ކުދިންތަކަކަށް އަނިޔާކުރި މައްސަލަ: ހިސާންގެ މައްސަލަ ކުރިންވެސް ފުލުހަށް ހުށަހެޅިން: އަނަސް

ހިސާންގެ މައްސަލަ މީގެ ކުރިން ފުލުހަށް ވެސް ހުށަހެޅިކަމަށް ހިސާންގެ ފަރާތުން ގެވެށި އަނިޔާ ކުރިމަތިވި އަހުމަދު އަނަސް ބުނެފިއެވެ.

ރައީސުލްޖުމުހޫރިއްޔާ އިބްރާހިމް މުހައްމަދު ސާލިހަށް އެޑްރެސްކޮށް އަނަސް ލިޔެފައިވާ އެސިޓީގައި އޭނާގެ އިތުރުންވެސް ކުދިންތަކެއްގެ ނަންތައް ލިޔެފައިވެއެވެ.

އަހުމަދު އަނަސްއަކީ ހިސާންގެ ގޭގައި މީގެ ކުރިން ކިޔަވަން ހުރި ކުއްޖެކެވެ. އަނަސް ލިޔެފައިވާ ސިޓީގައި ބުނެފައިވަނީ ހިސާން އަކީ ހިސާންގެ ގޭގައި މީގެ އަހަރު ތަކެއް ކުރިން ކިޔަވަން ތިބި ކުދިންނަށް ލާއިންސާނީ އަނިޔާތަކެއް ދީފައިވާ މީހެއްކަމަށެވެ.

އެގޮތުން އެސިޓީގައި އޭނާ ވަނީ ހިސާންގެ ފަރާތުން ކުރިމަތިވި ކަންތައްތައް ތަކުގެ މައުލޫމާތުވެސް ހިއްސާކޮށްފައެވެ. އޭނާ ބުނެފައިވަނީ އެމީހުން އޭރު ދިރިއުޅެމުން ދިޔަ ކޮޓަރީގެ ފެނާއި ކަރަންޓް ހިސާން ކަނޑާލިކަމަށެވެ. އަދި އެމީހުން ނިދާފައި ތިއްބާ އެ ކޮޓަރީގެ ފެންލައިޓުން 4 އިންޗި 6 އިންޗީގެ އެޅިގަލެއްވެސް ކޮޓަރިތެރެއަށް އެއްލި ކަމަށް ތުހުމަތު ކޮށްފައިވެއެވެ.

ފެނާއި ކަރައްޓުގެ ޚިދުމަތް ކަނޑާލުމުގެ ސަބަބުން އެދުވަސްވަރު ގައިންތާހިރުވެ ހަދާފައިވަނީ ޕަބްލިކް އިސްކުރުތަކުން ހަންހަމުގައި ފެންގެނެސްގެންކަމަށްވެސް ބުނެފައިވެއެވެ. އަދި އަލިކުރުމަށް ބޭނުންކޮށްފައިވަނީ އުއްބައްތިކަމަށްވެސް އަނަސްގެ ސިޓީގައި ބުނެފައިވެއެވެ.

އަދި ކަނުއަދިރީގައި 15 ވަރަކަށް ދުވަހު ނިދާފައިވާނެ ކަމަށްވެސް އަނަސް ބުނެފައިވެއެވެ. އަދި އެ ކަންތައް އެއްމެ ރަނގަޅަށް އިނގޭނެ މީހަކު ހިސާންގެ ބައްޕަ ހުސައިން ޔޫސުފުކަމަށާއި، އަދި ހުސައިން ވަނީ އެގޮތަށް ކަންތައްތައް ނުކުރުމަށް ހިސާންއަށް ތަކުރާރުކޮށް ނަސޭހަތްތެރި ވެފައިކަމަށްވެސް އަނަސް ބުނެފައިވެއެވެ. އަދި ހިސާން އޭނާގެ ބައްޕަގެ ވާހަކަތައް އަޑު އެހުމެއްނެތި އެންމެ ފަހުން އަނަސްމެން ގެއިން ނެރެލާފައިވާކަމަށް އެ ސިޓީގައި ބުނެފައިވެއެވެ.

އަދި އޭނާ ވަނީ އެމްޑީޕީން ހިސާންއާއި މެދު ތިނަދޫ އުތުރުދާއިރާއަށް ކުރިމަތިލި މުޣުނީއާއި މެދު އަމަލު ކުރި ފަދައިން އަމަލުކުރާނެ ކަމަށް އުއްމީދު ކުރާ ކަމަށް ބުނެފައެވެ.

އަދި އެ މައްސަލައަކީ މީގެ ކުރިން ފުލުހުންނަށްވެސް ހުށަހެޅި މައްސަލައެއް ކަމަށާއި، އަދި އެ މައްސަލައިގައި ހިސާންގެ އެއްހާޒިރުގައި ހެކިބަސްދޭންވެސް ތައްޔާރަށް ހުރި ކަމަށް އަނަސް ބުނެފައިވެއެވެ.

ހިސާން އާއި މެދު އެފަދަ ތުހުމަތުތަކެއް އަނަސްކުރި ނަމަވެސް އެމްޑީޕީން އަދި އެކަމާއި މެދު ގޮތެއް ނިންމާފައި ނުވެއެވެ. އަދި ހިސާން އަށް އެފަދަ ތުުހުމަތުތަކެއް ކުރެވުމާއެކު ކުރީގެ ރައީސް ނަޝީދު ވަނީ އޭނާގެ ދިފާއުގައި ނިކުންނަވާފައެވެ.