ކޭވްގައި ތާށިވި ޑައިވަރުން ހޯދުމުގެ އޮޕަރޭޝަން: ދެ ޑައިވަރެއްގެ ހަށިގަނޑު ނަގައިފި

ޑައިވިނަށް ގޮސް އުޅެނިކޮށް ގެއްލުނު ޑައިވަރުންގެ ތެރެއިން ދެ މީހެއްގެ ހަށިގަނޑު ނަގައިފި އެވެ.

އެކަން ކަމާގުޅޭ އިދާރާތަކުން ވަނީ ޔަގީންކޮށްދީފަ އެވެ. ‏ޑައިވިނަށް ގޮސް އުޅެނިކޮށް ގެއްލުނު ހަތަރު މީހުން ހޯދުމަށް އެމްއެންޑީއެފް ކޯސްޓްގާޑާއި، ފުލުހުންގެ ޚިދުމަތާއި އަދި އިޓަލީ ސަރުކާރުން ހަމަޖެއްސި ބޭރުގެ ތަޖުރިބާކާރު ޑައިވަރުން ގުޅިގެން އިއްޔެ ހިންގި އޮޕަރޭޝަނުގައި، އެމީހުންގެ ހަށިގަނޑުތައް ލޮކޭޓްކުރެވިފައިވާ ކަމަށް ސިފައިން ހާމަކުރީ އިއްޔެ އެވެ.

އެމީހުންގެ ހަށިގަނޑުތައް ފެނިފައިވަނީ އެމީހުން ޑައިވް ކުރި ކޭވް (ހޮހަޅަ) ތެރެއިން ކަމަށެވެ.

މިއަދު ކުރި ޑައިވްގައި އޭގެ ތެރެއިން ދެ މީހެއްގެ ހަށިގަނޑު ވަނީ ނަގާފަ އެވެ. އަދި އަނެއް ދެ ހަށިގަނޑު ނެގުމަށް އިތުރު ޑައިވްތައް ކުރަން ވަނީ ހަމަޖެހިފަ އެވެ.

މި އޮޕަރޭޝަންގެ ތަފްސީލެއް އަދި ހާމައެއް ނުކުރެ އެވެ.

ވ. އަތޮޅުގައި ޑައިވިނަށް ގޮސް އުޅެނިކޮށް ގެއްލުނު ހަތަރު ފަތުރުވެރިން ހޯދުމުގެ އޮޕަރޭޝަނުގައި ބައިވެރިވުމަށް ފިންލޭންޑްގެ ތަޖުރިބާކާރު ތިން ޑައިވަރުން ރާއްޖެ އައީ އިއްޔެގެ ކުރީ ދުވަހު އެވެ..

ރައީސް އޮފީހުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވެފައިވާ ގޮތުން، ފިންލޭންޑުގެ މި ޑައިވަރުން ރާއްޖެ އައީ އިޓަލީވިލާތުގެ ސަރުކާރުން ހުށަހެޅި ހުށަހެޅުމަކަށް ކަމަށެވެ. އަދި އެ ޓީމުގައި ކޭވް ޑައިވިން ސްޕެޝަލިސްޓެއް ވެސް ހިމެނޭ ކަމަށާ، ޓީމު ރާއްޖެއައީ ކަމަށް ބޭނުންވާ ސާމާނުވެސް ހިފައިގެންނެވެ.

ގެއްލުނު ފަތުރުވެރިން ހަށިގަނޑުތައް ފިންލޭންޑްގެ ޑައިވަރުންގެ އެހީގައި ހޯދިފައިވާއިރު، އެ ފަތުރުވެރިން ހޯދުމުގެ މަސައްކަތުގައި އުޅުނު، ސާޖަންޓް ފަސްޓް ކްލާސް މުޙައްމަދު މަހުދީ ވަނީ ހަށިގަނޑުތައް ހޯދުމުގެ މަސައްކަތުގައި އުޅެނިކޮށް މިމަހު 16 ވަނަ ދުވަހު ނިޔާވެފަ އެވެ.