ބޮޑަށް ބުރަވެވެނީ އިސްތަށީގައި ކަޅުކުލަޖެއްސުން ހުއްދަ ކަމަށް: ފަތުވާ މަޖިލިސް

ދަލީލުތަކަށް ބަލާ ނަމަ، ބޮޑަށް ބުރަވެވެނީ އިސްތަށިގަނޑުގައި ކަޅުކުލަޖެއްސުމަކީ ހުއްދަ ކަމެއް ކަމުގައި ކަމަށް ދިވެހިރާއްޖޭގެ އިސްލާމީ ފަތުވާދޭ އެންމެ މަތީ މަޖިލީހުން ބުނެފިއެވެ.

އިސްލާމްދީނުގައި އިސްތަށިގަނޑުގައި ކަޅު ކުލަ ޖެއްސުމުގެ ހުކުމް ހާމަކޮށް، ފަތުވާ މަޖިލީހުން މިއަދު ނެރުނު ފަތުވާގައި ބުނީ، އިސްތަށީގައި ކަޅުކުލަ ޖެއްސުމުގެ މައްސަލައިގައި މައިގަނޑު ދެރައުޔެއް ފާހަގަކުރެވޭ ކަމަށެވެ.

އެއީ، ޙަރާމްކަމަށް ވިދާޅުވާ ޢިލްމުވެރިންގެ ރައުޔާއި ހުއްދަކަމަށް ވިދާޅުވާ ޢިލްމުވެރިންގެ ރައުޔު ކަމަށާ، މި ދެރައުޔުވެސް ބިނާވެފައިވަނީ ދަލީލުތަކުގެ މައްޗަށް ކަމަށް ބުނެފައިވެއެވެ.

އަދި މި މައްސަލަ ދިރާސާކުރައްވައި ޢިލްމުވެރިން ނެރުއްވައިފައިވާ ޙުކުމްތައް ގުޅިފައިވަނީ އެބޭކަލުންގެ އިޖުތިހާދާ ކަމަށް ފަތުވާ މަޖިލީހުން ފާހަގަކޮށްފައިވެއެވެ.

މިއީ އިޖުތިހާދީ މައްސަލައަކަށްވާތީ އިސްވެ ދެންނެވުނު މައިގަނޑު ދެރައުޔަކީވެސް ޢިލްމުވެރިން ޤަބޫލުކުރައްވައިފައިވާ ދެރައު ކަމަށްވެސް ފަތުވާގައި ވެއެވެ.

”ނަމަވެސް ހުއްދަކަމަށް ވިދާޅުވާ ޢިލްމުވެރިންގެ ދަލީލުތައް ބާރުގަދަކަމަށް ފާހަގަކުރެވިފައިވާތީ، އިސްލާމީ ފަތުވާދޭ އެންމެ މަތީ މަޖިލީހުގެ މެންބަރުން ބުރަވަނީ އިސްތަށީގައި ކަޅުކުލަޖެއްސުން ހުއްދަކަމަށެވެ.“ ފަތުވާދޭ މަޖިލީހުން ނެރުނު ފަތުވާގައި ބުނެފައިވެއެވެ.