ޓްރާންސްޕޯޓް މިނިސްޓްރީން އަނެއްކާވެސް ޑޮމައިން ނަމްބަރު ވިއްކަން ފަށަނީ

ޑޮމައިން ނަމްބަރުތައް ވިއްކުން މެދުކަނޑާލާފައި އޮތުމަށްފަހު އަންނަ މަހުގެ ތެރޭގައި ޑޮމައިން ނަމްބަރު ވިއްކަން ފަށާނޭކަމަށް މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަނުން ބުނެފިއެވެ.

އެއްގަމުގައި ދުއްވާ އުޅަނދުތަކުގައި ބޭނުންކުރާ ޑޮމެއިން ނަންބަރުތަކާ ގުޅޭ ގިނަ މައްސަލަތަކެއް ފެންމަތިވުމާއެކު، ރައީސް އޮފީހުންވަނީ އެ މައްސަލަ ވަކިގޮތަކަށް ނުނިމެނީސް ޑޮމައިން ނަމްބަރު ނުވިއްކުމަށް ނިންމާފައެވެ.

ޓްރާންސްޕޯޓުން ގެޒެޓްގައި ކުރި އާއްމު އިއުލާނެއްގައި ބުނީ، ޑޮމައިން ނަމްބަރަށް ދިވެހިންގެ މެދުގައި އަދި ވަކިން ޚާއްޞަކޮށް ޒުވާނުންގެ މެދުގައި، ނުހަނު މަޤުބޫލުކަން ލިބިފައިވާ ކަމަށާއި، އަދި ޑޮމެއިން ގަތުމަށާއި ގުޅުންހުރި ޚިދުމަތް ހޯދުމަށް އެފަރާތްތަކުން ބޮޑެތި ހޭދަތައްވެސް ކޮށްފައިވާ ކަމަށެވެ.

އެކަން އެގޮތަށް އޮތުމުން ޑޮމައިންގެ ޚިދުމަތް އަލުން ފެށުމަށްޓަކައި މައްސަލަތަކަށް އަވަސް ޙައްލެއް ހޯދުމަށް މަސައްކަތް ކުރަމުންދާކަމަށާއި، އުއްމީދަކީ ފެށޭ ނޮވެމްބަރ މަހުގެ ތެރޭގައި ޑޮމެއިންގެ ޚިދުމަތްތައް އަލުން ފަށައި ދިމާވެފައިވާ މައްސަލަތައް ހައްލުކުރުމުގެ މަސައްކަތް ފެށުންކަމަށް ޓްރާންސްޕޯޓުން ބުންޏެވެ.

ޑޮމައިން ދޫކުރަން ފަށާއިރު، އެއްވެސް ފަރާތެއްގެ ޙައްޤަކަށް އުނިކަމެއް އަންނާނެ ކަމެއް އެކުލެވިގެން ނުވާނެކަމުގެ ޔަޤީންކަން އެންމެހާ ފަރާތްތަކަށް އަރުވާކަމަށާއި، މިނިސްޓްރީގެ މަޤްޞަދަކީ، ޑޮމެއިން ނަންބަރުތަކާ ގުޅިގެން ދިމާވެފައިވާ މައްސަލަތަކަށް ޤާނޫނާއި ގަވާއިދުގެ ތެރެއިން ލުއިފަސޭހަ ގޮތެއްގައި ޙައްލު ހޯދައިދީ، ރައްޔިތުންގެ އިތުބާރު ލިބިފައިވާ ޚިދުމަތަކަށް ހެދުންކަމަށްވެސް ޓްރާންސްޕޯޓުން ބުންޏެވެ.