"ލާމަރުކަޒީ ގުޅުން" ނަމުގައި އެމްޑީޕީން ހާއްސަ ކޮންފަރެންސެއް ބާއްވަނީ

"ލާމަރުކަޒީ ގުޅުން" ނަމުގައި އެމްޑީޕީން ހާއްސަ ކޮންފަރެންސްއެއް ބޭއްވުމަށް ނިންމައިފިއެވެ.

ރާއްޖޭގެ އެކި ކަންކޮޅުތަކުގައި ބޭއްވުމަށް ހަމަޖެހިފައިވާ މި ކޮންފަރެންސާ ބެހޭގޮތުން ވާހަކަދައްކަވަމުން އެމްޑީޕީގެ އަލިފުށީ ދާއިރާގެ މެމްބަރު މުހައްމަދު ރަޝީދު ހުސައިން (ބިގޭ) ވިދާޅުވީ, އެޕާޓީން ކޮންފަރެންސެއް ބޭއްވުމަށް ނިންމުމުގެ އެއް ބޭނުމަކީ، ލާމަރުކަޒީ ނިޒާމުގެ ބާރު ކަނޑުވާލުމަށް ކުރަމުންގެންދާ ކަންކަމުގެ މައުލޫމާތު ކައުންސިލްތަކާ ހިއްސާކުރުމަށް ކަމަށެވެ.

މިގޮތުން މިކަމަށް އެމްޑީޕީން ބޮޑު ތިލަދުންމައްޗަށް ދަތުރެއް ކުރުމަށް ނިންމާފައިވާކަމަށާއި، މި ދަތުރުތައް ކުރިއަށްދާނީ، އޮކްޓޯބަރުމަހުގެ 10 އަކުން 15 ގެ ނިޔަލަށެވެ. އެމްޑީޕީން ވަނީ މި ދަތުރުގައި ބޮޑުތިލަދުންމަތީގެ ށ، ހއ، ހދ އަތޮޅުގެ ރަށްތަކަށް ދިއުމަށް ނިންމާފައެވެ. ހުރިހާ ރަށަކަށް ނުދެވުނު ނަމަވެސް އެމްޑީޕީގެ އަމާޒަކީ ވީހާވެސް ގިނަ ރަށްތަކަކަށް ގޮސް އާއްމުންގެ ހިޔާލު ހޯދުންކަމަށް ބިގޭ ވިދާޅުވިއެވެ.

މިދަތުރުތަކުގައި އެމްޑީޕީ ހިންގުމާއި ގުޅޭގޮތުން ޕާޓީގެ މެމްބަރުންގެ ހިޔާލު ހޯދުމަށް ނިންމާފައިވާކަމަށްވެސް ބިގޭ ވިދާޅުވިއެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން އެމްޑީޕީގެ ލާމަރުކަޒީ ކޮމިޓީގެ މުގައްރިރު އަލީ ނިޔާޒް ވިދާޅުވީ، އެމްޑީޕީގެ ސިޔާސަތަކީ ލާމަރުކަޒީ ނިޒާމުގެ ތެރެއިން ރާއްޖެ ތަރައްޤީކުރުން ކަމަށެވެ. އެއްތަނަކަށް މީހުން ޖަމާކޮށް ރާއްޖެ ތަރައްޤީކުރުމަކީ އެމްޑީޕީން ތާއީދުކުރާނޭ ސިޔާސަތެއް ނޫންކަމަށްވެސް އޭނާ ވިދާޅުވިއެވެ.

ސަރުކާރުން ގެންދަނީ ލާމަރުކަޒީ ނިޒާމަށް ބޮޑެތި ބަދަލުތަކެއް ގެންނަމުން.މިކަމުގައި ކައުންސިލްތަކުގެ ކަންބޮޑުވުން ވަރަށްބޮޑަށް އެބަހުރި

ނިޔާޒް ވިދާޅުވިއެވެ

ނިޔާޒު ވިދާޅުވީ މިވީ ދުވަސްތަކުގައި އެމްޑީޕީއާ ޕާޓީގެ މެމްބަރުންނާ އޮންނަގުޅުން އެންމެ ރަނގަޅަށް ބޭއްވިފައި ނުވާކަމަށާއި، ބޭއްވުމަށް ހަމަޖެހިފައިވާ މިކޮންފަރެންސްގެ ސަބަބުން އެގުޅުން ރަނގަޅުވެގެން ދާނޭކަމަށް އުއްމީދުކުރާކަމަށެވެ.