މިމަހުގެ ތެރޭގައި އައިޖީއެމްއެޗްގައި އައިނު ފިހާރަ ހުޅުވައި ޚިދުމަތް ދޭން ފެށޭނެ: ޙަލީމް

އިންދިރާ ގާނދީ މެމޯރިއަލް ހޮސްޕިޓަލް، އައިޖީއެމްއެޗްގައި މިމަހުގެ ތެރޭގައި އައިނު ފިހާރަ ހުޅުވައި ޚިދުމަތް ދޭން ފަށާނެކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް ވިދާޅުވެއްޖެއެވެ.

އައިނު ހެއްދުމަށް އާސަންދައިން ދޭ އަދަދު ބޮޑުކޮށް، ކުރިއަށްއޮތް ތަނުގައި އޭގެ ނާޖާއިޒްފައިދާ އަމިއްލަ ކުންފުނިތަކުން ނެގިޔަ ނުދިނުމަށް، އައިނު ހެއްދުމުގެ ހިދުމަތް ސަރުކާރު ހޮސްޕިޓަލްތަކުން ލިބޭނޭ އިންތިޒާމް ހަމަޖައްސަވާނޭކަމަށް ރައީސް ޑރ މުޙައްމަދު މުޢިއްޒު ވަނީ މެއި މަހު އިއުލާން ކުރައްވާފައެވެ.

އެކަމާ ގުޅޭގޮތުން، ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަދައްކަވަމުން ސީއީއޯ ޙަލީމް ވިދާޅުވީ، އައިނު ހެދުމުގެ ޚިދުމަތަށް މިހާރުވެސް ދައުލަތުން ބޮޑު ޚަރަދެއް ކުރަމުންދާ ކަމަށެވެ. އެކަން ކުރަމުންދިޔައީ ޕްރައިވެޓް ކުންފުނިތަކުން ކަމަށާ، އަދިވެސް އެ ކުންފުނިތަކަށް އެކަން ކުރެވޭނެ ކަމަށް އޭނާ ވިދާޅުވިއެވެ.

ޙަލީމް ވިދާޅުވީ ސަރުކާރުން އައިނު ހެދުމުގެ ޚިދުމަތް ދޭން ނިންމާފައިވަނީ ވިޔަފާރިއެއްގެ ގޮތަށް ނޫން ކަމަށާ، އެހެނެއް ކަމަކު އެ ޚުދުމަތަށް އާސަންދައިން ކަނޑައަޅާފައިވާ މިންވަރުގެ ތެރެއިން އެ ޚިދުމަތް ފޯރުކޮށްދިނުމަށް ކަމަށެވެ.

ރައްޔިތުންނަށް ސަރުކާރުން ކަނޑައަޅާފައިވާ އަދަދުގެ ތެރެއިން، ހިލޭ އައިނު ލިބޭނެ ގޮތެއް މި ހަދައިދެނީ. ފެންވަރު ރަނގަޅު އައިނު.

މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް

އެގޮތުން ފުރަތަމަ އައިނު ފިހާރަ ހުޅުވާނީ އައިޖީއެމްއެޗްގައި ކަމަށާ، ކައިރި މިސްތަގުބަލެއްގައި ހުޅުމާލޭ ހޮސްޕިޓަލުގައިވެސް އައިނު ފިހާރަ ހުޅުވިގެންދާނެ ކަމަށް ހަލީމް ވިދާޅުވިއެވެ. އެފަހުން، ކުރިއަށް އޮތް ތަނުގައި ރީޖަނަލް ހޮސްޕިޓަލް ތަކުގައިވެސް އައިނު ފިހާރަތައް ހުޅުވިގެންދާނެކަން އޭނާ ފާހަގަކުރެއްވިއެވެ.

"އަޅުގަނޑުމެން މަސައްކަތް ކުރަމުން މިދަނީ މިމަހުގެ ތެރޭގައި އައިޖީއެމްއެޗްގައި އައިނު ފިހާރައެއް ހުޅުވުމަށް. އަދި ކުރިއަށް އޮތްތަނުގައި ހުޅުމާލޭ ހޮސްޕިޓަލުގައިވެސް އައިނު ފިހާރައެއް ހުޅުވިގެންދާނެ."

މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް ޢަބްދުއްރައްޒާޤް ޙަލީމް

ރައްޔިތުން ބޮޑުއަގުގައި ނަމްބަރުއައިނު ހައްދަމުންގެންދާ މައްސަލަ ހައްލު ކުރުމަށް އާސަންދައިގެ ފަރާތުން ކަވަރ ކޮށްދެމުން އަންނަ 1،000 ރުފިޔާގެ އަދަދު 2،000 ރުފިޔާއަށް ބޮޑުކުރަން ސަރުކާރުން ވަނީ ނިންމާފައެވެ.

އާސަންދައިގެ ތަފާސްހިސާބުތަކަށް ބަލާއިރު ނިމިދިޔަ 2024 ވަނަ އަހަރުގެ ތެރޭގައި އައިނު ހެއްދުމަށް 36000 އަށްވުރެ ގިނަ މީހުންނަށް އާސަންދައިގެ ތެރެއިން 36 މިލިއަނަށްވުރެ ގިނަ ރުފިޔާވަނީ ދޫކޮށްފައެވެ.