ހެނދުނުގެ ނާސްތާ: ފާޑުކިޔާވަރަށް ވުރެ ސަޅި

ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ރިޔާސީ ކެމްޕެއިންގެ ތެރެއިން ކޮންމެ ކިޔަވާ ކުއްޖަކަށް ހެނދުނުގެ ނާސްތާ ދިނުމުގެ ވާހަކަދެއްކުމުން، އެކަން ވެގެންދިޔައީ ބަޔަކު މީހުންނަށް ވަރަށް ބޮޑު ޖޯކަކަށެވެ. އެއީ ވާނެ ކަމެއްނޫންކަމަށާއި، އެއަށްވުރެ ކުރަންޖެހޭ އެހެނިހެން ހަރަދުތައް މާ މުހިންމުކަމަށް ބުނެ ބައެއް ފަރާތްތަކުން ދިޔައީ ވާހަކަދައްކަމުންނެވެ.

ނާސްތާ ދިނުމުގެ ޕްރޮގްރާމަށް ބަޖެޓްގައި 50 މިލިޔަން ރުފިޔާ ޖެހުމަށްފަހު، ނޫސްވެރިންގެ ބައްދަލުވުމުގައި މި ޕްރޮގްރާމް ފުރަތަމަ ޓާމްގައި ހިންގާނީ ޕައިލެޓް އުސޫލުން 25 ސްކޫލްގައި ކަމަށް ބުނުމުން އެކަމަށް ފާޑުކީ ފަރާތްތައްވެސް މަދެއް ނޫނެވެ. ނަމަވެސް މިއަދު އެ ޕްރޮގްރާމް އިފްތިތާހު ކުރިއިރު، އެފާޑުކިޔުންތެރިންގެ އަނގަތައް ވަނީ ނިކަން ރަނގަޅަށް ލައްޕާލާފައެވެ.

މިއަދު ހެނދުނު ފެށުނު ދިރާސީ އާ އަހަރާއި އެކު، ރާއްޖޭގެ ސްކޫލްތަކުގައި ހެނދުނުގެ ނާސްތާ ފޯރުކޮށްދިނުމުގެ ޕްރޮގްރާމް ވަނީ ރައީސުލްޖުމްހޫރިއްޔާގެ ނައިބު ފައިސަލް ނަސީމް ފައްޓަވައިދެއްވާފައެވެ.

މިއަދު މި ޕްރޮގްރާމް ފެއްޓުނު އިރު، ފުރަތަމަ ދުވަހުވެސް މި ޕްރޮގްރާމުން އާންމުންނާއި ބެލެނިވެރިން ހެއްވާލަދީފިކަމަށް ގިނަ ފަރާތްތަކުން ދަނީ ބުނަމުންނެވެ. މި ޕްރޮގްރާމްގައި ބައިވެރިވާ ކުދިންނަށް ސްކޫލް ހުޅުވުމުގެ ކުރިން ފޯމެއް ދީ، ސަޔަށް އެކަށައެޅިފައިވާ މެނޫގެ ތެރެއިން އެއްޗެއް ނެގުމަށް ކުދިންނަށް ވަނީ ފުރުސަތު ދީފައެވެ. މި ފޯމްގައި ކުދިން ފާހަގަޖެހި އެއްޗެހި ކުދިންނަށް މިއަދު ހެނދުނު ފޯރުކޮށްދީފައިވަނީ ތާޒާ ކަމާއި އެކުގައެވެ.

ހެނދުނު ގަޑީގައި ސްކޫލްތަކަށް ކުދިން ހެނދުނުގެ ސައި ނުބޮއެ ދިޔުމުގެ ސަބަބުން ކިޔެވުމަށް އެކަށީގެންވާ ސަމާލުކަމެއް ނުދެވޭކަމަށް ތައުލީމީ ދާއިރާގައި ހަރަކާތްތެރިވާ ގިނަ ފަރާތްތަކުން ވަނީ ބުނެފައެވެ. މިހެންކަމުން އެކިއެކި ސަބަބުތަކާއި ހުރެ ހެނދުނު ސައި ނުބޮއެ ސްކޫލަށް އަންނަ ކުދިންނަށް، ސްކޫލްގެ ތެރެއިން ސައި ލިބުމުން ކިޔެވުމަށް އިތުރު ހިތްވަރެއް ލިބިގެންދާކަމަށްވެސް ވަނީ ބުނެފައެވެ.

ވޮއިސްއާއި ވާހަކަދައްކަމުން މި ޕްރޮގްރާމްގެ ދަށުން ނާސްތާ ލިބުނު ދަރިވަރަކުވެސް ބުނިގޮތުގައި މިއީ ހިންގަން ޖެހޭ މުހިންމު ޕްެރޮގްރާމެކެވެ. މި ޕްރޮގްރާމްގައި މިއަދު ހެނދުނު ނާސްތާ ކުރިއިރުގައި، ކުދިން އެކުވެރިކަމާއި އެކު ކްލާހުގެ ތެރޭ އުފަލާއި އެކު ސައިބުއިކަން ދަރިވަރު ވަނީ ފާހަގަކޮށްފައެވެ.

"އަޅުގަނޑު މިއަދުގެ ނާސްތާއަށް ފޯމްގައި ޖެހީ ސޭންޑްވިޗް.  އެކަމު އަޅުގަނޑަށް ލިބުނު ސޭންޑްވިޗް އެހެން ކުއްޖަކު ކާ ހިތްވީމަ ދިނިން އޭގެ އެއްބައި ބަދަލުގަ ރޮއްޓާއި މަސްހުނި ދޭ ގޮތަށް. އެގޮތަށް ޝެއަރކޮށްގެން ކެވުނީމަ ވަރަށް ސަޅި"، ވޮއިސްއާއި ވާހަކަދައްކަމުން ދަރިވަރު ބުންޏެވެ.

މިއަދު ފެށި މި ޕްރޮގްރާމްއަށް ލިބޭ ތަރުހީބާއި ފާޑުކިޔުންތަކަށް ބަލައި މި އަހަރު ނިމެންވާއިރަށް، ރާއްޖޭގެ ހުރިހާ ސްކޫލަކަށް ކަަހަލަ ގޮތަކަށް މި ޕްރޮގްރާމް ފުޅާކުރުމަށް މިނިސްޓްރީއިން މި ވަނީ ރާވާފައެވެ. ޖަޒީރާ ރާއްޖޭގައި ކުދިންނަށް ހެނދުނުގެ ނާސްތާވެސް ލިބިއްޖެއެވެ. ޖަޒީރާ ރާއްޖޭގައި ދެން ދަރިވަރުންނަށް އޮތީ ކޮންކަމެއްބާވައެވެ؟