ޕީޕީއެމްއަށް ބަލިގަބޫލު ކުރާކަށް ނޭނގޭ: ނިހާން

ޕްރޮގްރެސިވް ޕާޓީ އޮފް މޯލްޑިވްސްއަށް ބަލި ގަބޫލުކުރަން ނޭނގޭކަމަށް ވިލިމާލެ ދާއިރާގެ މެންބަރ އަދި ޕީޕީއެމްގެ ކުރީގެ ޕީޖީ ލީޑަރ އަހުމަދު ނިހާން ހުސައިން މަނިކު ވިދާޅުވެއްޖެއެވެ.

ނިހާން މިހެން ވިދާޅުވީ ޕީއެސްއެމް ނިއުސްއަށް ދެއްވި ޚާއްސަ ބަސްދީގަތުމެއްގައެވެ.

އެބޭފުޅާ ވިދާޅުވީ ޕީޕީއެމްގެ އެންމެ ބޮޑު މައްސަލައަކީ ބަލި ގަބޫލު ނުކުރުމާއި، ބަލިވުމުން ދެން ތެދުވެގެން ދުއްވައިގަންނާނެ އުސޫލުތަކެއް ކަނޑަނޭޅި، ހިމޭންވެފައި ތިބުންކަމަށެވެ. އަދި ޖަޒުބާތުތައް ބޭރުކޮށް، އިދިކޮޅަށް ރައްދުދޭން ޕީޕީއެމްގެ މެންބަރުން ވައިބަރ ނޫން އެއްޗެއް ބޭނުން ނުކުރާނެކަމަށް ނިހާން ވިދާޅުވިއެވެ.

"ޖަޒުބާތުތައް ހަމައެކަނި ވައިބާ ގްރޫޕްތަކުގައި ބޭނުން ކުރުން. ސޯޝަލް މީޑިޔާގެ އެހެން ވަސީލަތެއް ވެސް ބޭނުމެއް ނުކުރާނެ. މީހަކަށް ރައްދެއް ދޭން ވެސް، ރަނގަޅު ވާހަކައެއް ދައްކާލަން ވެސް އެކްޓިވް ނުވާނެ. ހަމަ އެއްކަލަ ގްރޫޕްގައި ތިބެގެން ވާހަކަ ލިޔެލަ ލިޔެލާ ތިބެނީ. އެ އުސޫލު ދޫކޮށްލުމަށް ޕީޕީއެމްގެ އާއްމު މެމްބަރުންނަށް އިހުލާސްތެރިކަމާ އެކު ދަންނަވަން" ނިހާން ވިދާޅުވިއެވެ.

މީގެ އިތުރުން ނިހާން ވަނީ މަޖިލިސް އިންތިޚާބުން ބަލިވީ ޕީޕީއެމްގައި ކޮރަޕްޝަންގެ ޓެގް އެޅުވިފައިވުމުންކަމަށްވެސް ވިދާޅުވެފައެވެ.

ފަހަކަށް އައިސް ނިހާން ދަނީ ފާޅުކަންބޮޑު ގޮތެއްގައި ޕީޕީއެމް އިސްލާހުކުރުމަށް ގޮވާލަމުންނެވެ.