ޕީއެންސީ މަތީ މަޖިލިސް ފަށައިފި

ދިވެހިރާއްޖޭގެ ވެރިކަން ކުރާ ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) ގެ މަތީ މަޖިލިސް މިއަދު ފަށައިފިއެވެ.

ޕީއެންސީ މަތީ މަޖިލިސް ކުރިއަށް ގެންދަނީ މިއަދުން ފެށިގެން ހުކުރު ދުވަހުގެ ނިޔަލަށް މާލޭ ސޯޝަލް ސެންޓަރުގައެވެ.

މި ހަރަކާތުގައި ކައުންސިލްތަކުގެ ޕީއެންސީ ރައީސުންނާއި، އަންހެނުންގެ ކޮމިޓީތަކުގެ ރައީސާއިންނާއި މަންދޫބުންގެ އިތުރުން ރައީސް ޑރ. މުޙައްމަދު މުޢިއްޒު އާއި ޕީއެންސީގެ ޗެއަރޕާސަން ޢަބްދުއްރަޙީމް ޢަބްދުالله ވެސް ބައިވެރިވާނެއެވެ.

މީގެ އިތުރުން، ޕީއެންސީ މަތީ މަޖިލީހުގައި އެ ޕާޓީގެ މުހިންމު ބައެއް ނިންމުތަކެއް ނިންމާނެއެވެ. އެގޮތުން، އެ ޕާޓީގެ ނައިބު ރައީސުން ވެސް ހޮވާނެއެވެ.

ޕީއެންސީގެ ނައިބު ރައީސުންގެ މަގާމުތަކަށް މިހާރު ވެސް ޕީއެންސީގެ ނައިބު ރައީސުންގެ ގޮތުގައި ތިއްބެވި ފިޝަރީޒް މިނިސްޓަރު އަޙްމަދު ޝިޔާމާއި، އިކޮނޮމިކް މިނިސްޓަރު މުޙައްމަދު ސަޢީދާއި، އެލްޖީއޭގެ ސީއީއޯ މުޙައްމަދު ނިމާލާއި، ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފާއި، ބާރަށު ދާއިރާގެ މެންބަރު އިބްރާހީމް ޝުޖާޢު ވަނީ ކުރިމަތިލައްވާފައެވެ. އެ މަގާމަށް މާފަންނު މެދު ދާއިރާގެ މެންބަރު އަސްމާ ރަޝީދާއި ނިލަންދޫ ދާއިރާގެ މެންބަރު ފާޠިމަތު ސަޢުދާއާއި ޔޫތު މިނިސްޓަރު ޢަބްދުالله ރާފިޢު ވެސް ވަނީ ކުރިމަތިލައްވާފައެވެ

ޕީއެންސީގެ މެންބަރުންގެ އަަދަދު 67،000 އަށްވުރެ ގިނަ އަދަދަކަށް އަރާފާވާއިރު، އެ ޕާޓީގެ ޗެއަރޕާސަން ޢަބްދުއްރަޙީމް ޢަބްދުالله ވަނީ މިއީ ދިވެހިރާއްޖޭގައި ސިޔާސީ ޕާޓީއަކުން މިފަދަ ކޮންގްރެސް އެއް ބާއްވާ ފުރަތަމަ ފަހަރުކަން ފާހަގަކޮށްފައެވެ.