާން ރައީސް މައުމޫންގެ ފަޅީގައި ނުހުންނެވުމުގެ ސަބަބުން އާއިލީ ގުޅުންތަކަށް ބުރޫއެރިކަމަށް ގިނަ ފަރާތްތަކުން މީގެ ކުރިން ވަނީ ބުނެފައެވެ. ނަމަވެސް ޣައްސާން ވަނީ މިކަން ދޮގުކުރައްވާފައެވެ.

ފާރިސް މައުމޫން ވަނީ ދާދިފަހުން އޮތް މޯލްޑިވްސް ރިފޯމް މޫވްމެންޓްގެ ބައްދަލުވުންތަކުން ފެނިގެން ގޮސްފައެވެ.