ހުއްދައެއް ނެތި ވިޔަފާރި އުސޫލުން ރޮށި ފިހެ ވިއްކަމުންދިޔަ ތަނެއް ބަންދުކޮށްފި

އެއްވެސް ހުއްދައެއް ނެތި ވިޔަފާރި އުސޫލުން ރޮށި ފިހެ ވިއްކަމުންދިޔަ ތަނަކާއި، ގަވާއިދާ ހިލާފަށް ހިންގަމުންދިޔަ ފިހާރައެއް ބަންދުކޮށް ޖުމްލަ 15 ބިދޭސީއަކު ކަމާބެހޭ އިދާރާތަކުގެ ބެލުމުގެ ދަށަށް ގެންގޮސްފިއެވެ.

މި ތަންތަން ބަލައި ފާސްކޮށްފައިވަނީ އިއްޔެ ދިވެހި ފުލުހުންގެ ޚިދުމަތާއި، މޯލްޑިވްސް އިމިގްރޭޝަން އަދި މިނިސްޓްރީ އޮފް އިކޮނޮމިކް ޑިވެލޮޕްމަންޓް ގުޅިގެން މާލޭގައި ކުރިއަށް ގެންދިޔަ ޖޮއިންޓް އިންސްޕެކްޝަނެއްގައެވެ. މި އޮޕަރޭޝަނުގެ ތެރެއިން ބިދޭސީން ދިރިއުޅޭ ދެ ތަނެއް ބަލައި ފާސްކޮށްފައިވެއެވެ.

މި އިންސްޕެކްޝަނުގެ ތެރެއިން ބަލައި ފާސްކުރި އެއް ތަނަކީ އެއްވެސް ހުއްދައެއް ނެތި، ސިއްހީ މިންގަނޑުތަކާ މެދު ސުވާލު އުފެދޭ ފަދަ ގޮތަކަށް ވިޔަފާރި އުސޫލުން ރޮށި ފިހެ ވިއްކަމުންދިޔަ ތަނެކެވެ. ފުލުހުން ވަނީ އެ ތަނުގައި ކުރަމުންދިޔަ މަސައްކަތްތައް ވަގުތުން ހުއްޓުވާފައެވެ.

މީގެ އިތުރުން، ބަލައި ފާސްކުރި ދެވަނަ ތަނަކީ ގަވާއިދާ ހިލާފަށް ފިހާރައެއް ހިންގައި، މުދާ ވިއްކަމުންދިޔަ ތަނެއްކަން ފާހަގަކުރެވިފައިވާ ކަމަށް ފުލުހުން ބުނެއެވެ.

އިކޮނޮމިކް މިނިސްޓްރީން މިހާރު ވަނީ މި ދެ ތަންވެސް ބަންދުކޮށްފައެވެ. އަދި މި އިންސްޕެކްޝަންތަކަށްފަހު، އެ ތަންތަނުގައި މަސައްކަތް ކުރަމުންދިޔަ އަދި ގަވާއިދާ ހިލާފަށް އުޅެމުންދިޔަ ޖުމްލަ 15 ބިދޭސީ ފިރިހެނުން ވަނީ މޯލްޑިވްސް އިމިގްރޭޝަންގެ ބެލުމުގެ ދަށަށް ގެންގޮސްފައެވެ.

މި ސަރުކާރުން އަންނަނީ ރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށާއި، ހުއްދައެއް ނެތި ބިދޭސީން ކުރަމުންދާ ވިޔަފާރިތައް ހުއްޓުވުމަށް ހާއްސަ މަސައްކަތްތަކެއް ކުރަމުންނެވެ.