ދެ އިންތިހާބު އެއް ދުވަހެއްގައި ބޭއްވުމުން އިންތިހާބީ ހައްގަކަށް އުނިކަމެއް ނާންނާނެ: ޝާހީން

ދެ އިންތިހާބު އެއް ދުވަހެއްގައި ބޭއްވުމުގެ ސަބަބުން އިންތިހާބީ ހައްގަކަށް އެއްވެސް އުނިކަމެއް ނާންނަ ކަމަށާއި ޤާނޫނުއަސާސީގެ އޮނިގަނޑަށް ބަދަލެއް ނާންނާނެ ކަމަށް ތަޖުރިބާކާރު ގާނޫނީ ވަކީލު ޝާހީން ހަމީދު ވިދާޅުވެއްޖެއެވެ.

ޝާހީން މިހެން ވިދާޅުވެފައިވަނީ، ޤާނުނީ އަދި ދުސްތޫރީ ނަޒަރަކުން ރައްޔިތުންގެ ހިޔާލު ހޯދުމުގެ އާންމު ވޯޓާއި ޤާނޫނުއަސާސީއަށް އިސްލާހު ގެނައުމުގެ ބިލާއި ބެހޭ ގޮތުން ބާ ކައުންސިލުން ބޭއްވި ފޯރަމްގައި ވާހަކަދައްކަވަމުންނެވެ.

އެގޮތުން، ރިޔާސީ އިންތިޚާބާއި ރައްޔިތުންގެ މަޖިލީހުގެ އިންތިޚާބު އެއް ދުވަހެއްގައި ބޭއްވުމުން ޤާނޫނުއަސާސީގެ ރޫހަށް އުނިކަމެއް އަތުވެދާނެތޯ ކުރެވޭ ސުވާލުތަކަށް އޭނާ ވަނީ ޖަވާބު ދެއްވާފައެވެ.

ޝަހީން ވިދާޅުވި ގޮތުގައި، ދެ އިންތިޚާބު އެއްކޮށް ބޭއްވުމަކީ ރައްޔިތުންނަށް ލިބިދޭ ވޯޓުލުމުގެ ހައްޤަށް އުނިކަމެއް އަންނާނެ ކަމެއް ނޫނެވެ. އިންތިޚާބުތައް ވަކިން ބޭއްވުމަކީ އިސްލާހުގެ މަސައްކަތެއްގެ ގޮތުގައި ފެނުނު ނަމަވެސް، އެއް ދުވަހެއްގައި ވޯޓުލުމުން ވެސް ރައްޔިތުންގެ ބަސް އިއްވުމުގެ ފުރުސަތު ފުރިހަމައަށް އޮންނާނެކަން އޭނާ ފާހަގަކުރެއްވިއެވެ.

ދެ އިންތިޚާބު އެއްކޮށްލަނީއެއް ނޫން، ދެ އިންތިޚާބު އެއްދުވަހެއްގައި ބޭއްވިޔަސް އިންތިޚާބު ކުރުމަށް، ވޯޓުލުމުގެ ހައްޤު ހަމަ އެ ލިބޭ ވޯޓެއް އެ ލިބޭ ގޮތަކަށް އޮތީ

ޝާހީން ވިދާޅުވިއެެވެ.

މީގެ އިތުރުން، ޝާހީން ވަނީ ޤާނޫނުއަސާސީ އެކުލަވާލެވުނު އިރު އިންތިޚާބުތަކުގެ މެދުގައި އޮންނަ މުއްދަތަށް އައިސްފައިވާ ބަދަލުތަކަށް އަލިއަޅުއްވާލައްވާފައެވެ. ކުރިން ތިން މަސް ދުވަހުގެ މުއްދަތެއް އޮތް ނަމަވެސް، މިހާރު އެ މުއްދަތު ހަ މަސް ދުވަހަށް ދިގުވެފައިވާކަން އޭނާ ފާހަގަކުރެއްވިއެވެ. ނަމަވެސް، މި މުއްދަތަށް ބަދަލު އައުމަކީ ޤާނޫނުއަސާސީގެ އަސާސީ ސިފަތަކަށް ބަދަލު އަންނާނެ ކަމެއް ނޫން ކަމަށް އޭނާ ވިދާޅުވިއެވެ.

އިންތިޚާބެއް އެއްދުވަހަކު ބޭއްވުމުގެ ސަބަބުން ޤާނޫނުއަސާސީގެ އޮނިގަނޑަށް މާބޮޑު އުނިކަމެއް އަތުވެދާނެ ކަމަކަށް އަޅުގަނޑަކަށް ނުފެނޭ

ޝާހީންގެ ވާހަކަފުޅު ނިންމާލައްވަމުން ވިދާޅުވިއެވެ.

މި ބަދަލަކީ ރާއްޖޭގެ ފާރަވެރިވުމުގެ ނިޒާމަށް ވެސް ނޭދެވޭ އަސަރެއް ކުރާނެ ކަމެއް ނޫން ކަމަށް ބާ ކައުންސިލްގެ މި ފޯރަމްގައި އޭނާ ވަނީ ފާހަގަކޮށްފައެވެ.

2 އިންތިޚާބު އެއް ދުވަހެއްގައި ބޭއްވުމަށް ނަގާ ފެންނަ ނުފެންނަ ވޯޓު މި އަންނަ މަހުގެ 4 ވަނަ ދުވަހު ނެގުމަށް ވަނީ ނިންމައިފައެވެ.