އަސްކޮއި ގުރޫޕަށް އަދަބު ދީފި، 130،000 ރުފިޔާގެ ޖޫރިމަނާއެއް

މިދިޔަ ރޯދަ މަހު އުމްރާގެ އަޅުކަން އަދާކުރުމަށް ފައިސާ ދެއްކި ބަޔަކު އުމްރާއަށް ގެންދަން ދެކޮޅު ހެދި އަސްކޮއި ގުރޫޕުގެ މައްސަލަ ބަލާ ފިޔަވަޅު އަޅައިފި އެވެ.

އިސްލާމިކް މިނިސްޓްރީން ބުނީ ފައިސާ ދެއްކި ނުވަ މީހުންނަށް އެ މީހުން ދެއްކި ފައިސާ އަނބުރާ ދީ 130،000 ރުފިޔާ އިން އެ ގުރޫޕް ޖޫރިމަނާ ކޮށްފައިވާ ކަމަށެވެ.

އެ ފައިސާ މަސް ދުވަހުގެ ތެރޭގައި ދައްކަން ވެސް ވަނީ އަންގާފަ އެވެ.

އަސްކޮއިގެ ހަވާލުގައި ރަމަޟާން މަހުގެ ފަހު 15 ގައި އުމްރާއަށް ދިޔުމަށް އާއިލާ އަކުން ފައިސާ ދައްކާފައި ވަނިކޮށް، އެ ދަތުރު ނުކުރެވޭނެ ކަމަށް އަސްކޮއިން ބުނެފައިވާ ކަމަށް ބުނެ އެ އާއިލާއިން ވަނީ މީސްމީޑިއާގައި ކަންބޮޑުވުން ފާޅުކޮށްފައެވެ.

އެ އާއިލާއިން ބުނި ގޮތުގައި، އެ މީހުން ވަނީ މިދިޔަ އޮގަސްޓް މަހުން ފެށިގެން، މީހަކަށް 42،000ރ.ގެ މަގުން އުމްރާގެ އަގު އަދާކޮށް ނިންމާފަ އެވެ. އެ ފައިސާ އަނބުރާ ދެއްކޭނީ ވެސް އަންނަ މަހު 15ގެ ފަހުން ކަމަށް ގުރޫޕުން ބުނެފައިވާ ކަމަށް އެ އާއިލާއިން ބުނެފައިވެއެވެ.

އެކަން ސަމާލުކަމަށް އައުމާއެކު އެކަން ބަލާ ފިޔަވަޅު އަޅާނެ ކަމަށް މިނިސްޓަރު ޝަހީމް ވަނީ ވިދާޅުވެފަ އެވެ.