އެހީގެ މަސައްކަތްތަކާމެދު ސުވާލެއް އުފެދޭނަމަ, އެކަން ހިއްސާކުރައްވާ. ޖަވާބުދާރީވާނަން: އައިއޭސީ

އިންސާނީ އެހީގެ މަސައްކަތްތަކާމެދު ސުވާލެއް އުފެދޭނަމަ, އެކަން ސީދާ އެޖަމިއްޔާއާ ހިއްސާކުރުމުން ސުވާލު އުފެދޭ ކަމެއްގެ ފުރިހަމަ މައުލޫމާތު އެފަރާތަކާ ހިއްސާކުރާނޭކަމަށް އިންޓަރނޭޝަނަލް އެއިޑް ކެމްޕެއިން ޖަމިއްޔާއިން ބުނެފިއެވެ.

އިންޓަނޭޝަނަލް އެއިޑް ކެންޕެއިން، އައިއޭސީ އަކީ ބައިނަލްއަޤްވާމީ ފެންވަރުގައި އިންސާނީ އެހީތެރިކަން ފޯރުކޮށްދެމުން އަންނަ ޖަމިއްޔާއެކެވެ. އެޖަމިއްޔާގެ މަސައްކަތް އެންމެ ބޮޑަށް ފާހަގަވެގެންދިޔައީ، ޣައްޒާއަށް އެހީވުމަށް އެޖަމިއްޔާއިން ކުރަމުންގެންދިޔަ އަދި މިހާރުވެސް ކުރަމުންގެންދާ މަސައްކަތްތަކުގެ ސަބަބުންނެވެ.

އިންޓަރނޭޝަނަލް އެއިޑް ކެމްޕެއިން ޖަމިއްޔާގެ މަސައްކަތްތަކާމެދު ސުވާލު އުފައްދައި އަދި މީސް މީޑިއާގައި ކޮންބައެއްކަން ނޭނގޭގޮތަށް އެ ޖަމިއްޔާގެ މަސައްކަތްތަކާމެދު އުފައްދަމުންގެންދާ ސުވާލުތަކާ ގުޅިގެން އައިއޭސީން ނެރުނު ބަޔާނެއްގައި ބުނެފައިވަނީ އެޖަމިއްޔާއިން ކުރާ މަސައްކަތްތަކަކީ ރައްޔިތުންނާއި ވަރަށް ގާތުން ދެފުށް ފެންނަގޮތަށް ކުރެވޭ މަސައްކަތްތަކެއްކަމަށެވެ. އައިއޭސީގެ އޯޑިޓްތަކަކީ ވަރަށް ތަފްސީލީ ދެފުށްފެންނަ ރިޕޯޓްތަކެއްކަމަށް އެ ޖަމިއްޔާ މެދުވެރިކޮށް އެހީފޯރުކޮށްދޭ ފަރާތްތަކަށް ޔަގީންކަންދޭކަން ފާހަގަކުރަމުން އެޖަމިއްޔާއިން ބުނީ، އޮޑިޓް ރިޕޯޓްތައް އަހަރީ ރިޕޯޓްތަކާއެކު އައިއޭސީގެ ވެބްސައިޓްގައި ޝާއިއުކޮށްފައިވާނޭކަމަށެވެ.

އަދި އެ ރިޕޯޓްތައް ހުށަހަޅަންޖެހޭ އެންމެހާ އިދާރާތަކަށް ރިޕޯޓްތައް ހުށަހަޅާފައިވާނޭކަމަށްވެސް އައިއޭސީން ބުންޏެވެ. އޮޑިޓް ރިޕޯޓްތައް ޝާއިއުކުރެވިގެން  ދިޔައިރު އެޖަމިއްޔާގެ ބޮޑް މެމްބަރުންނާއި އެތައް ޤައުމެއްގައި ރެއާއި ދުވާލު ވަރުބަލިކަމެއްނެތި އެތައް ނުރައްކަލެއްގައި މަސައްކަތްކުރާ މުއައްޒަފުންނާއި، އޮޑިޓަރުންނަށް އަމާޒުވާގޮތަށް ސޯޝަލް މީޑިއާގައި ދޮގު ހަބަރުތައް ފަތުރަމުންދިޔަކަން ފާހަގަކުރަމުން އެޖަމިއްޔާއިން ވަނީ އެކަން ހަރުކަށި އިބާރާތުން ކުއްވެރިކޮށްފައެވެ.

ރިޕޯޓްތައް ނުނެރެވި ލަސްވާ މައްސަލައާ ގުޅޭގޮތުން އައިއޭސީން ބުނީ އެކަން އެހެން ދިމާވާ ސަބަބުތައް ކަމާބެހޭ ފަރާތްތަކާ ހިއްސާކުރަމުްނދިޔަ ކަމަށާއި، އެޖަމިއްޔާއިން ޤަބޫލުކުރާގޮތުގައި ޖަވާބުދާރީވާންޖެހޭ އެންމެބޮޑު ބަޔަކީ އެޖަމިއްޔާއިން މެދުވެރިކޮށް އެހީދޭ ފަރާތްތަކާއި ޖަމިއްޔާގެ ބެލެނިވެރިޔާ ކަމުގައިވާ ޖަމިއްޔާތަކާ ބެހޭ ވުޒާރާކަމަށެވެ.

އައިއޭސީން ބުނީ އެދުމަކީ އިންސާނީ އެހީގެ މަސައްކަތާމެދު ސުވާލެއް އުފެދޭނަމަ ސީދާ އެކަން އެޖަމިއްޔާ ގުޅައިގެން އެކަމުގެ މައުލޫމާތު ހޯދުންކަމަށާއި، އެޖަމިއްޔާގެ މެމްބަރުންނަކީ ރައްޔިތުންނާ ގާތުން މަސައްކަތްކުރާ އަދި ބައްދަލުވާނެ ބައެއްކަމަށެވެ. އެއްވެސް ހާލެއްގައި މީސްމީޑިއާގައި ފެތުރޭ ވާހަކަތަކުގައި ޖެހި ހަޤީޤަތް ބެލުމެއްނެތި އެފަދަ ވާހަކަތައް ފެތުރެމުން ދުރުހެލިވުމަށް އެޖަމިއްޔާއިން ވަނީ އެދިފައެވެ.

އައިއޭސީން ބުނީ މިއަދާހަމައަށްވެސް އެޖަމިއްޔާ މެދުވެރިކޮށް ދެމުންދާ އެހީތައް މަދުނުވެ އިތުރުވަމުން ގޮސްފައިވަނީ، ފެށުނީއްސުރެ ގެންގުޅެމުްނދިޔަ ދެފުށްފެންނަ އުސޫލުތަކުގެ ސަބަބުންކަމަށް ޤަބޫލުކުރާ ކަމަށާއި، އެއީ އެކަމުގައި ރައްޔިތުން އެޖަމިއްޔާއަށް ކުރާ އިތުބާރުގެ ސަބަބުންކަމަށް ދެކޭކަމަށެވެ.