ޕޭޕަލްގެ ޚިދުމަތް ތަޢާރަފުކުރަން މަސައްކަތް ކުރުމުން މިއީ ނުވާނެ ކަމެއް ކަމަށް ބައެއް ފަރާތްތަކުން ބުނި: ސަޢީދު

ދިވެހިރާއްޖޭގައި ޕޭޕަލް ގެ ޚިދުމަތް ތަޢާރަފްކުރަން މަސައްކަތް ކުރުމުން އެއީ ނުވާނެ ކަމެއް ކަމުގައި ބުނެ ބައެއް ފަރާތްތަކުން ވާހަކަދެއްކި ކަމަށާ، ނަމަވެސް އެކަން ހާސިލް ކުރެވުނީ ރައީސް ޑރ މުޙައްމަދު މުޢިއްޒުގެ ހިކުމަތްތެރިކަމުގެ ސަބަބުން ކަމަށް އިޤްތިޞާދީ ވަޒީރު މުޙައްމަދު ސަޢީދު ވިދާޅުވެއްޖެއެވެ.

ބައިނަލްއަގުވާމީ ފައިސާގެ މުއާމަލާތްތައް ކުރުމުގައި ބޮޑެތި ލުއި ފަސޭހަތަކެއް ލިބިދޭ ޕޭޕަލްގެ ޚިދުމަތް މިއަދު ވަނީ ރާއްޖޭގައި އިފްތިތާޙް ކޮށްފައެވެ.

އެކަމަށްޓަކައި ބޭއްވުނު ރަސްމިއްޔާތުގައި ވާހަކަދައްކަވަމުން ސަޢީދު ވިދާޅުވީ، ޕޭޕަލް ފަދަ ޚިދުމަތެއް ރާއްޖެއަށް ތަޢާރަފް ވުމަކީ ރާއްޖޭގެ ކުދިއަދި މެދުފަންތީގެ ވިޔަފާރި ހިންގާ ފަރާތްތަކާއި، ފްރީލާންސްކޮށް މަސައްކަތްކޮށްދޭ ފަރާތްތަކާއި، އުފެއްދުންތެރިން ޒަމާނުއްސުރެ ދެކެމުންއައި ހުވަފެނެއް ކަމަށެވެ.

ނަމަވެސް އެއީ ނުވާނެ ކަމެއް ކަމަށާ އެކަމުގައި ގިނަ ގޮންޖެހުންތަކެއް ހުރިކަމަށް ބުނެ ބައެއް ފަރާތްތަކުން ވާހަކަދެއްކި ކަމަށް ވިދާޅުވިއެވެ.

”މިއީ ނުވާނެ ކަމެއް ކަމަށް ބުނި. މިކަމުގެ ހުރި ހުރަސްތައް މާ ބޮޑު ކަމަށްބުނި. މި ގައުމުގެ އާބާދީ މާ ކުޑަ ކަމަށް ބުނި. މިތަނުގެ މާކެޓް ވަރަށް ހަނި ކަމަށް ބުނި. އެ ހުވަފެންތައް ޖެހޭނީ މަޑުޖައްސާލަން ކަމަށް ބުނި.“

ވަޒީރު ސަޢީދު

ނަމަވެސް ރާއްޖެއަށް ޕޭޕަލް ތަޢާރަފް ކުރުމަކީ ހަގީގަތަކަށް ހެދޭނެ ކަމެއް ކަމަށް ދެކެވަޑައިގެން، އެކަމަށް ރިޔާސީ އިންތިޚާބުގައި، ރަޢީސް މުޢިއްޒު ވައުދުވެވަޑައިގެންނެވި ކަމަށާަ، އެކަމަށް މަގުފަހިކޮށްދެއްވުމަށް އެމަނިކުފާނު މަސައްކަތްކުރެއްވި ކަމަށް ވިދާޅުވިއެވެ.

އަދި ޕޭޕަލްގެ ޚިދުމަތް ސީމްލަސްލީ ރާއްޖޭގައި އިންޓަގްރޭޓްކުރެވިގެން ދިއުމަކީ ދުނިޔޭގެ ޑިޖިޓަލް އިޤްތިޞާދުގައި ދިވެހިންގެ ބައިވެރިވުން ފުޅާކުރުމަށް އޮތް ބޮޑު ހުރަހެއް ނައްތާލުމަށް ކުރެވުނު ގިނަގުނަ މަސައްކަތްތަކުގެ ނަތީޖާ ކަމުގައި ސަޢީދު ފާހަގަކުރެއްވިއެވެ.

ސަޢީދު ވިދާޅުވީ، ރަނގަޅު ތަޞައްވުރެއްގެ މައްޗަށް ބިނާކޮށް ހަރުދަނާ ލީޑަރޝިޕަކުން މަސައްކަތްކުރުމުން ނަތީޖާ ޙާޞިލްކުރެވޭނެކަމަށާއި، ދިވެހިރާއްޖޭގެ މާކެޓް ސައިޒް ކުޑަވެގެން ނުވަތަ ޤުދުރަތީ ގޮތުން ރާއްޖެ އުފެދިފައި އޮތްގޮތުގެ މައްޗަށް ބުރަވެ، ރާއްޖެ ފަހަތަށްޖެހޭނެ ސަބަބެއް ނެތްކަން މިނަތީޖާއިން ދޭހަވާކަމަށެވެ.