އޮގަސްޓް މަހާ އަޅާބަލާއިރު ސެޕްޓެމްބަރު މަހު ފުލުހަށް ރިޕޯޓް ކުރެވުނު ކުށްތައް ދަށަށް!

އޮގަސްޓް މަހާ އަޅާބަލާއިރު ސެޕްޓެމްބަރު މަހު ރާއްޖޭގައި ހިނގާފައިވާ ކުށުގެ މައްސަލަތައް މަދުވެއްޖެއެވެ.

އޮކްޓޯބަރ އަދި ސެޕްޓެމްބަރ މަހުގެ ކުށުގެ ރިޕޯޓްތަކުގެ ތަފާސް ހިސާބުތައް ހިއްސާ ކުރައްވައި ފުލުހުންގެ ތަރުޖަމާނު އަހުމަދު ޝިފާން އެކްސްގައި ކުރެއްވު ޕޯސްޓެއްގައި ވާގޮތުން، އޮގަސްޓް މަހު ވައްކަމުގެ 327 މައްސަލަ ރިޕޯޓުކުރެވުނު އިރު، ސެޕްޓެމްބަރު މަހު މި އަދަދު ވަނީ 230 އަށް ދަށްވެފައެވެ.

ހަމައެހެންމެ، ޓްރެފިކް އެކްސިޑެންޓްތައް 204 އިން 143 އަށް ދަށްވެފައިވާއިރު، ފޭރުމުގެ މައްސަލަތައް 46 އިން 32 އަށް ދަށްވެފައިވެއެވެ.

މީގެއިތުރުން، މަސްތުވާތަކެތީގެ މައްސަލަތައް 134 އިން 111 އަށް ދަށްވެފައިވާއިރު، ގެވެށި އަނިޔާގެ މައްސަލަތައް 31 އިން 11 އަށް، އަދި ޖިންސީ ގޯނާގެ މައްސަލަތައް 43 އިން 12 އަށް ދަށްވެފައިވާކަން ފާހަގަކުރެވެއެވެ.

މި ތަފާސްހިސާބުތަކުން ދައްކާގޮތުގައި ރާއްޖޭގައި ވައްކަން، ފޭރުން އަދި ޖުމުލަކޮށް ކުށްކުރުން ވަނީ މަދުވެފައެވެ.

ފުލުހުންގެ ސްޓްރެޓެޖިކް ޕްލޭންގެ ދަށުން ތަޢާރަފުކޮށްފައިވާ ލޯކަލް ފްރަންޓްލައިން ޕޮލިސިންގގެ އައު އިސްނެގުންތަކުގެ ސަބަބުން މި ހެޔޮ ބަދަލުތައް އައިސްފައިވާކަމަށް ޝިފާން ވަނީ ފާހަގަކުރައްވާފައެވެ.