މުޑުދާރު އެކޮމެޑޭޝަން ބްލޮކްތަކަކުން 16 ބިދޭސީން ހައްޔަރުކޮށްފި

މާލޭގެ މާފަންނު ސަރަހައްދުގައި ހުރި ހަތަރު ގެއެއް ބަލައި ފާސްކުރުމަށްފަހު، އާންމު ސަލާމަތާއި ރައްކާތެރިކަމަށް ނުރައްކާވާފަދަ ގޮތަކަށް ދިރިއުޅެމުން އައި 16 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.

އިމިގްރޭޝަނުން މަޢުލޫމާތު ދީފައިވާ ގޮތުގައި، މި އޮޕަރޭޝަން ހިންގީ ތޮއްޖެހިގެން ބިދޭސީން ދިރިއުޅެމުން އަންނަ އެކޮމޮޑޭޝަން ބްލޮކްތައް ބަލައި ފާސްކުރުމަށް އެކުލަވާލާފައިވާ ޓާސްކު ފޯސްއިންނެވެ. ބަލައި ފާސްކުރެވުނު ބައެއް ތަންތަނަކީ ސާފުތާހިރުކަމަށް ބެލުމެއްނެތި، ވިޔަފާރިއަށް އެކި ބާވަތުގެ ކާބޯތަކެތި ތައްޔާރުކުރަމުންދިޔަ ތަންތަން ކަމަށްވެސް ފާހަގަކުރެވިފައިވެއެވެ.

މީގެ އިތުރުން، މިދިޔަ ހޮނިހިރު ދުވަހު ފަސް ގެއެއް ބަލައި، ތިން ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާއިރު، މި މަހުގެ 12 ވަނަ ދުވަހު 18 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށް އިމިގްރޭޝަނުން ބުނެފައިވެއެވެ.

އިމިގްރޭޝަނުން ބުނެފައިވަނީ ގަވާއިދާ ޚިލާފަށް ދިރިއުޅޭ ބިދޭސީންގެ މައްސަލަ ހައްލުކުރުމަށް ފުލުހުންނާ ގުޅިގެން ގިނަ އޮޕަރޭޝަންތަކެއް ކުރިއަށް ގެންދާ ކަމަށެވެ. އަދި މިފަދަ އޮޕަރޭޝަންތަކުގައި ހައްޔަރުކުރެވޭ އެއްވެސް ބިދޭސީއަކަށް ދެވަނަ ފުރުސަތެއް ނުދޭނެ ކަމަށްވެސް އިމިގްރޭޝަނުން ވަނީ ބުނެފައެވެ.

މި އޮޕަރޭޝަންތަކަކީ މާލޭގައި ގަވާއިދާ ޚިލާފަށް ދިރިއުޅޭ ބިދޭސީންގެ މައްސަލަ ހައްލުކުރުމަށާއި، އާންމު ސިއްޙަތާއި ރައްކާތެރިކަން ކަށަވަރުކުރުމަށް ސަރުކާރުން ކުރައްވަމުން ގެންދަވާ މަސައްކަތްތަކުގެ ބައެކެވެ.