ރައީސް ޑރ.މުޢިއްޒުގެ ވަޢުދުފުޅާ އެއްގޮތަށް ސަރުކާރު ހުރިހާ ސްކޫލެއް އޭސީ ކުރަނީ

ރައީސް ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ސަރުކާރުގެ ހުރިހާ ސްކޫލްތައް އޭސީ ކުރުމުގެ މަސައްކަތް މި މަހުގެ ފަހުކޮޅު ފަށަން ނިންމަވައިފިއެވެ.

ތަޢުލީމީ ވުޒާރާއިން މިއަދު އެކްސްގައިކުރެއްވި ޕޯސްޓެއްގައި ވިދާޅުވީ ކުރިއަށް މިއޮތް ދެ އަހަރުގެ ތެރޭގައި ސަރުކާރުގެ ހުރިހާ ސްކޫލެއް އޭސީ ކުރުމަށް ހަމަޖެހިފައިވާކަމަށެވެ.

ތަޢުލީމީ ވަޒީރު ޑރ. އިސްމާޢީލް ޝަފީޢު ވިދާޅުވީ އިރާދަކުރެއްވިއްޔާ، 2 އަހަރު ތެރޭގައި ކޮމިއުނިޓީގެ އެހީތެރިކަމާއެކު ސަރުކާރުގެ ހުރިހާ ސްކޫލެއް އޭސީކޮށް ނިންމާނެ ކަމަށެވެ.

"ޢިއްޒަތްތެރި ރައީސުލްޖުމްހުރިއްޔާގެ ލަފާފުޅާއެކު، ފެށުމަށް ހަމަޖެހިފައިވާ މި ޕްރޮޖެކްޓުގެ ޢަމަލީ މަސައްކަތް މި މޭ މަހުގެ ފަހު ހަފްތާގައި އިފްތިތާޙު ކުރާނަން"

ޑރ. އިސްމާޢީލް ޝަފީޢު ވިދާޅުވިއެވެ.

ސަރުކާރު ސްކޫލުތަކުގެ ކްލާސްރޫމްތައް އެއަރ ކޮންޑިޝަންކޮށް މި ފެށޭ ދިރާސީ އައު އަހަރުން ފެށިގެން ސޯލާ ޕަވަރ ބޭނުންކުރެވޭ އިޢާދަކުރުވަނިވި ހަކަތައިގެ މަޝްރޫޢެއް ސްކޫލުތަކުގައި ފެށުމަށް ގަސްދުކުރައްވާކަމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ މިދިޔަ މާޗް މަހުގެ 6 ވަނަ ދުވަހުއެވެ.

މާޗު މަހުގެ 6 ވަނަ ދުވަހުގެ ރޭ ދ. މީދޫގެ ރައްޔިތުންނާއި ބައްދަލުކުރައްވާ، ރައީސް ޑރ. މުޙައްމަދު މުޢިއްޒު ވިދާޅުވީ ސުކޫލްތަކުން ކިޔަވާ ދަރިވަރުންނާއި މުދައްރިސުންގެވެސް އެންމެ ބޮޑު އެދުމަކީ، ކިލާސްރޫމްތައް އޭސީ ކޮށްދިނުންކަމަށެވެ. އެހެންކަމުން ސޯލާ ޕަވަރ ބޭނުންކޮށްގެން، ކިލާސްތައް އޭސީ ކުރަން ބޭނުންވާ ސުކޫލްތަކަށް އެ ފުރުސަތު ދޭނެ ކަމަށް ރައީސް ވިދާޅުވިއެވެ.

"ސްކޫލްތަކުން ކިޔަވާ ކުދިންނާއި ޓީޗަރުންވެސް އެންމެ ބޮޑަށް އެދޭ އެއްކަންތައް. ވަރަށް ކްލާސްރޫމްތައް ހޫނުކޮށް ހުންނަ ވާހަކަ. އޭސީ ކޮށްދޭން އެދޭ ވާހަކަ. ކޮންމެމަހަކު ކަރަންޓް ބިލް ދައްކަން ބަލާއިރު މިކަން ކުރުމަކީ ދެކޮޅުޖެހޭނެ ކަމަކަށްވެސް ނުވޭ. އެހެންވީމަ އަޅުގަނޑުމެން ގަސްދުކޮށްފަ މިއޮތީ މިއަންނަ އަހަރުން ފެށިގެން ސޯލާ ޕަވަރ ބޭނުންކުރެވޭ ރިނިޔުބަލް އެނާޖީ ޕްރޮޖެކްޓްސް ތަކެއް ހުރިހާ ސްކޫލެއްގަ ހިންގަން. ހިންގައިގެން އެއާއި ގުޅުވާލައިގެން އޭސީ ކުރަން ބޭނުންވާ ސްކޫލްތަކަށް އެ ފުރުޞަތުދޭން"

ރައީސް ޑރ. މުޙައްމަދު މުޢިއްޒު ވިދާޅުވިއެވެ.

ރައީސް، މި މަޝްރޫޢާ ގުޅިގެން އިތުރަށް ވިދާޅުވީ، މި މަޝްރޫޢު، ފުރަތަމަ ފަހަރު ވާނީ އިންވެސްޓްމެންޓަކަށް ކަމަށާއި، ދެން އޭގެން ލިބޭ ހަކަތައިން ދެމެހެއްޓެނިވި ގޮތެއްގައި ކްލާސްރޫމްތައް އޭސީ ކުރެވިގެންދާނެ ކަމަށެވެ. އަދި ވީ އެންމެ އަވަހަކަށް ކިލާސްތައް އޭސީ ކުރުމުގެ މަޝްރޫޢު ފެށިގެންދާނެ ކަމުގެ ޔަޤީންކަންވެސް ރައީސް ޑރ. މުޢިއްޒު ދެއްވިއެވެ.