ބައިނަލްއަޤުވާމީ ކުޑަކުދިންގެ ދުވަހުގެ ހަދިޔާ ބެކަމް ޚާއްސަކުރީ ރާއްޖޭގެ ތުއްތު ކުއްޖަކަށް

އިއްޔެ ފާހަގަކުރި ބައިނަލްއަޤުވާމީ ކުޑަކުދިންގެ ދުވަހާއި ގުޅިގެން ބެކަމްގެ އިސްޓަގްރާމް މެދުވެރިކޮށް ދިވެހިރާއްޖޭގެ ތުއްތު ކުއްޖަކަށް ލޯބި ”ހަދިޔާއެއް“ ދީފިއެވެ.

އެގޮތުން މިދުވަހުގެ ތަހުނިޔާ ކުޑަކުދިންނަށް އަރިސްކޮށް، ޔުނިސެފްގެ ގުޑްވިލް އެމްބެސެޑަރު ޑޭވިޑް ބެކަމް، މީސްމީޑިއާގައި ކުރި ޕޯސްޓުގައި ބުނީ، ތަޢުލީމް ހާސިލްކުރުމާއި، މުސްތަގުބަލާމެދު ހުވަފެންތައް ދެކުމާއި، އުފާވެރި ޙަޔާތެއް ވޭތުކުރުމާއި، ލޯތްބާއި ރައްކާތެރިކަން ލިބުމަކީ ކޮންމެ ކުއްޖަކަށްވެސް ލިބިގެންވާ ހައްގެއް ކަމަށެވެ.

އެއާއެކު އޭނާވަނީ އަމީރު އަހުމަދުގައި ތަޢުލީމް ހާސިލްކުރަމުންދާ އުމުރުން 3 އަހަރުގެ ބަބުލްގެ ޙަޔާތުގެ އެއްދުވަސް ހޭދަކުރާ ގޮތުގެ ވީޑިއޯއެއް ހިއްސާކޮށްފައެވެ.

ވީޑިއޯގައި ބަބުލް ސުކޫލަށް ދާން ތައްޔާރުވާ މަންޒަރާއި، އޭނާ ސުކޫލުގައި ކުރާ ކަންކަމާއި އަދި އޭގެ ފަހުން ކުޅެން ގޮސް، މައިންބަފައިންނާއެކު އުފާވެރި ވަގުތުތަކެއް ހޭދަކުރާ މަންޒަރުތައް ދައްކުވައިދެއެވެ.

”ބިންމަތީގައި އުކާފައި ހުރި ކުނިވެސް ނަގައި ޑަސްބިނަށް ލީމެއްނު. މުޅި ތަނަށް ހުރީ ޕްލާސްޓިކްފުޅި އަޅާފައި. އައިއެމްއަ ބިޔުޓިފުލް ގާލް.“ ބަބުލްގެ ވީޑިޔޯ ނިންމާލަމުން ބުނެފައިވެއެވެ.

ބަބުލްގެ ވީޑިއޯ ހިއްސާކޮށް ކުރި ޕޯސްޓުގެ ކެޕްޝަންގައި ބެކަމް ބުނެފައިވާގޮތުން ދުނިޔޭގެ އެކި ހިސާބުތަކުގައި އުޅޭ ކުދިންނަށް ތައުލީމާއި، ރައްކާތެރިކަނަ ހޯދައިދިނުމަށް ޔުނިސެފުން ކުރާ މަސައްކަތްތަކަށް އޭނާ ތާއީދުކުރެއެވެ.

އަދި ބަބުލްގެ ވީޑިއޯ ހިއްސާކުރަން ބޭނުންވީ އެ ކުއްޖާގެ ވާހަކައިން ލިބުނު ހިތްވަރުން ކަމަށާ ބަބުލްގެ މެސެޖުން ހަނދާން ކޮށްދެނީ، ކިތަންމެ ކުޑަވިއަސް ކޮންމެ ކުއްޖެއްގެވެސް އަޑު އަހަންޖެހޭ ކަންކަމަށްވެސް ބުނެފައިވެއެވެ.