އެމްއެމްޕީއާރުސީ ކޮރަޕްޝަނާ ގުޅޭ އިތުރު މައްސަލަތަކެއް އެސީސީން ބަލަނީ

އެމްއެމްޕީއާރުސީގެ ހިޔާނާތާ ގުޅިގެން ނެރެފައިވާ ރިޕޯޓުން ފާހަގަ ކުރެވޭ ފަސް ކަމެއް މިހާރު ވެސް ބަލަމުން އަންނަ ކަމަށް އެންޓި ކޮރަޕްޝަން ކޮމިޝަނުން ބުނެފިއެވެ.

ޕީއެސްއެމްގެ ރާއްޖެ މިއަދު ޕްރޮގްރާމުގައި ވާހަކަދައްކަވަމުން އޭސީސީގެ ނައިބް މުއައްވިޒު ރަޝީދު ވިދާޅުވީ އެމްއެމްޕީއާރުސީގެ ކޮރަޕްޝަންގެ މައްސަލައިގައި އެންމެ ފުރިހަމަ ތަހުގީގެއް ކޮށްފައިވަނީ އެކޮމިޝަނުން ކަމަށެވެ. އަދި އެކަމުގައި ރިޕޯޓެއް އާންމުކޮށްފައި ވީނަމަވެސް އެ މައްސަލައިގެ އިތުރުކަންތައްވެސް ބަލަމުން އަންނަ ކަމަށާއި، ކުރިއަށް އޮތް ތާނގައި އެމައްސަލައިގެ އިތުރު ކަންތައްތަކެއް ހާމަވެގެންދާނެ ކަމަށް މުއައްވިޒު ވިދާޅުވިއެވެ.

އަދި މުއައްވިޒު ވިދާޅުވީ އެކޮމިޝަނުން އާންމުކުރި ރިޕޯޓާއި ގުޅިގެން ފަސްމައްސަލައެއް ބަލަމުން އަންނަކަމަށެވެ.

މުއައްވިޒު ވިދާޅުވީ އެކޮމިޝަނުން ހާމަކުރި ރިޕޯޓާއި ގުޅިގެން މިހާރު ބަލަމުން އަންނަ ބައެއް ކަންތައްތައް ތަކުގެ ތެރޭގައި އެމްއެމްޕީއާރްސީގެ ކޮރަޕްޝަން މައްސަލައާއި ގުޅގެން އެމްއެމްއޭ އާއި ބީއެމްއެލްގެ ދައުރާ ގުޅޭ މައްސަލައެއް ބަލަމުން އަންނަ ކަމަށެވެ. މީގެ އިތުރުން ދައުލަތުގެ ފައިސާ އެސްއޯއެފްގެ އެކައުންޓަށް ވަނުމަށް ފަހު، އެކި ފަރާތްތަކަށް އެ ފައިސާ ލޯނުގެ ގޮތުގައި ދިން މައްސަލައެއްވެސް އޭސީސީން ބަލަމުން އަންނަ ކަމަށެވެ. މިކަންތައްތަކުގެ އިތުރު ތަފްސީލެއް މުއައްވިޒު ހާމަކޮށްފައި ނުވެއެވެ.

އޭސީސީން އެމްއެމްޕީއާރްސީގެ މައްސަލައިގެ ތަހުގީގީ ރިޕޯޓް ފޮރުވީ ކަމަށް ނުބުނެވޭނެކަމަށާއި، 2017 ވަނަ އަހަރު އެމްއެމްޕީއަރްސީގެ ތަހުގީގު ނިންމުމަށްފަހު ކަމާއި ބެހޭ އިދާރާތަކުން ފިޔަވަޅު އެޅުމަށް އެދިފައިވާނެކަމަށެވެ. އަދި އޭރު އެރިޕޯޓް އާންމުކޮށްފައި ނުވަނީ ތަހުގީގަށް ހުރަސް އެޅިދާނެތީކަމަށް ވެސް އޭނާ ވިދާޅުވެފައިވެއެވެ.

އޭސީސީން ދާދިފަހުން އާންމުކޮށްފައިވާ ރިޕޯޓާއި ގުޅިގެން ގިނަ ބައެއްގެ ތައުރީފު އޭސީސީއަށް ލިބުނު ނަމަވެސް އެރިޕޯޓް ފުރިހަމަ ނުވާ ކަމަށްވެސް ގިނަ ބަޔަކު އަންނަނީ ބުނަމުންނެވެ.