އީޔޫ ޕްރެސް ކޮންފަރެންސްގައި އިސްރާއިލްއާއި ގުޅޭ ސުވާލެއްކޮށްގެން އިޓަލީ ނޫސްވެރިއަކު ވަޒީފާއިން ވަކިކޮށްފި

ޑިމޮކްރަޓިކް އުސޫލްތަކަށް އަބަދުވެސް ވަކާލާތު ކުރަމުން އަންނަ ޔޫރަޕިއަން ޔޫނިއަނުން ބޭއްވި ނޫސްވެރިންގެ ބައްދަލުވުމެއްގައި އިސްރާއިލްއާ ގުޅޭ ސުވާލެއް ކޮށްގެން އިޓަލީ ނޫސްވެރިއަކު ވަޒީފާއިން ވަކިކޮށްފިއެވެ.

ވަޒީފާއިން ވަކިކޮށްފައިވަނީ ރޯމްގެ ނޯނާ ނިއުސް އޭޖެންސީގެ ފަރާތުން ބްރަސަލްސްގައި ހުންނަ ކޮރެސްޕޮންޑެންޓް ގެބްރިއަލް ނުންޒިއާޓީއެވެ.

އޮކްޓޯބަރު 13 ގައި ބޭއްވުނު އީޔޫގެ ނޫސްވެރިންގެ ބައްދަލުވުމެއްގައި އޭނާ ވަނީ ޔޫރަޕިއަން ޔޫނިއަނުން ވަރަށް ގިނަ ފަހަރު ރަޝިޔާއިން ޔޫކްރެއިން ބިނާކުރުމުގެ ހަރަދު ދައްކަން ޖެހޭނެކަމަށް ބުނަމުންދާއިރު، އިޒްރޭލުން ފަލަސްތީނުގެ ޣައްޒާ އަލުން ބިނާކުރުމުގެ މާލީ ޒިންމާ ނުނަގަންވީ ކީއްވެގެންތޯ ސުވާލުކޮށްފައެވެ. އޭނާގެ ސުވާލު އަމާޒުކުރެއްވީ ޔޫރަޕިއަން ކޮމިޝަންގެ އިސް ތަރުޖަމާނު، ޕައުލާ ޕިންހޯއާ އެވެ.

"ރަޝިޔާއިން ޔޫކްރެއިން އަލުން ބިނާކުރުމަށް ފައިސާ ދައްކަން ޖެހޭނެ ކަމަށް ޔޫރަޕިއަން ޔޫނިއަނުން ވަރަށް ގިނަ ފަހަރު ތަކުރާރުއެބަކުރޭ. އެމީހުން (އިޒްރޭލުން) ޣައްޒާގެ ހުރިހާ ސިވިލް އިންފްރާސްޓްރަކްޗާއެއް ހަލާކުކޮށްލާފައިވާއިރު، އިޒްރޭލުން ޣައްޒާ އަލުން ބިނާކުރުމަށް ފައިސާ ދައްކަން ޖެހޭނެ ކަމަށް އީޔޫއިން ގަބޫލުކުރަންތޯ

ގަބްރިއެލް ނުންޒިއާޓީ

އޭނާގެ މި ސުވާލު ވަނީ ސޯޝަލް މީޑިއާގައި ވަރަށް ބޮޑަށް ވައިރަލްވެފައެވެ. އަދި ވާހަކަތައް މީޑިއާގައި އާއްމުވެ، އީޔޫއަށް އެކިފަރާތްތަކުގެ ފާޑުކިޔުންތައް އަމާޒުވާން ފެށުމާއެކު އެންމެފަހުން އީޔޫގެ އޮފިޝަލުން ގެބްރިއަލް މަސައްކަތްކުރާ އޮފީހަށް ޕްރެސަރުކޮށްގެން އެންމެފަހުން އޭނާގެ ވަޒީފާ ވަނީ ގެއްލުވާލާފައެވެ.

'ދަ އިންޓަރސެޕްޓް' އަށް ނުންޒިއާޓީ ދީފައިވާ އިންޓަވިއުއެއްގައި ބުނެފައިވަނީ އޮކްޓޯބަރު 27 ގައި، ނޯވާ އޭޖެންސީން އޭނާއާ އެކު ކުރަމުންދިޔަ މަސައްކަތް ނިމުމަކަށް ގެނައުމަށް ބޭނުންވާ ކަމަށް އެ އެޖެންސީގެ މެއިލްއެއް ލިބިފައިވާކަމަށެވެ.

ގެބްރިއަލް ކުރި ސުވާލަށް އީޔޫގެ ތަރުޖަމާނު ޖަވާބުދީފައި ނުވާއިރު، ހަމައެކަނި ބުނެފައިވަނީ "ތިއީ ޝައުގުވެރި ސުވާލެއް" މިހެން އެކަންޏެވެ.

ޣައްޒާގެ ސިއްހީ އޮފިޝަލުންގެ ތަފާސްހިސާބުތައް ދައްކާ ގޮތުގައި، 2023 ވަނަ އަހަރުގެ އޮކްޓޯބަރު މަހުން ފެށިގެން އިޒްރޭލުން ހިންގާ ގަތުލުއާންމުގައި 69,000 އަށް ވުރެ ގިނަ މީހުން މަރުވެ، 170,000 އަށް ވުރެ ގިނަ މީހުންނަށް ވަނީ އަނިޔާވެފައެވެ. އަދި މިހާރު ޖަރީމާތައް ހުއްޓާލިކަމަށް އިސްރާއީލުން ބުނި ނަމަވެސް އިސްރާއީލް ސިފައިން ދަނީ ކޮންމެ ދުވަހަކުހެން ފަލަސްތީނަށް ހަމަލާތައް ދެމުންނެވެ.