ބިމުކުލީގެ ގޮތުގައި 29.9 މިލިއަން ރުފިޔާ ލިބެންޖެހޭ: ތިނަދޫސިޓީ ކައުންސިލް

ޤަވާއިދުން ބިމުކުލި ދައްކަމުން ނުދާ ފަރާތްތަކުގެ ވަނަވަރު ގދ.ތިނަދޫސިޓީ ކައުންސިލުން މިއަދު އާއްމުކޮށްފިއެވެ.

ތިނަދޫސިޓީ ކައުންސިލުން ބިމުކުލި ނުދައްކާ ފަރާތްތަކުގެ ލިސްޓް މިއަދު އާއްމުކުރިއިރު، އެފަރާތްތަކުން ދައްކަންޖެހޭ ޖުމްލަ އަދަދު 29.9 މިލިއަން ރުފިޔާއަށް އަރައެވެ. ބިމުކުލި ނުދައްކާ މި ލިސްޓްގައި ޖުމްލަ 50 ފަރާތެއް ހިމެނެއެވެ. މީގެ ތެރޭގައި ކުންފުނިތަކާއި އަމިއްލަ ފަރުދުން ހިމެނެއެވެ. ބިމުކުލި ނުދައްކާ ފަރާތްތަކުގެ ތެރޭގައި ސަރުކާރުގެ މަޝްހޫރު ކުންފުނިތަކުގެ އިތުރުން މަޝްހޫރު އަމިއްލަ ކުންފުނިތައް ހިމެނެއެވެ.

މިކަމާ ގުޅޭގޮތުން ތިނަދޫ ސިޓީ ކައުންސިލުން ބުނީ އާއްމުކުރި ލިސްޓްގައި ހިމެނެނީ މިދިޔަ ޖޫންމަހުގެ 30 ވަނަ ދުވަހުގެ ނިޔަލަށް ކުލި ނުދައްކާ ފަރާތްތަކުގެ ނަންތައްކަމަށެވެ. އެގޮތުން ކުލި ނުދައްކާ ފަރާތްތަކުގެ ނަންތައް ހަމަޖެހިފައިވާ އުސޫލުން ކޮންމެ މަހަކު އެއްފަހަރު ހާމަކުރަމުންދާނޭކަމަށް އެ ކައުންސިލުން ބުންޏެވެ.

ތިނަދޫސިޓީ ކައުންސިލުން ބުނީ ހަމަޖެހިފައިވާ އުސޫލުން ފައިސާ ދައްކަމުން ނުދާނަމަ ޝަރުއީ މަރުހަލާގެ ތެރެއިންވެސް އެ ފައިސާ ހޯދުމުގެ މަސައްކަތް އެ ކައުންސިލުން ކުރަމުންގެންދާނޭކަމަށެވެ. އެގޮތުން ފައިސާ ނުދައްކާ ފަރާތްތަކުގެ މައްސަލަތައް ޝަރީއަތަށް ހުށަހެޅުމަށް މަސައްކަތްކުރަމުންދާކަމަށް ކައުންސިލުން ވަނީ ބުނެފައެވެ.

ތިނަދޫއަކީ ރާއްޖޭގެ ދެކުނުގައި މީހުން އުޅޭ ރަށްތަކުގެ ތެރެއިން އެންމެގިނައިން މީހުން ދިރިއުޅެމުން އަންނަ އެއް ރަށެވެ. މައުލޫމާތު ލިބިފައިވާ ގޮތުގައި ތިނަދޫގައި 12،000 ހާހަށްވުރެ ގިނަ މީހުން ދިރިއުޅެއެވެ. ތިނަދޫއަކީ ދިރިއުޅުމުގެ ވަސީލަތްތައް ލިބެންހުރި ރަށެކެވެ. މިގޮތުން ޓާޝިއަރީ ފެންވަރުގެ ހޮސްޕިޓަލަކާއި ޔުނިވަރސިޓީ ލެވެލްގެ ކޯސްތައް އެރަށުގައި ހިންގަމުންދާއިރު، ރާއްޖޭގެ އެހެން ރަށްރަށާ އަލާބަލާއިރު، އެރަށުގައި އިގްތިސާދީ ވަސީލަތްތައްވެސް ޤާއިމްވެފައި ހުރިކަން ފާހަގަކޮށްލެވެއެވެ.