ދިރޭތަކެތީގެ ނަސްލު ހިމާޔަތްކުރުމާ ގުޅޭ ގޮތުން އިނގިރޭސިވިލާތާއިއެކު މަޝްވަރާކޮށްފި

ދިރޭތަކެތީގެ ނަސްލު ހިމާޔަތްކުރުމާ ގުޅޭ ގޮތުން އިނގިރޭސިވިލާތާއިއެކު މަޝްވަރާކޮށްފިއެވެ.

މި މަޝްވަރާތައް ކުރިއަށް ގެންގޮސްފައިވަނީ ދިވެހިރާއްޖެއިން އދ. ގެ މަޖިލީހުގެ 79 ވަނަ ދައުރުގެ ޖަލްސާތަކުގައި ބައިވެރިވުމަށް ޔޫ.އެން.ޖީ.އޭ އަށް ކުރައްވާފައިވާ ދަތުރުފުޅުގައި، މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވަޒީރު ޠާރިޤް އިބްރާހިމް އިނގިރޭސިވިލާތުގެ މޫސުމަށް އަންނަ ބަދަލުތަކާބެހޭ ކަންތައްތަކާ ހަވާލުވެ ހުންނެވި މިނިސްޓަރ ކެރީ މެކާތީއާއި އެކު ބޭއްވި ބައްދަލުވުމުގެ ތެރެއިންނެވެ.

މި ބައްދަލުވުމުގައި، ދެ ޤައުމުގެ މެދުގައި މޫސުމަށް އަންނަ ބަދަލުތަކާއި، ހަކަތައިގެ ދާއިރާއާއި، ދިރޭތަކެތީގެ ނަސްލު ހިމާޔަތްކުރުމާ ގުޅޭ ގޮތުންނާއި، މި ދާއިރާތަކުން އިސްކަންދޭ ކަންތައްތަކާ ބެހޭ ގޮތުން މަޝްވަރާ ކުރެވިފައިވާއިރު، އިނގިރޭސިވިލާތުން ދިވެހިރާއްޖޭގައި ތަންފީޒުކުރަމުންދާ މަޝްރޫޢުތަކާ ބެހޭ ގޮތުން ވެސް ދެބޭފުޅުން ވަނީ ވާހަކަދައްކަވާފައެވެ.

މޫސުމީ ބަދަލުތަކާއި ތިމާވެއްޓާއި ހަކަތައާއި ބެހޭ ވުޒާރާއިން ބުނީ، މިއީ ދެ ޤައުމުގެ މެދުގައި އޮތް ގުޅުން އިތުރަށް ބަދަހިކޮށް، މޫސުމަށް އަންނަ ބަދަލުތަކާ ގުޅޭ ގޮތުން އެއްބާރުލުން އިތުރުކުރުމަށް މަގުފަހިވެގެންދާނެ ބައްދަލުވުމެއް ކަމަށާއި، ކުރިއަށް އޮތްތަނުގައި އިތުރު މަސައްކަތްތަކެއް ކުރެވިގެންދާނެ ކަމަށް އުންމީދު ކުރާ ކަމަށެވެ.