އިމާރާތަކުން އަންހެނަކު ވެއްޓުން: އެމްޑީޕީން ބުނީ ތަހުގީގު ގެންދަނީ އުސޫލުން ބޭރުން ކަމަށް

މާލޭގެ ގެއެއްގެ ފުރާޅުމައްޗަށް އަންހެނަކު ވެއްޓުނު ހާދިސާއާ ގުޅޭ ތަހުގީގު ކުރިއަށް ގެންދަނީ އުސޫލުން ބޭރުން ކަމަށް ބުނެ އިދިކޮޅު މައި ޕާޓީ އެމްޑީޕީން ކަންބޮޑުވުން ފާޅުކޮށްފި އެވެ.

އެމްޑީޕީން ނެރުނު ބަޔާނެއްގައި ބުނެފައި ވަނީ މި ހާދިސާއާ ގުޅިގެން ރޭ ބޭއްވި ސިއްރު ނޫސްވެރީންގެ ބައްދަލްވުމުގައި އަނިޔާ ލިބުނު ޒުވާނާގެ މައުލޫމާތު ހާމަކޮށްފައިވަނީ ޒިންމާދާރުކަން ކުޑަކޮށް ކަމަށާ އެއީ އިންސާފު ލިބުމަށް އޮތް ހުރަހެއް ކަމަށެވެ.

އަދި މި ހާދިސާގެ ތަހުގީގު ކުރިއަށް ގެންދާއިރު މީގެ ކުރީން އަމަލުކޮށްފައިވާ ބައެއް އުސޫލުތަކާއި ހިލާފަށް އަމަލު ކުރަމުންދާކަން އާއިލާ އިން ފާހަގަކޮށްފައިވާތީ ކަންބޮޑުވާ ކަމަށެވެ. މި ހާދިސާގެ ތަހުގީގުައި އާންމު އުސޫލުގެ ބޭރުން ހާއްސަ ގޮތަކުން ފުލުހުން އަމަލު ކުތަމުންދާ ކަމުގެ ތުހުމަތު އަމާޒުވެފައިވާއިރު މިނިވަން ތަހުގީގެއް ހިންގަން ވަނީ ގޮވާލާފަ އެވެ.

"ވަކިވަކި ފަރުދުންގެ ހަށިގަނޑާއި ފުރާނަ އާއި މިނިވަންކަމާއި ހައްގުތައް ރައްކާތެރި ކުރުމަށް ގާނޫނު އަސާސީ އާއި ގާނޫނުތަކުން ފުލުހުންގެ މައްޗަށް މަތިކޮށްފައިވާ ޒިންމާ އަދާކުރުމަށް މި ފުރުސަތުގަައި އެމްޑީޕީން ފުލުހުންނަށް ހަނދުމަކޮށް އަރުވަމެވެ," އެމްޑީޕީން މިރޭ ނެރުނު ބަޔާނުގައިވެ އެވެ.

މާލޭގެ ގެއެއްގެ ފުރާޅުމައްޗަށް އަންހެނަކު ވެއްޓުނު ހާދިސާއާ ގުޅޭ މުހިންމު ބައެއް މައުލޫމާތު ނޫސްވެރީންނާއި ހިއްސާކޮށް އެ ހާދިސާއާ ގުޅޭ ބައެއް މަންޒަރުތައް ރޭ ނޫސްވެރީންނަށް ވަނީ ދައްކާލާފަ އެވެ.

ނޫސްވެރީންނަށް މި މައުލޫމާތު ހިއްސާކޮށް ހާދިސާގެ ބައެއް މަންޒަރުތައް ހިއްސާކުރީ އިސްކަންދަރު ކޮށީގައި ރޭ އޮތް ބައްދަލްވުމެއްގަ އެވެ. މި ބައްދަލްވުމުގައި ފުލުހުން ފާހަގަކުރި ގޮތުގައި މި ހާދިސާގައި ހިމެނޭ އަންހެން މީހާއާ އޭނާއާއެކު އެ ރޭ އުޅުނު ފިރިހެން މީހާ މަސްތުވާތަކެއްޗަށް ވަނީ ޕޮޒިޓިވްވެފަ އެވެ. ފިރިހެން މީހާ ޕޮޒިޓިވްވީ މަސްތުވާތަކެތީގެ ބާވަތެއް ކަމަށްވާ ކެނެބިސްއަށެވެ.

އަންހެން މީހާ ވެއްޓުނު ހާދިސާ ހިނގީ އެރޭ ދަންވަރު 4:30 އާއި 5:00 އާ ދެމެދު އެވެ. ފުލުހުން ބުނާ ގޮތުގައި އަންހެން މީހާ ވައްޓާލި ކަމުގެ އެއްވެސް ހެއްކެތް ލިބިފައެއް ނުވެ އެވެ.

މި ހާދިސާގައި ފުރާޅު މައްޗަށް ވެއްޓިފައި ވަނީ އުމުރުން 21 އަހަރުގެ އަންހެނެކެވެ. ފުލުހުން ވަނީ އެ އަންހެން މީހާގެ ނަން ވެސް ހާމަކޮށްފަ އެވެ. އަންހެން މީހާގެ ނަމަކީ ހައްވާ ޔުމްނާ އެވެ.

އަންހެން މީހާ ފުރާޅު މައްޗަށް ވެއްޓިފައި އޮތްކަން ފުލުހަށް ރިޕޯޓް ކުރީ އާންމުންގެ މީހެކެވެ. އެ ރިޕޯޓް ލިބިފައި ވަނީ މި މަހުގެ 18 ވަނަ ދުވަހުގެ ހެނދުނު 7:23 ގައެވެ. އެމްއެންޑީއެފްގެ ރެސްކިއު ޓީމުގެ އެހީތެރިކަމާއެކު އަންހެން މީހާ ނެގިއިރު ވެސް ހަރަކާތް ހުރި ކަމަށް ފުލުހުން ބުނެ އެވެ.

އެއީ ކާކުކަން ދެނެގަތީ ފޭސް ރެކޮގްނިޝަން މެދުވެރިކޮށެވެ. ފުލުހަށް ހާދިސާގެ ރިޕޯޓް ލިބުނުތާ 30-45 މިނެޓާ ދެމެދު އެއީ ކާކުކަން ދެނެގެންފައިވެ އެވެ.