ލަންޑަނުގައި ބާއްވާ "މުސްލިމް ޓްރެވަލް ޝޯ 2026" ގައި ރާއްޖެއިން އައި.އެޗް.ޓީ.އޯ ބައިވެރިވަނީ

ދުނިޔޭގެ އެންމެ ބޮޑު ހަލާލް އަދި މުސްލިމް-ފްރެންޑްލީ ފަތުރުވެރިކަމުގެ މައުރަޒު ކަމަށްވާ "މުސްލިމް ޓްރެވަލް ޝޯ 2026" ގައި ރާއްޖެއިން ރަސްމީކޮށް ބައިވެރިވާނެކަން އިންޓަނޭޝަނަލް ހަލާލް ޓޫރިޒަމް އޯގަނައިޒޭޝަން (އައި.އެޗް.ޓީ.އޯ) އިން އިޢުލާނުކޮށްފިއެވެ.

މި މައުރަޒު ކުރިއަށްދާނީ 2026 ފެބުރުވަރީ 7 އިން 8 އަށް ލަންޑަނުގެ އެކްސެލްގައެވެ.

އައި.އެޗް.ޓީ.އޯ އިން އިސްނަގައިގެން ކުރިއަށްގެންދާ މި ހަރަކާތަށް، މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމް.އެމް.ޕީ.އާރް.ސީ / ވިޒިޓް މޯލްޑިވްސް)، މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓާސް (މަޓާޓޯ)، މޯލްޑިވްސް ބޯޓިންގ އެސޯސިއޭޝަން (އެމް.ބީ.އޭ) އަދި ނޭޝަނަލް ހޮޓެލްސް އެންޑް ގެސްޓް ހައުސް އެސޯސިއޭޝަން އޮފް މޯލްޑިވްސް (އެން.އެޗް.ޖީ.އޭ.އެމް) އިން ވަނީ ރަސްމީކޮށް ތާއީދުކޮށްފައެވެ. މިއީ ހަލުވިކަމާއެކު ކުރިއަރަމުން އަންނަ ބައިނަލްއަގުވާމީ ހަލާލް ފަތުރުވެރިކަމުގެ ބާޒާރުގައި ރާއްޖޭގެ މަގުބޫލުކަން އިތުރުކުރުމަށް އެޅޭ މުހިންމު ފިޔަވަޅެކެވެ.

މުސްލިމް ޓްރެވަލް ޝޯއަކީ ވިޔަފާރިވެރިންގެ މެދުގައި ބާއްވާ ގުޅުންތަކާއި (ބީ2ބީ) ކަސްޓަމަރުންނާ ސީދާ ބައްދަލުވާ (ބީ2ސީ) ހަރަކާތްތައް ހިމެނޭ، ހަލާލް ފަތުރުވެރިކަމުގެ ދާއިރާގައި ދުނިޔެ ގަބޫލުކުރާ އެންމެ ބޮޑު މަންސައެވެ. އެގޮތުން، މިއަހަރުގެ މައުރަޒުގައި ދެ ދުވަހުގެ ތެރޭގައި 20،000 އަށްވުރެ ގިނަ ޒިޔާރަތްތެރިން ބައިވެރިވާނެ ކަމަށް ލަފާކުރެވޭއިރު، މީގެ ތެރޭގައި އެއާލައިންތަކާއި، އެއާޕޯޓްތައް، ގައުމީ ފަތުރުވެރިކަމާ ބެހޭ އިދާރާތައް، ހޮޓާތަކާއި ރިސޯޓްތައް، އޮންލައިން ޓްރެވަލް އެޖެންސީތައް އަދި ހަލާލް ޚިދުމަތްދޭ މަޝްހޫރު ބްރޭންޑްތައް ހިމެނޭހެން 200 އަށްވުރެ ގިނަ ފަރާތުން ބައިވެރިވާނެއެވެ.

މި މައުރަޒަކީ ގައުމުތަކުގެ ސަރުކާރުތަކާއި ބައިނަލްއަގުވާމީ ފަތުރުވެރިކަމުގެ ބްރޭންޑްތަކުން، މުސްލިމް ފަތުރުވެރިންނަށް ޚާއްޞަ ފުރުސަތުތައް ތައާރަފުކުރުމަށާއި، ހަލާލް އުސޫލުތަކަށް ފެތޭ ޚިދުމަތްތައް ދައްކާލުމަށް ބޭނުންކުރާ މުހިންމު ވަސީލަތެކެވެ. އެގޮތުން، ރާއްޖެއަށް ބަލާއިރު، މިއީ ރާއްޖޭގެ ރިސޯޓުތަކާއި، ގެސްޓްހައުސްތައް، ޓްރެވަލް އެޖެންސީތައް، ސަފާރީ އުޅަނދުތައް އަދި އާއިލީ ފަތުރުވެރިކަމަށް އެކަށޭނަ ޚިދުމަތްތައް ބައިނަލްއަގުވާމީ ފެންވަރުގައި އިޝްތިހާރުކުރުމަށް ލިބޭ ރަނުގެ ފުރުސަތެކެވެ.

ދުނިޔޭގެ މުސްލިމް ފަތުރުވެރިކަމުގެ ބާޒާރަކީ މިހާރު އެންމެ ހަލުވިކަމާއެކު ކުރިއަރަމުން އަންނަ އެއް ދާއިރާއެވެ. އަހަރަކު 200 އާއި 300 ބިލިއަން އެމެރިކާ ޑޮލަރުގެ އަގުހުރި މި ބާޒާރު، 2035 ވަނަ އަހަރާ ހަމައަށްދާއިރު 500 ބިލިއަން ޑޮލަރަށް އަރާނެ ކަމަށް ލަފާކޮށްފައިވެއެވެ. 2024 ވަނަ އަހަރު 176 މިލިއަން މުސްލިމް ފަތުރުވެރިން ދަތުރުކޮށްފައިވާއިރު، މިއީ 2023 ވަނަ އަހަރާ އަޅާބަލާއިރު 25 އިންސައްތައިގެ ކުރިއެރުމެކެވެ. އަދި 2030 ވަނަ އަހަރާ ހަމައަށް މި އަދަދު 245 މިލިއަނަށް އަރާނެ ކަމަށް ބެލެވެއެވެ.

މި މައުރަޒުގައި ބައިވެރިވުމުގެ މައިގަނޑު މަގުސަދަކީ މުސްލިމުންނަށް އެކަށޭނަ މަންޒިލެއްގެ ގޮތުގައި ރާއްޖެއަށް އޮތް މަގުބޫލުކަން އިތުރުކުރުމާއި، ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކުގެ މެދުގައި ގުޅުން ބަދަހިކުރުމާއި، ހަލާލް ފަތުރުވެރިކަމުގެ ޚިދުމަތްތައް އެއް މިންގަނޑަކަށް ގެނައުމަށް ބާރުއެޅުން ކަމަށް އައި.އެޗް.ޓީ.އޯ އިން ބުނެފައިވެއެވެ. އަދި ހަލާލް ފަތުރުވެރިކަމުގެ ދާއިރާއިން ކުރިން ތައްޔާރުވުމަކީ، ދުނިޔޭގެ ވާދަވެރި ބާޒާރުގައި ދިވެހި ފަތުރުވެރިކަމުގެ ހިއްސާދާރުންނަށް ލިބޭނެ ބޮޑު ކުރިއެރުމެއް ކަމަށްވެސް ބުނެފައިވެއެވެ.

އައި.އެޗް.ޓީ.އޯ އިން ވަނީ މި މައުރަޒުގައި ރާއްޖޭގެ "ނޭޝަނަލް ސްޓޭންޑް" ގައި ބައިވެރިވުމުގެ ފުރުސަތު ފަތުރުވެރިކަމުގެ ދާއިރާގައި މަސައްކަތްކުރާ ފަރާތްތަކަށް ހުޅުވާލާފައެވެ. ބައިވެރިވާން ބޭނުންވާ ފަރާތްތަކަށް www.ihto.org މެދުވެރިކޮށް ރެޖިސްޓްރީ ކުރެވޭނެކަމަށާއި، [email protected] އަށް އީމެއިލް ކޮށްގެން ނުވަތަ 9466777 960+ ނަންބަރަށް ގުޅައިގެންވެސް އިތުރު މަޢުލޫމާތު ހޯދޭނެކަމަށް އެ ޖަމިއްޔާއިން ބުނެއެވެ.