ޚިދުމަތުގައި 19 އަހަރު؛ ”މަހުދީއަކީ ރައްޔިތުންގެ ފުރާނައާއި މުދާ ސަލާމަތްކުރުމުގައި ނަމޫނާދެއްކި ޝަޚްޞިއްޔަތެއް“

ވ. އަތޮޅުގައި ޑައިވިނަށް ގޮސް އުޅެނިކޮށް ގެއްލުނު ހަތަރު ފަތުރުވެރިން ހޯދުމުގެ އޮޕަރޭޝަނުގައި ހަރަކާތްތެރިވަމުން ދަނިކޮށް، ނިޔާވި އެމްއެންޑީއެފް ކޯސްޓްގާޑުގެ އެންމެ ހުނަރުވެރި އެއް ޑައިވަރު، ސާޖަންޓް ފަސްޓް ކްލާސް މުޙައްމަދު މަހުދީ (ހ. 6029) އަކީ ޚިދުމަތުގައި ނަމޫނާ ޝަޚުސިއްޔަތެއް ކަމުގައި އެމްއެންޑީއެފުން ބުނެފިއެވެ.

މަހުދީ ނިޔާވުމާ ގުޅިގެން އެމްއެންޑީއެފުން ނެރުނު ތަޢުޒިޔާގެ މެސެޖުގައި ބުނީ، އޭނާ ނިޔާވުމަކީ، މުޅި ޤައުމަށް ލިބުނު ބޮޑު ހިތާމައެއް ކަމަށެވެ.

އެމްއެންޑީއެފުން ބުނިގޮތުގައި، މަހުދީ ނިޔާވީ، ގެއްލުނު ފަތުރުވެރިން ހޯދުމަށް އެމްއެންޑީއެފް ކޯސްޓްގާޑާއި ދިވެހި ފުލުހުންގެ ޚިދުމަތް ގުޅިގެން، ސަލާމަތީ ފިޔަވަޅުތަކާއެކު ކުރިއަށް ގެންދިޔަ "ސަރޗް އެންޑް ރިކަވަރީ" އޮޕަރޭޝަނުގައި ހަރަކާތްތެރިވަމުން ދަނިކޮށެވެ.

އަދި މަހުދީގެ ކުއްލި ވަކިވުމަކީ ދިވެހި ސިފައިންނަށާއި ދިވެހި ޤައުމަށް ލިބުނު ވަރަށް ބޮޑު އުނިކަމެއް ކަމަށް އެމްއެންޑީއެފުން ނެރުނު ތައުޒިޔާގެ މެސެޖުގައި ބަޔާންކޮށްފައިވެއެވެ.

19 ޑިސެންބަރު 2005 ގައި ސިފައިންގެ ޚިދުމަތާ ގުޅިވަޑައިގަތް މަހުދީއަކީ، ވޭތުވެދިޔަ 19 އަހަރު ދުވަހު އަމިއްލަ ނަފުސަށް ވުރެ ޤައުމީ ޚިދުމަތް އިސްކުރެއްވި، ހިތްވަރުގަދަ، ކެރޭ، އަދި ނަމޫނާ ސިފައިންގެ ބޭކަލެކެވެ.

ވަކިން ޚާއްޞަކޮށް، ކަނޑުމަތީގެ ނުރައްކާތެރި ހާދިސާތަކުގައި ރައްޔިތުންގެ ފުރާނައާއި މުދާ ސަލާމަތްކުރުމަށް ކޯސްޓްގާޑުން ހިންގާފައިވާ ބޮޑެތި އޮޕަރޭޝަންތަކުގައި އޭނާ ދައްކުވައިދީފައިވާ ޤާބިލުކަމަކީ އެންމެހާ ސިފައިން ފަޚުރުވެރިވާ ފަދަ ޚިދުމަތްތަކެއްކަމަށް އެމްއެންޑީއެފުން ފާހަގަކުރެއެވެ.

އެމްއެންޑީއެފުން ބުނިގޮތުގައި، މަހުދީއަކީ ރާއްޖެއާއި ރާއްޖެއިން ބޭރުން ޑައިވިންގ ދާއިރާއިން މަތީ ތަމްރީނުތައް ފުރިހަމަކުރައްވާފައިވާ ބޭފުޅެކެވެ. އަދި ފުން ސަރަހައްދުތަކުގައި ހިންގާ އޮޕަރޭޝަންތަކަށް ޚާއްޞަކޮށްގެން ޓެކްނިކަލް ޑައިވަރުން އުފެއްދުމަށް ހިންގާ ތަމްރީނުތަކުގައި އޭނާ ދައްކުވައިދިން ހިތްވަރަކީ، ޤައުމީ ވާޖިބަށާއި އިންސާނިއްޔަތަށް އޭނާގެ ހިތުގައި އޮތް ލޯތްބާއި ޝައުޤުވެރިކަން ހާމަކޮށްދޭ އަލިގަދަ ހެއްކެކެވެ.

މަހުދީގެ ޖަނާޒާ ރޭ ބާއްވާފައިވަނީ ރަސްމީ ޢިއްޒަތުގައެވެ. އެމްއެންޑީއެފުން ވަނީ މަހުދީގެ ފުރާނައަށް މަތިވެރިވެގެންވާ ޝަހީދެއްގެ ދަރަޖަ ދެއްވައި، ސުވަރުގޭގެ ދާއިމީ ނިޢުމަތް މިންވަރުކޮށްދެއްވުން އެދި ދުޢާކޮށްފައެވެ. އަދި މި ހިތާމަވެރި ދަނޑިވަޅުގައި އޭނާގެ ޢާއިލާއަށް ކެތްތެރިކަން މިންވަރުކޮށްދެއްވުމަށް ވެސް އެދިފައިވެއެވެ.