ސަލަފުން މި ހަފްތާ ބަންދުގައި 20 ރަށެއްގައި ދަރުސްތައް ބާއްވަނީ

ޖަމިއްޔަތުއްސަލަފްގެ ހަފްތާ ބަންދު ދަރުސްތައް މި މި ހަފްތާގައި 20 ރަށެއްގައި ކުރިއަށް ގެންދަން ނިންމައިިފި އެވެ.

އެ ޖަމިއްޔާ އިން ބުނީ ރާއްޖޭގެ އެކި ރަށްތަކުގައި ދީނީ ހޭލުންތެރިކަން ފެތުރުމުގެ ގޮތުން ކުރިއަށް ގެންދާ މި ދަރުސްތައް 11 ޝެއިޚުންނާއެކު 5 އަތޮޅެއްގެ 20 ރަށެއްގައި އޮންނާނެ ކަމަށެވެ.

މި ހަފްތާގައި ދަރުސްތައް އޮންނާނީ ހއ. ހޯރަފުއްޓާއި އިހަވަންދޫ އާއި ވަށަފަރާއި އުތީމާއި ބާރަށާއި މުރައިދޫގެ އިތުރުން ތަކަންދޫ އާއި މާރަންދޫ އަދި ތުރާކުނައި އުލިމަގު އަދި ކެލަޔާއި ފިއްލަދޫގަ އެވެ.

މީގެ އިތުރުން ދ. ކުޑަހުވަދޫ އާއި އދ. މާމިގިއްޔާއި ކ. މާފުއްޓާއި ގދ. ނަޑެއްލާގެ އިތުރުން ރ. އަނގޮޅިތީމުގަ ވެސް ދަރުސްތައް އޮންނާނެ އެވެ.

މި ރަށްތަކުގައި ދީނީ ދަރުސްތައް ދެއްވާނީ އައްޝައިޚް އަޙްމަދު ސަމީރާއި އައްޝައިޚް ޢަބްދުއްސަލާމް ދާވޫދާއި އައްޝައިޚް މުޙައްމަދު ޝާހިދާއި އައްޝައިޚް ޙާތިމް ޔޫސުފާއި އައްޝައިޚް ޙަސަން ޞަބާޙާއި އައްޝައިޚް ޙަސަން ފައިޞަލާއި އައްޝައިޚް އަޙްމަދު ޝުޢައިބުގެ އިތުރުން އައްޝައިޚް މުޖުތަބާ ޙަމީދާއި އައްޝައިޚް ޢަޠީފު އަބޫބަކުރާއި އައްޝައިޚް މުޙައްމަދު މަންޞޫރު އާދަމް އަދި އައްޝައިޚް ސާޖިދު މުޙައްމަދެވެ.

ހަފްތާ ބަންދު ދަރުސްތަކަކީ ރަމަޟާން މަސް ނޫން މަސްތަކުގައިވެސް އެކިއެކި ރަށްތަކުގައި ކުރިއަށް ގެންދެވޭ ދަރުސްތަކެއް ކަމުގައި ވީނަމަވެސް، ޚާއްޞަކޮށް ރަމަޟާންމަހުގައި ވީހާވެސް ގިނަ އަތޮޅުތަކެއްގައާއި ރަށްތަކެއްގައި ދަރުސްތައް ބޭއްވުމަށް ސަލަފުން ގިނަ މަސައްކަތްތަކެއް އަބަދުވެސް ކުރަމުންދާ ކަމަށް ބުންޏެވެ.

އެހެން މައްސަރުތަކާ ހިލާފަށް ހާއްސަކޮށް ރަމަޟާންމަހުގައި ދީނީ ހޭލުންތެރިކަން ފެތުރުމަށްޓަކައި  ކައުންސިލުތަކުންނާއި، އެކިއެކި މުއައްސަސާތަކުންނާއި، ޖަމިއްޔާތަކުންނާއި، އަމިއްލަ ފަރުދުން އިސްނަގައިގެން އަގުހުރި، ބުރަ މަސައްކަތްތަކެއް ކުރާކަމީ ސަލަފުގެ ފަރާތުން އެކަމާމެދު އިންތިހާއަށް އުފާކުރާ، އަދި އެކަމުގައި އެފަރާތްތަކަށް ނިހާޔަތަށް ޝުކުރުވެރިވާ ކަމެއް ކަމަށް ވެސް ބުންޏެވެ.