ވިނަރެސް އެކްސިޑެންޓް: އަނިޔާވި ޒުވާނާ އިތުރު ފަރުވާއަށް ރާއްޖެއިން ބޭރަށް ގެންދަން ނިންމައިފި

ހުޅުމާލޭ ވިނަރެސް ފްލެޓްކައިރީގައި މިދިޔަ ހަފުތާގައި ހިނގި ނުރައްކާތެރި އެކްސިޑެންޓެއްގައި އަނިޔާވި 27 އަހަރުގެ ޒުވާނާ އިތުރު ފަރުވާއަށް ރާއްޖެއިން ބޭރަށް ގެންދިއުމަށް ނިންމައިފިއެވެ.

ވިނަރެސް ފުލެޓް ކައިރީގައި ކާރެއް ކޮންޓްރޯލް ނުވެ ހިނގި މި އެކްސިޑެންޓުގައި އަނިޔާވި ޒުވާނާއަށް މިހާރު ފަރުވާ ދެމުން އަންނަނީ އައިޖީއެމްއެޗުގައެވެ. އެ ޒުވާނާގެ އާއިލާއިން މިރޭ ބައެއް މީޑިއާތަކަށް މައުލޫމާތު ދިންގޮތުގައި، އޭނާގެ ހާލަތު މިހާރު ސްޓޭބަލްވެފައިވީ ނަމަވެސް، މޫނުމަތީގެ ބައެއް ކަށިތަކަށް ލިބިފައިވާ ގެއްލުން ރަނގަޅު ކުރުމަށް ރާއްޖޭގައި އޮޕަރޭޝަން ނުކުރެވޭތީ، ޑޮކްޓަރުންގެ ހުއްދައާއެކު އިތުރު ފަރުވާއަށް ރާއްޖެއިން ބޭރަށް ފުރުމަށް ވަނީ ނިންމާފައެވެ.

އާއިލާއިން އިތުރަށް ބުނިގޮތުގައި، ޒުވާނާގެ ހާލަތު އިތުރަށް ބެލުމަށް ހެދި ސީޓީ ސްކޭނުން އެއްވެސް ނުރައްކަލެއް ފާހަގަކުރެވިފައެއް ނުވެއެވެ.

މި އެކްސިޑެންޓުގެ ވީޑިއޯތަކެއް ސޯޝަލް މީޑިއާގައި ދައުރުވެފައިވާއިރު، އެ ވީޑިއޯތަކުން ފެންނަނީ ސައިކަލު މަތީގައި އިން ޒުވާނާއާ ދިމާލަށް އެހެން މަގަކުން ނުކުމެގެން އަންނަ ކާރެއް ކޮންޓްރޯލުން ނެއްޓިގެން އަންނަ މަންޒަރެވެ.

ކާރު ސައިކަލުގައި ޖެހުމުން ޒުވާނާ ދިޔައީ ވިއްސައިގެންނެވެ. ކާރުގެ ސްޕީޑުގެ ބާރުކަން ހާމަވަނީ ގަހެއްގައި ޖެހި ގަސް ވެސް ބިންދައިގެން ދިއުމުންނެވެ.

މި ހާދިސާގައި ކާރަށް ވެސް ވަނީ ބޮޑެތި ގެއްލުންތަކެއް ލިބި، ބޭނުން ނުކުރެވޭ ވަރަށް ހަލާކުވެފައެވެ.

މި އެކްސިޑެންޓާ ގުޅިގެން އިތުރު ތަހުގީގުތައް ކުރިއަށްދާކަން ފުލުހުން ވަނީ ހާމަކުރައްވާފައެވެ.