ލަފާފުރާމީހުން އަވީގައި ތިބެންޖެހޭ ތިބުމަށް ނިމުމެއް. ލޯންޗްތަކަށް ހުޅުމާލެ ފެރީޓާމިނަލް ހުޅުވާލަނީ!

އަތޮޅުތެރެއިން މާލެއަށް، އަދި މާލެއިން އަތޮޅުތަކަށް ދަތުރުކުރާ ފަރާތްތަކުން ލޯންޗްފަހަރުގައި ދަތުރުކުރުމުގައި މިހާރު އެންމެ އާއްމުކޮށް ބޭނުންކުރަނީ އެމްއެމްއޭ ކުރިމަތީ ބަނދަރު ސަރަހައްދެވެ. ހުޅުމާލެއަށް އަންނަ ލޯންޗްފަހަރުވެސް ގޮތެއް ނެތިގެން މީހުން ބާލަން އޮންނަނީ ހަމަ އެ ސަރަހައްދެވެ. އެމްއެމްއޭ ކުރިމަތިން އެ އޮންނަ ސަރަހައްދަކީ މާލޭގެ އެންމެ ކާރުބާރޫ ބޮޑު ސަރަހައްދެވެ. ކޮންމެ ދުވަހަކުވެސް ގިނަ އަދަދެއްގެ ލޯންތައް އެތަނުން ފުރާއިރު، އެ ސަރަހައްދަކީ ފުރާމީހުންނަށް އަދި މާލެ އަންނަ މީހުންނަށް އެކަށީގެންވާގޮތަށް ހަދާފައި އޮންނަ ސަރަހައްދެއް ނޫނެވެ.

ކިތަންމެ އަވިގަދަވިނަމަވެސް އަދި ކިތަންމެ ވިއްސާރަވިނަމަވެސް ހިޔާވެލާނޭ ގޮތެއްވެސް އެތަނަކު ނުހުރެއެވެ. މާބޮށް ވިއްސާރަވެއްޖެނަމަ ޖެހެނީ މަރުކަޒީ ބޭންކްގެ އަސްކިނިދޮށަށް ވަންނާށެވެ. ހުކުރު ހޮނިހިރު ދުވަހެއްގައި ނަމަ އެތަންވެސް މަދު މީހުން ހިޔާވެލުމަށް ބޭނުންކުރެވިދާނެއެވެ. ނަމަވެސް ރަސްމީ ދުވަސްދުވަހު އެފުރުސަތެއްވެސް ނުލިބެއެވެ.

މާލެއަކީ އެކިއެކި ބޭނުންތަކުގައި ކޮންމެ ދުވަހަކުވެސް އެތައްހާސް ބަޔަކު އައިސް ގޮސްހަދާ ތަނެކެވެ. އެކަން އެހެން އޮންނައިރު، ލަފާފުރުމުގައި އެ އޮންނަ އުނދަގޫ ކަމަކީ ލޯންޗްތަކުގެ ކައްޕިންނާއި ދަތުރުކުރާ ފަރާތްތައް އަބަދުމެ ދައްކާ ވާހަކައެކެވެ. މިހާރު މިވަނީ އެކަމަށްވެސް ނިމުމެއް އައިސްފައެވެ.

އެމްޓީސީސީން މިއަދު ވަނީ ރަށްރަށުން މާލެ އަދި ހުޅުމާލެއަށް ދަތުރުކުރާ ރައްޔިތުންނަށް ލުއިފަސޭހަ ގޮތްތަކެއް ހަމަޖެއްސުމުގެ ގޮތުން އެކުންފުނީގެ ބެލުމުގެ ދަށުގައި އޮންނަ ފެރީ ޓާމިނަލްތައް ލޯންޗްފަހަރުތަކަށް ބޭނުންކުރެވޭނޭ ގޮތް ހެދުމަށް ނިންމާފައެވެ. މިގޮތުން އެމްޓީސީސީން ވަނީ މާލެ އާއި އަތޮޅު ތަކާއި ދެމެދު ލޯންޗް ފެރީ އޮޕަރޭޓް ކުރާ ފަރާތްތަކުން ލަފާ ފުރުމަށްޓަކައި ހެންވޭރު ފެރީ ޓާމިނަލް އަދި ހުޅުމާލެ ފެރީ ޓާރމިނަލްގެ ބަނދަރު ބޭނުން ކުރުމަށް ހުޅުވާލުމަށް ގަސްދުކުރާކަމަށް ބުނެފައެވެ. އެމްޓީސީސީން ބުނީ ލަފާފުރުމުގައި ހެންވޭރު ފެރީ ޓާމިނަލް އަދި ހުޅުމާލެ ފެރީ ޓާރމިނަލްގެ ބަނދަރު ބޭނުން ކުރަން ބޭނުންވާ ފަރާތްތަކުން އީމެއިލް މެދުވެރިކޮށް ޝައުޤުވެރިކަން ހުށަހެޅުމަށް އަންގާފައެވެ.

މައުލޫމާތު ލިބިފައިވާ ގޮތުގައި މިއީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ އެދިވަޑައިގަތުމަށް އެމްޓީސީސީން ނިންމި ނިންމުމެކެވެ.

ރަށްރަށުން މާލެ އަދި ހުޅުމާލެއަށް ދަތުރުކުރާ ލޯންޗްތަކަށް ހެންވޭރު ފެރީ ޓާމިނަލް އަދި ހުޅުމާލެ ފެރީ ޓާރމިނަލްގެ ބަނދަރު ބޭނުންކުރެވޭނެ ގޮތްވުމަކީ ދަތުރުކުރާ މީހުންގެ އިތުރުންވެސް ލޯންޗްފަހަރުތަކުގެ ކައްޕިންނަށްވެސް ލިބިގެންދާނެ ވަރަށްބޮޑު ހިތްހަމަ ޖެހުމެކެވެ. ސަބަބަކީ މިހާރު މާލެއައިސް ތޮށިގަނޑާ ކައިރިކޮށް މީހުން ބޭލުމުގައި އެތައް ވަގުތެއް ހޭދަކުރަންޖެހޭއިރު، ފުރަން އައިސް މަޑުކޮށްލާނޭ ނުވަތަ ލޯންޗުން މާލެ ފޭބުމަށްފަހު ޓެކްސީ އަންނަންދެން މަޑުކޮށްލައިގެން ތިބޭނޭ ރަނގަޅު މާހައުލެއްނެތެވެ. ނަމަވެސް ހެންވޭރު ފެރީ ޓާމިނަލް އަދި ހުޅުމާލެ ފެރީ ޓާރމިނަލް ލިބިގެން ދިއުމަކީ ލޯންޗްތަކުން މާލެ އަންނަ ކުޑަކުދިންނަށާއި، އުމުރުން ދުވަސްވީ މީހުންގެ އިތުރުން ކުޑަކުދިން ގޮވައިގެން ދަތުރުކުރާ މީހުންނަށް ލިބިގެންދާނޭ ވަރަށްބޮޑު ހިތްހަމަ ޖެހުމަކަށްވާނޭ ކަމެއްކަމަށް ދަތުރުކުރާ ފަރާތްތަކުން ފާހަގަކުރެއެވެ.