އެކައުންޓްތަކުގައި ހުރި ފައިސާ "ބަންދުނުކޮށް" ހުރި ނަމަ، ގިނަ ގޮނޑިތަކެއް ކާމިޔާބު ކުރެވޭނެ: ރައީސް ޔާމީން

އަމިއްލަފުޅު އެކައުންޓްތަކުގައި ހުރި ފައިސާ ބަންދުނުކޮށް ހުރި ނަމަ އިދިކޮޅު ފަރާތްތަކަށް ގިނަ ގޮނޑިތަކެއް ކާމިޔާބު ކުރެއްވޭނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.

ރައީސް ޔާމީން މިހެން ވިދާޅުވީ، މަޖިލިސް އިންތިޚާބުގައި ޕީޕަލްސް ކޮންގްރެސް ޕާޓީގެ ޓިކެޓުގައި ހުޅުމާލެ ދާއިރާ އަށް ވާދަކުރައްވާ އިބްރާހިމް ފައިސަލް ކެމްޕެއިން ޖަލްސާގެ ބައިވެރިންނާއި ފޯނު މެދުވެރިކޮށްވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވި ގޮތުގައި އެމަނިކުފާނު މިހާރު އުޅުއްވަނީ "ޕާޓީގެ ކެންޑިޑޭޓުންނަށް ހޭދަކުރާނެ ލާރިކޮޅެއް ނުލިބިގެން" ކަމަށެވެ.

އަމިއްލަފުޅު އެކައުންޓްތައް ފްރީޒްކުރި މައްސަލައަށް އިޝާރާތްކުރައްވައި ވާހަކަފުޅު ދައްކަވަމުން ރައީސް ޔާމީން ވިދާޅުވި ގޮތުގައި އެމަނިކުފާނުގެ އެކައުންޓްތައް ފްރީޒްކޮށްފައި ހުރީ ގަވައިދާ ހިލާފަށް ކަމަށެވެ.

ބެންކް އޮފް މޯލްޑިވްސް އަދި އިސްލާމިކް ބޭންކްގައި ރައީސް ޔާމީންގެ ނަންފުޅުގައި ހުޅުވާފައިވާ އެކައުންޓްތައް ފްރީޒް ކުރި އިރު އެ އެކައުންޓްތަކުގައި 100 މިލިއަނަށް ވުރެ ގިނަ ރުފިޔާ ހުރި ކަމަށް ފުލުހުން ވަނީ މީގެ ކުރިން ބުނެފައެވެ.

ރައީސް ޔާމީންގެ އެކައުންޓްތައް ފްރީޒް ކުރުމަށް އެންމެ ފުރަތަމަ ނެރުނު އަމުރު ހައިކޯޓުން ވަނީ ބާތިލްކޮށްފައެވެ. އެހެން ނަމަވެސް އެކައުންޓްތައް ފްރީޒް ކުރުމަށް ފަހުން ނެރުނު އަމުރެއް އޮތުމުން އެމަނިކުފާނުގެ އެކައުންޓްތައް އަދިވެސް ހުރީ ފްރީޒްކޮށްފައެވެ.

ރައީސް ޔާމީން އިތުރަށް ވިދާޅުވި ގޮތުގައި އެމަނިކުފާނުގެ އެކައުންޓްތައް ފްރީޒްކޮށްފައިވަނީ ޕީއެންސީގެ ވަގުތީ ލީޑަރު އަބްދުއްރަހީމް އަބްދުﷲ އާއި ވިލިމާލެ ދާއިރާގެ މެމްބަރު އަހުމަދު ނިހާން މެންފަދަ ބޭފުޅުންގެ ކެމްެޕެއިނަށް ޚަރަދުކުރައްވަފާނެތީ ކަމަށެވެ.