އެޖެންޑާ 19 އިން ރާއްޖޭގެ ފަނޑިޔާރުގެ އިސްލާހްކުރާނެ: ނަޝީދު

ކުރިއަށް އޮތް ރައްޔިތުންގެ މަޖިލީހުން ހޮވާ އައު ރައްޔިތުންގެ މަޖިލީހުން ރާއްޖޭގެ ފަނޑިޔާރުގެތައް އިންސާފު ގާއިމުކުރުމުގެ ހަމަތައް ގެނެސްދޭކަމަށާއި އެކަމަށްޓަކައި އެމްޑީޕީގެ އަތް އޮންނާނީ ދޫވެފައިކަމުގައި ކުރީގެ ރައީސް އަދި އެމްޑީޕީގެ ލީޑަރ މުހައްމަދު ނަޝީދު ވިދާޅުވެއްޖެއެވެ.

މައްޗަން ގޮޅީ މެދުދާއިރާއަށް ވާދަކުރުމުގެ ޕާޓީގެ ޓިކެޓް ލިބވަޑައިގެންފައިވާ ނަޝީދު ވިދާޅުވީ ރާއްޖޭގެ އެކިކަންކޮޅުތަކުން ދިވެހި ރައްޔިތުން ގޮވާއަޑު އެމަނިކުފާނަށް އިވިވަޑައިގަންނަވަނީ އެމްޑީޕީއަށް މަޖިލީހުގެ އަޣްލަބިއްޔަތު ދިނުމަށްކަމަށް ކަމުގަ އެވެ.

"ތިބޭފުޅުން އައްސަވަފާނެ ކީއްވެހޭ އެމްޑީޕީ މަޖިލިސް 19 ހޯދަންޖެހެނީ. އަޅުގަނޑަށް އެބަ އަޑުއިވޭ ރާއްޖޭގެ އެކިއެކި ކަންކޮޅުތަކުން ރާއްޖޭގެ ރައްޔިތުން ހަރުއަޑުން އެމްޑީޕީއަށް މިމަޖިލީހުގެ އަޣްލަބިއްޔަތު ދޭންޖެހޭކަމަށް ގޮވާއަޑު. އެތައް މިލިޔަން ރުފިޔާގެ ޝަރީއަތެއް ނުހިގާނެ މިޕާޓީގެ މަސްލަހަތު އެދޭގޮތަކަށް. މިޕާޓީގެ އަތް އޮތީ ދޫވެފައި ޝަރުއީ ނިޒާމު އިސްލާހް ކުރުމަށް." ނަޝީދު ވިދާޅުވިއެވެ. އަދިވެސް ވިދާޅުވިއެވެ. " އަޅުގަނޑުމެންގެ އަތް އޮތީ ބަންދުވެފަކައެއްނޫން. އަޅުގަނޑުމެންގެ އަމިއްލަ ކުންފުންޏެއްގެ ފައިދާ ބޮޑުކުރުމަށް. އަޅުގަނޑުމެންނަކީ އިންތިޒާމުވެގެން ހިންގާ ސިޔާސީ ޕާޓީއެއް"

ފަނޑިޔާރުގެ އިސްލާހްކުރުމަށް އެމްޑީޕީން ބޭނުންވާ ސިޔާސަތު އެޕާޓީން ޖެނުއަރީ 27 ވަނަ ދުވަހުގެރޭ އެޕާޓީން ވަނީ އިއުލާންކޮށްފައެވެ. އެސިޔާސަތުގައި ހިމެނެނީ ސުޕްރީމް ކޯޓުގެ ބާރު ދަށްކޮށް ޖުޑިޝަލް އެޑްމިނިސްޓްރޭޓަރއަކަށް ބޮޑެތި ބާރުތަކެއްދީ، ޖުޑިޝަލް އެޑްމިނިސްޓްރޭޓަރއަކީ ރައްޔިތުންގެ މަޖިލީހަށް ބާރު ފޯރުވޭ ފަރާތަކަށް ހަދަން ހުށަހަޅާފައެވެ. ރައްޔިތުންގެ މަޖިލީހަށް ބާރު ފޯރުވޭ ފަރާތަކަށް ޖުޑިޝަލް އެޑްމިނިސްޓްރޭޓަރވަނީ އޭނާ ވަކިކޮށް އައްޔަންކުރުމުގެ ބާރު ރައްޔިތުންގެ މަޖިލީހުގެ މިނިވަން މުއައްސަސާތަކާއިބެހޭ ކޮމެޓީއަށް ދީގެންނެވެ. ބޭނުމަކީ މަޖިލިސްގެ އަމުރު ހިގާނެ ގޮނޑިކޮއްކޮ މީހަކު ދައުލަތުގެ މިނިވަން ޖުޑިޝަރީގެތެރެއަށް ވެއްދުމެވެ. މިހާރު އޮންނަގޮތުން ޖުޑީޝަލް އެޑްމިނިސްޓްރޭޓަރު އައްޔަން ކުރަނީ ސުޕްރީމް ކޯޓުގެ ފަނޑިޔާރުންގެ ބެންޗުންނެވެ. އެމްޑީޕީން ހުށަހަޅާފައިވާމިއިސްލާހްތަކަކީ ގާނޫން އަސާސީއާއި ޚިލާފް އިސްލާހްތަކެއް ކަމަށް ކުރީގެ ނާއިބް ރައީސް އަދި ގާނޫނީ ވަކީލް ޑޮކްޓަރ މުހައްމަދު ޖަމީލު އަހުމަދު ވިދާޅުވެފައިވެއެވެ.

" ޝަރުއީ ނިޒާމު އިސްލާހުކުރުމުގެ މަސައްކަތަކީ އެއްވެސް ހާލެއްގައި ވަކި ފަރުދަކަށް އަމާޒުކޮށްގެން ހިންގޭ މަސައްކަތެއްނޫން. ވަކިމީހެއްގެ ވާހަކަދައްކާ މަޖިލީހަކަށްނުވާނެ. އެމަސައްކަތަކީ އުސޫލުތައް ހަރުދަނާކުރުން. އެމަސައްކަތަކީ ޝަރުއީ ނިޒާމު ހަރުދަނާކުރުމަށްޓަކައި ގެންނާންޖެހޭނެ ގާނޫނީ ބަދަލުތައް ގެނެސްދޭ މަޖިލީހެއް" ނަޝީދު ރޭ ވިދާޅުވިއެވެ.

އެމްޑީޕީން ރައްޔިތުންގެ މަޖިލިސްގެ އިންތިޚާބުގައި ވާދަކުރުމަށް ރަސްމީގޮތުން ކެމްޕެއިންފަށަމުން ނަޝީދު މިރޭ ވިދާޅުވީ ދިވެހި ރައްޔިތުން ބޭނުންވަނީ މިއަދު މުޅިން އެހެން ގައުމިއްޔަތެއް ކަމަށެވެ.

އެމްޑީޕީން ގެންނަން ބޭނުންވާ ބަދަލުތައް ގެންނަން ރައްޔިތުންގެ މަޖިލިސް ހިންގާ ގަވާއިދުވެސް ބަދަލުކުރެވޭނެކަމަށް ނަޝީދު ވިދާޅުވިއެވެ.

ރައީސް އަބްދުﷲ ޔާމީންގެ ވެރިކަމުގައި ތައާރަފްކުރި އެންޓި ޑިފެކްޝަންގެ ގާނޫންފަދަ ގާނޫނަކަށް އިޝާރާތްކުރައްވަމުން ވިދާޅުވީ 19 ވަނަ ރައްޔިތުންގެ މަޖިލީހުގެ މެމްބަރުން ޕާޓީ ބަދަލުނުކުރާނެކަމަށެވެ. ވޯޓެއްވެސް ނުވިއްކާނެއެވެ.

" މަޖިލިސްގެ ތަޅުމުގައި ލަދެއް ހަޔާތެއްނެތި ފައިސާ ގޯނިގޯނީގެ ވާހަކަ ދައްކަމަކުންނެއް މަޖިލިސްގެ މެމްބަރުންނެއް ނުހިނގާނެ" ނަޝީދުވިދާޅުވިއެވެ.