ކުރީ ސަރުކާރުގައި، ރާއްޖޭގެ މިސްރާބު ހުރީ އަނދަވަޅަކަށް: ރައީސް މުޢިއްޒު

ދިމިދިޔަ އެމްޑީޕީ ސަރުކާރުގައި ރާއްޖޭގެ މިސްރާބު ހުރީ އަނދަވަޅަކާއި ދިމާއަށް ކަމަށާ، އެ ސަރުކާރު ނިމިގެންދިޔައިރު ރާއްޖެ އޮތީ އަނދަވަޅަކަށް ވައްޓާލާފައި ކަމަށް ރައީސުލްޖުމްހޫރިއްޔާ ޑރ މުހައްމަދު މުޢިއްޒު ވިދާޅުވެއްޖެއެވެ.

އެމަނިކުފާނު މިފަދައިން ވިދާޅުވެފައިވަނީ ޕީއެންސީގެ ޓިކެޓްގައި ތިނަދޫ ދާއިރާ އަށް ވާދަކުރައްވާ ކެންޑިޑޭޓްގެ ކެންޕެއިން ޖަލްސާގައި ވާހަކަ ދައްކަވަމުންނެވެ.

އެގޮތުން ރައީސް މުޢިއްޒު ވިދާޅުވީ މި ސަރުކާރު އައި ފަހުން ވީ ހަތަރު މަސް ދުވަހުގެ ތެރޭގައި، ދައުލަތަށް ހޯދި އާމްދަނީއިން ބިލިއަނަކަށްވުރެ ގިނަ ރުފިޔާގެ މަޝްރޫޢު ރާއްޖޭގެ އެކި ކަންކޮޅު ތަކުގައު ހިންގަވަމުންދާ ކަމަށެވެ. އަދި އޭގެ އިތުރުން މަސްވެރިންނަށް 700 މިލިއަނަށްވުރެ ގިނަ ފައިސާ މިހާތަނަށް ދެވިފައިވާއިރު، ސޮވެރެން ޑިވެލޮޕްމަންޓް ފަންޑަށް ވެސް 30 މިލިއަން ޑޮލަރަށްވުރެ ގިނަ ފައިސާ މިހާރު ޖަމާކުރެވިފައިވާ ކަމަށް އެމަނިކުފާނު ވިދާޅުވިއެވެ. އެކަން ކުރެއްވީ ފައިސާ ޗާޕް ނުކޮށް ކަންވެސް ރައީސް ފާހަގަ ކުރެއްވި އެވެ.

ފައިސާ ޗާޕް ކުރީ އެހެން މިސްރާބަކުން ގައުމު ގެންދަން. މިސްރާބު ހުރީ އޭރުގައި އަނދަވަޅަކަށް. އަނދަވަޅަކާއި ދިމާލަށްގޮސް އަނދަވަޅުތެރޭގައި ރާއްޖެ އޮތީ. ދަރަނި ދަންތުރައެއްގަ އެއްކޮށް ޖެހިފައި. ފައިސާ ޗާޕް ކުރީ ވަކި ވަރަކަށް ނޫން. 8 ބިލިއަން ރުފިޔާގެ ފައިސާ ޗާޕްކުރީ ފަސް އަހަރު ތެރޭގައި. 40 އަހަރާއި ނުބައްދަލު އަދަދަކަށް ފައިސާ ޗާޕް ކޮށްލީ. އެ މިސްރާބުގައި އޮއްވާ އެ މިސްރާބު ކަމުނުގޮސްގެން ދިވެހީންގެ ރާއްޖެއަށް ރާއްޖެ ގެންދަން ވެގެން ކުރި ދަތުރުގައި މިހާރު އަޅުގަނޑުމެން މިތިބީ.

ރައީސުލްޖުމްހޫރިއްޔާ ޑރ މުހައްމަދު މުޢިއްޒު

ރައީސް މުޢިއްޒު ވިދާޅުވީ ދިވެހީންގެ ރާއްޖޭގައި ދިވެހިން އެދޭ ގޮތަށް ކަންކަން ކޮށްދިނުމުގައި މަޖިލީހުގެ ދައުރު ފުރިހަމަ ކޮށްދިނުން އޮތީ ރައްޔޮތުންގެ އަތްމަތީގައި ކަމަށެވެ.

އަދި ސަރުކާރުން ކޮންމެ ކަމެއް ކުރަން ބޭނުންވާ ނަމަވެސް، އެކަމެއް ކުރުމުގައި ރައްޔިތުންގެ މަޖިލީހަށް ހުރިހާ ގޮތަކުންވެސް ހުރަސް ތައް ކުރިމަތި ކުރެވޭނެ ކަން ފާހަގަކުރައްވައި ރައީސް މުޢިއްޒު ވަނީ މަޖިލީހުގެ މެޖޯރިޓީ ސަރުކާރަށް ނުހަނު މުހިންމު ކަމަށް ތަކުރާރުކޮށް ވިދާޅުވެފައެވެ.