ޔޯގާ ކުލާސްތަކާއި ޕުރޮގުރާމުތައް ނުހިންގުމަށް އިލްމުވެރީންގެ ގުޅުމުން ގޮވާލައިފި

ޔޯގާ ކުލާސްތަކާއި ޕުރޮގުރާމުތައް ހިންގުމާއި އެފަދަ ކަންކަމަށް ހިތްވަރު ދިނުމުގެ އެއްވެސް ޢަމަލެއް ނުކުރުމަށް އިލްމުވެރީންގެ ގުޅުމުން ދިވެހި ރައްޔިތުންނަށް ގޮވާލާ ނަސޭހަތްތެރިވެއްޖެ އެވެ.

ރާއްޖޭގެ ވަރަށް ގިނަ ދީނީ އިލްމުވެރީންގެ ބައިވެރިވުން އިލްމުވެރީންގެ ގުޅުމުން މިފަދަ ބަޔާނެއް ނެރުނީ ޔޯގާ ކުލާސްތަކާއި ޕުރޮގުރާމުތައް ހިންގަން ހާއްސަ ތަނެއް ހުޅުވުމާއި ގުޅިގެން އެކަމުގެ ކަންބޮޑުވުން އާންމުން ފާޅުކުރަމުންދާ ދަނޑިވަޅެއްގަ އެވެ.

އިލްމުވެރީންގެ ގުޅުމުގެ ބަޔާނުގައި ބުނީ ޔޯގާގެ ހަގީގަތާއި އޭގެ ހުކުމަކީ ކޮބައިކަން ބެލުމަށް ޓަކައި ރާއްޖޭގެ ޢިލްމުވެރިންގެ ފަރާތުން ކޮށްފައިވާ ދިރާސާއިން އެނގެން އޮތްގޮތުގައި، ޔޯގާއަކީ އޭގެ ޒާތުގައި ހިންދޫދީނުގެ އަޅުކަމެއް ކަމަށެވެ. އަދި އެއީ ޝިރުކުގެ އަމަލެއް ކަމަށެވެ.

ކަސްރަތުގެ ގޮތުގައި، ނުވަތަ އެނޫން ގޮތަކަށް ވެސް ޔޯގާ ހެދުމަކީ ޙަރާމް ކަމެއް ކަމަާއި އެކަމާ ގުޅޭ ދިރާސާއިން ހާމަވީ ކަންކަމާ މެދުގައި ދިވެހިރާއްޖޭގެ 104 އިލްމުވެރިން އެއްބަސްވެވަޑައިގެން އެކަން ބަޔާންކޮށްދިނުމުގެ ގޮތުން އިލްމުވެރިންގެ ގުޅުމުގެ ފަރާތުން އެކަން އާންމުކޮށްފައިވާކަން ވެސް ފާހަގަކޮށްފައިވެ އެވެ.

އަދި އޭގެ އިތުރުން، ޔޯގާގެ ހަރަކާތްތައް ހުއްޓުވައި ދިނުމަށް އެދި، މިނިސްޓްރީ އޮފް އިސްލާމިކް އެފެއާޒާއި ދިވެހި ފުލުހުންގެ ޚިދުމަތަށް ފޮނުއްވާފައިވާ، ސިޓީގައި ވެސް ޔޯގާއަކީ އިސްލާމީ ޝަރިއަތާ ޚިލާފު ކަމެއްކަމާއި ޙަރާމް ކަމެއްކަން ބަޔާން ކޮށްފައިވާނެ ކަން އެ ގުޅުމުން ވަނީ ފާހަގަކޮށްފަ އެވެ.

"...އިސްވެ ދެންނެވުނު ފަދައިން ޝިރުކުގެ އަމަލެއް ކަމުގައިވާ ޔޯގާއާ ގުޅޭ އެއްވެސް ކަމެއްގައި އެއްވެސް މިންވަރަކަށް ބައިވެރި ނުވުމަށް ލޮބުވެތި އަޚުންނާއި އުޚްތުންނަށް ނަޞޭޙަތްތެރިވަމެވެ. އެހެނީ، ޝިރުކުގެ ޢަމަލުތަކަކީ އިންސާނަކަށް ކުރެވޭނެ އެންމެ ބޮޑު ފާފައެވެ. އަދި އެއީ އެކަމުން ތައުބާ ނުވެވި އެކަމުގެ މަތީގައި ހުއްޓައި މަރުވެއްޖެ ނަމަ ނުފުއްސަވާނެ ފާފައެކެވެ. މީގެ އިތުރުން ޝިރުކުގެ ނުރައްކާތެރި ކަމަކީ، އޭގެ ސަބަބުން މީހާ ކޮށްފައިވާ އެހެނިހެން ހެޔޮ ޢަމަލުތައް ބާޠިލުކޮށްލާ ކަމެކެވެ," އެކަމުގެ ދަލީލް ބަޔާންކޮށް އިލްމުވެރީންގެ ގުޅުމުން ނެރުނު ބަޔާނުގައިވެ އެވެ.

އެހެން ކަމުން ޔޯގާ ކުލާސްތަކާއި ޕުރޮގުރާމުތައް ހިންގުމާއި އެފަދަ ކަންކަމަށް ހިތްވަރު ދިނުމުގެ އެއްވެސް ޢަމަލެއް ނުކުރުމަށް ނަސޭހަތްތެރިވެ އެފަދަ ކަންކަން ދިވެހި ދައުލަތުގެ ތެރޭގައި އާލާވުމާއި ދެމިއޮތުން ހުއްޓުވުމަށާއި މިފަދަ ކަންކަމާ މެދު ޢިލްމުވެރިންގެ ފަރާތުން ތަކުރާރުކޮށް ދަންނަވަން ނުޖެހޭނެ ފަދަ ގޮތަކަށް ދައުލަތުގެ ހިންގުމުގެ ކަންކަން ތަރުތީބު ކުރުމަށް ދިވެހި ދައުލަތުގެ ވެރިންނަށާއި ކަމާބެހޭ ހުރިހައި މުއައްސަސާތަކަށް ވަނީ ނަސޭހަތްތެރިވެފަ އެވެ.

އަދި ދިވެހިންގެ އިސްލާމީ ވަންތަ ރިވެތި ސަގާފަތާއި އާދަކާދަތަކާ ބީރައްޓެހި މިފަދަކަންކަން ދިވެހި މުޖުތަމައަށް އަންނަ ކޮންމެ ފަހަރަކު ދީނީ ގޮތުން އެކަންކަމުގެ ހުކުމަކީ ކޮބައިތޯ ބަލާ، ސާފުކޮށް ދުރާލައި ރައްޔިތުންނަށް ބަޔާން ދިނުމަށް ކަމާ ގުޅުން ހުރި މުއައްސަސާތަކަށް ވަނީ އިލްތިމާސް ކޮށްފަ އެވެ.