އެއާޕޯޓުގައި ގޮވާތަކެތި ދެނެގަންނާނެ ފާރަގެމައެއް ގާއިމްކުރަނީ

ވެލާނާ އިންޓަރނޭޝަނަލް އެއަރޕޯޓުގައި ގޮވާތަކެތި ދެނެގަންނާނެ ފާރަގެމައެއް ގާއިމްކުރުމަށް އެއްބަސްވެއްޖެއެވެ.

މިކަމަށް އެއްބަސްވީ ފޮރިން މިނިސްޓަރ އަބްދުﷲ ޝާހިދު މިވަގުތު އެމެރިކާއަށް ކުރައްވަމުން ގެންދަވާ ރަސްމީ ދަތުރުފުޅުގެ ތެރެއިންނެވެ.

މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ މިނިސްޓަރ އަބްދުﷲ ޝާހިދެވެ. އެމެރިކާގެ ފަރާތުން ސޮއި ކުރައްވާފައިވަނީ ޑިޕާޓްމަންޓް އޮފް ސްޓޭޓް އޮފް ބިއުރޯ އޮފް ކައުންޓާޓެރެރިޒަމްގެ ޕްރިންސިޕަލް ޑެޕިއުޓީ ކޯޑިނޭޓާ އެލީނާ ރޮމަނޮސްކީ އެވެ.

މި އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ ޝާހިދު ވިދާޅުވީ ޓެރަރިޒަމްއަކީ ބައިނަލްއަގްވާމީ މައްސަލައެއްކަމަށާއި ހުރިހާ ފަރާތްތަކުން ގުޅިގެން މެނުވީ އެ މައްސަަލަ ހައްލުނުކުރެވޭނެކަމަށެވެ. އެބޭފުޅާ ވަނީ މިކަމުގައި އެމެރިކާ ސަރުކާރުން ދެމުންގެންދާ އެއްބާރުލުމަށް ޝުކުރު ދަންނަވާފައެވެ.

މިއަދު ސޮއިކުރެވުނު އެއްބަސްވުމުގެ ދަށުން ސަލާމަތީ ބާރުތަކަށް ތަމްރީން ފޯރުކޮށްދީ، ގޮވާތަކެތި ދެނެގަންނާނެ ފާރަގެމައެއް ފޯރުކޮށްދިނުމަށް އެމެރިކާއިން އެހީވާނެއެވެ. އަދި މި އެއްބަސްވުމުގެ ދަށުން އެއާޕޯޓުގައި އޭވިއޭޝަން ސެކިއުރިޓީ އެޑްވައިޒަރެއްވެސް އެއާޕޯޓުގައި ގާއިމްކުރެވޭނެއެވެ.

މިނިސްޓަރ ޝާހިދު އެމެރިކާއަށް ކުރެއްވި ދަތުރުފުޅު ވަނީ ނިންމަވާލައްވާފައެވެ.