އެމްއެންޔޫ ފުޓްސަލް މުބާރާތުގެ ވުމެންސް ސެމީއަށް އެމްބީއެސް، އެފްއެޗްއެސް، ވިލާ އަދި މެއިންޒް ކޮލެޖް

ދިރާގް އެމްއެންޔޫއެސްޔޫ ފުޓްސަލް ފިއެސްޓާގެ ވުމެންސް ސެމީގެ ޖާގަ ބިޒްނަސް ސްކޫލް، އެފްއެޗްއެސް، ވިލާ އަދި މެއިންޒް ކޮލެޖް ހޯދައިފިއެވެ.

ކުއާޓާ ފައިނަލުގައި މޯލްޑިވްސް ބިޒްނަސް ސްކޫލް ނިކުތީ، ޤައުމީ ޔުނިވަރސިޓީގެ ބިޒްނަސް ސްކޫލާ ދެކޮޅަށެވެ. މިމެޗް މޯލްޑިވްސް ބިޒްނަސް ސްކޫލް ކާމިޔާބުކުރީ 5-1 ގެ ނަތީޖާއަކުންނެވެ. މެޗްގައި އެންމެ ފުރަތަމަ ލަނޑެއް ޖަހައި ކުރި ހޯދީވެސް އެމްބީއެސްއިން ނެވެ. އެއީ 13 ވަނަ މިނެޓް ތެރޭގައި މަރިޔަމް މަލާކް ކާމިޔާބުކޮށްދިން ލަނޑުންނެވެ.

އެމްބީއެސްގެ ދެވަނަ ލަނޑަކީ އިދިކޮޅު ޓީމުގެ ކުޅުންތެރިއެއްގެ އަތުން ބައިކޮޅަށްވަތް ލަނޑެކެވެ. މެޗްގައި ދެން އެމްބީއެސްއަށް ލަނޑުތައް ކާމިޔާބުކޮށްދިނީ، މަލާކްގެ އިތުރުން ޝައިނާއެވެ. މެޗްގައި މަލާކް ވަނީ ތިން ލަނޑު ޖަހައި ހެޓްރިކް ހަދާފައެވެ. މެޗްގެ މޮޅު ކުޅުންތެރިޔާގެ މަގާމުވެސް ހޯދީ މަލާކް އެވެ.

ކުއާޓާ ފައިނަލުގެ ދެވަނަ މެޗްގައި ވިލާ ކޮލެޖް ނިކުތީ، ފެކަލްޓީ އޮފް ހޮސްޕިޓާލިޓީ އެންޑް ޓޫރިޒަމް ސްޓަޑީޒްއާ ދެކޮޅަށެވެ.މިމެޗް ވިލާއިން ކާމިޔާބުކުރީ 7-1 ގެ ތަފާތުބޮޑު ނަތީޖާއަކުންނެވެ. މެޗްގައި ވިލާގެ މަލްޝާ ހަތަރު ލަނޑު ކާމިޔާބުކުރިއިރު، އެޓީމްގެ ނިހާމާ ވަނީ ދެ ލަނޑު ޖަހާފައެވެ. އަދި މަނާލްވެސް ވަނީ ގޯލެއް ޖަހާފައެވެ. މެޗްގެ މޮޅުކުޅުންތެރިޔާގެ މަގާމް ހޯދީ ހަތަރު ލަނޑު ޖެހި މަލްޝާ އެވެ.

ކުއާޓާ ފައިނަލުގެ ތިންވަނަ މެޗްގައި ފެކަލްޓީ އޮފް ހެލްތު ސައިންސް އާއި ޝަރިއާ އެންޑް ލޯ ބައްދަލުކުރިމެޗް ހެލްތު ސައިންސް ކަމިޔާބުކުރީ 3-1 ގެ ނަތީޖާއަކުންނެވެ. މެޗްގައި ހެލްތު ސައިންސްގެ ޓީމަށް ގޯލްތައް ޖަހައިދިނީ، މާނިއާ އަދި ސަފާ އެވެ. މެޗްގައި މާނިއާ ވަނީ ދެ ލަނޑު ޖަހާފައެވެ. ޝަރިއާ އެންޑް ލޯގެ ޓީމަށް ސުންކަނޑުވާލަދިނީ ހައިފާ އެވެ. މޮޅު ކުޅުންތެރިޔާގެ މަގާމް ހޯދާފައިވަނީ، ޝަފާނާ އެވެ.

ރޭ މެއިންޒުން ސެމީގެ ޖާގަ ކަށަވަރުކުރީ ސެންޓަރ ފޯ ފައުންޑޭޝަން ސްޓަޑީޒް އާ ދެކޮޅަށް ކުޅުނުމެޗް 1-0 ގެ ނަތީޖާއަކުން ކާމިޔާބުކޮށްގެންނެވެ. މެޗްގައި ފެނިގެންދިޔަ ހަމައެކަނި ލަނޑު ކާމިޔާބުކޮށްދިނީ، ސަލްމާއެވެ. މެޗްގެ މޮޅު ކުޅުންތެރިޔާގެ މަގާމް ހޯދީ މެއިންޒްގެ ޝާހާއެވެ.