މިދިޔަ ސަރުކާރުގައި ފެނަކައިން ހަދަންފަށާ ނުނިމި ހުރި 4 އިމާރާތެއް ނިންމަން ބަޔަކު ހޯދަނީ

ފެނަކަ ކޯޕަރޭޝަނުން މިދިޔަ ސަރުކާރުގައި ހަދަން ފަށާ ނުނިމި ހުރި 4 އިމާރާތެއް ނިންމައިދޭނެ ފަރާތެއް ހޯދުމަށް އިއުލާންކޮށްފިއެވެ.

މި އިއުލާނުގައި ހިމެނެނީ ށ. މާއުނގޫދޫގައި އިމާރާތް ކުރަން ފަށާފައިވާ ފެނަކަ އޮފީސް އިމާރާތާއި، ހއ. ދިއްދޫގައި އިމާރާތްކުރަން ފަށާފައިވާ އިންޖީނުގެއާއި، ޏ. ފުވައްމުލަކުގައި އިމާރާތްކުރަން ފަށާފައިވާ އިންޖީނުގެއާއި، އަދި ހދ. ކުޅުދުއްފުށީގައި އިމާރާތްކުރަމުން ގެންދާ އިންޖީނުގެ ނިންމުމުގެ މަސައްކަތެވެ.

ފެނަކައިން މައުލޫމާތު ދެއްވާފައިވާ ގޮތުގައި، މި ހަތަރު މަޝްރޫއުއަކީ ވެސް އެ ކޯޕަރޭޝަނުގެ ކުރީގެ މެނޭޖްމަންޓުން ފެނަކައިގެ މުވައްޒަފުން ބޭނުންކޮށްގެން އެ ކުންފުނިން އަމިއްލައަށް ހިންގަމުން ގެންދިޔަ މަޝްރޫއުތަކެކެވެ. ނަމަވެސް މިގޮތަށް މަސައްކަތް ކުރިއަށް ގެންދިޔުމުން ކުންފުންޏަށް ވަރަށް ބޮޑަށް ގެއްލުންވާ ކަމަށް ފެނަކައިން ވަނީ ފާހަގަކޮށްފައެވެ.

ފެނަކައިން އިތުރަށް ބުނެފައިވަނީ، ފެނަކައިގެ މުވައްޒަފުން ބޭނުންކޮށްގެން އަދި ތަކެތި ކުއްޔަށް ނަގައިގެން މަސައްކަތް ކުރުމުން މަޝްރޫއުގެ އަގު ބޮޑުވާ ކަމަށެވެ. އެހެންނަމަވެސް، ބަޔަކާ ހަވާލުކޮށްގެން މި މަސައްކަތްތައް ކުރުމުން ހޭދަވާ ހަރަދު ބޮޑުތަނުން ކުޑަވެ ކުންފުންޏަށް ފަސޭހަތަކެއް ލިބޭނެ ކަމަށް ފެނަކައިން ވަނީ ބުނެފައެވެ.

ފެނަކައަކީ ރައްޔިތުންނަށް އަސާސީ ހިދުމަތް ފޯރުކޮށްދެމުން އަންނަ ކުންފުންޏެއްކަން ފާހަގަކޮށް، އެ ކުންފުނިން މިއަދު ޔަގީންކަން ދީފައިވަނީ މެނޭޖްމަންޓުން އަބަދުވެސް މަސައްކަތް ކުރާނީ ރައްޔިތުންގެ އިތުބާރު ލިބިފައިވާ އެދެވޭ ހިދުމަތެއް ފޯރުކޮށްދޭ ކުންފުންޏެއްގެ ގޮތުގައި ހެދުމަށް މަސައްކަތް ކުރަމުންދާ ކަމަށެވެ.