ރައީސް ޔާމީނަށް އަނިޔާ ލިބޭކަމަށްބުނެ، އިދިކޮޅުން އެޗްއާރުސީއެމްއަށް!

މަނީލޯންޑާގެ ކުށް ސާބިތުވެ، ބޮޑު ޖޫރިމަނާއަކާއެކު، ފަސް އަހަރަށް ޖަލަށް ލާފައިވާ ކުރީގެ ރައީސް އަބްދުﷲ ޔާމީން އަބްދުލްގައްޔޫމަށް އަނިޔާ ލިބެމުންދާކަމަށް ބުނެ، އިދިކޮޅު ކޯލިޝަނުން ހިއުމަން ރައިޓްސް އޮފް ދަ މޯލްޑިވްސް (އެޗްއާރުސީއެމް) އަށް މައްސަލަ ހުށަހަޅައިފިއެވެ.

އިދިކޮޅު ކޯލިޝަނުގެ ކައުންސިލުން ރޭ ޕީޕީއެމް އޮފީހުގައި ބޭއްވި ބައްދަލުވުމުގައި ވާހަކަ ދައްކަވަމުން ޕީއެންސީގެ ރައީސް އަބްދުއްރަހީމް އަބްދުﷲ ވިދާޅުވީ މާލޭ ޖަލުގައި ބަންދުގައި ހުންނެވި ރައީސް ޔާމީނަށް ނަފްސާނީ ގޮތުންނާއި ޖިސްމާނީ ގޮތުން އަނިޔާ ލިބެމުންދާ ކަމަށެވެ.

އެގޮތުން ބަންދުގައި ހުންނެވި ހަ ފޫޓުގެ ގޮޅީގައި ވައިބަންދުވެފައި ހުރުމާއި ފާޚާނާގައި ފުލަޝްކުރެވެން ނެތުމާއި ޓައްޕެއްގައި ފެން އުފުލަން ޖެހުމާއި ގޮޅީގައި އޮށޯވެ ނުލެވޭވަރުގެ ކުޑަ ދަގަނޑު އެނދެއް ހުރުމާއި އެޖަލަކީ ނުރައްކާތެރި ބޮޑެތި ކުށްވެރިން ތިބޭ ޖަލަކަށްވުން ހިމެނޭ ކަމަށް އަބްދުއްރަހީމް ވިދާޅުވިއެވެ.

އޭނާ ވިދާޅުވީ، މާލޭ ޖަލުގައި ތިބީ ތަފާތު ކުށްތަކުގައި ބަންދުކޮށްފައިވާ ނުރައްކާތެރި ކުށްވެރިން ކަމަށާއި ރައީސް ޔާމީން ޖަލު ބަންދަށް ވަޑައިގެންނެވުމާއެކު އެތަނުގައި ތިބި ކުށްވެރިން ޖެއްސުންކޮށް، އަޑުގަދަކުރަމުން ދިއުމުގެ ސަބަބުން އެމަނިކުފާނު އަވަހާރަފުޅު ލެއްޕެވުމަށް އުނދަގޫތަކަކާ ކުރިމަތިލާން ޖެހިވަޑައިގެންފައިވާ ކަމަށެވެ.

އެމައްސަލައިގައި ހޯމް މިނިސްޓަރު އިމްރާން އަބްދުﷲ އަށް ގުޅުމުން ފޯނަށް ޖަވާބު ނުދެއްވާ ކަމަށާއި އަދި ރައީސް ސޯލިހަށްވެސް ގުޅައި، އެސްއެމްއެސް ކުރުމުންވެސް ޖަވާބު ދެއްވާފައި ނުވާކަމަށް އަބްދުއްރަހީމް ވިދާޅުވިއެވެ.

އަބްދުއްރަހީމް ވިދާޅުވީ، ރައީސް ޔާމީނަށް ކޮށްފައިވާ ހުކުމަކީ ސިޔާސީ ހުކުމެއް ކަމަށާއި އެކަން ޝަރީއަތް ކުރިއަށް ގެންދިޔައިރުވެސް ރައްޔިތުންނަށް ވަރަށް ސާފުކޮށް ފެނިގެން ދިޔަ ކަމަށެވެ.