އޮޅުވާލައިގެން ހުޅުމާލެއިން ގޯތި ހޯދަން އުޅުނު މައްސަލާގައި 12 މީހަކަށް ދައުވާ އުފުލައިފި

ބިންވެރިޔާ ސްކީމުން ގޯތި ލިބިފައިނުވާ މީހުން، ގޯތި ލިބިފައިވާކަމަށް ދައްކައި ޞައްޙަނޫން ލިޔެކިޔުން ހަދައިގެން ހައުސިންގ ޑިވަލޮޕްމަންޓް ކޯޕަރޭޝަނަށް ހުށަހަޅާފައިވާކަމަށް ތުހުމަތުކުރެވޭ މައްސަލާގައި ބައެއްގެ މައްޗަށް ދައުވާކުރަން ފޮނުވައިފި އެވެ.

ޕީޖީ އޮފީހުން މިއަދު ބުނީ ބިންވެރިޔާ ސްކީމުން ގޯތި ލިބިފައިނުވާ މީހުން، ގޯތި ލިބިފައިވާކަމަށް ދައްކައި ޞައްޙަނޫން ލިޔެކިޔުން ހަދައިގެން ހައުސިން ޑިވަލޮޕްމަންޓް ކޯޕަރޭޝަނަށް ހުށަހަޅާފައިވާކަމަށް ތުހުމަތުކުރެވޭ މައްސަލާގައި ޞައްޙަނޫން ލިޔުމެއް އުފެއްދުމުގެ ކުށުގެ ދަޢުވާ ދެ މީހެއްގެ މައްޗަށް އުފުލާފައިވާ ކަމަށެވެ. އެއީ ގ. ޕޫލްބަހާރުއާގެ، އަޙްމަދު ޢަތީޤް ޢަބްދުالله އާއި ނ. ވެލިދޫ، ޑޭޒީމާގެ އަޙްމަދު މާޒިން އެވެ.

މި ދެ މީހުންގެ މައްޗަށް ދައުވާ އުފުލާފައިވަނީ ބިންވެރިޔާ ސްކީމްގެ ދަށުން ހުޅުމާލެ އަދި ގުޅީ ފަޅުން ބިން ދޫކުރުމަށް ފޯމު ހުށަހެޅުމަށް އާންމުކޮށް ހުޅުވާލި ދުވަސްވަރު، އާންމުން ހުށަހެޅި ފޯމުތަކުގެ މަސައްކަތްކުރުމުގައި އުޅެމުން، ބިންވެރިޔާ ސްކީމްގެ ދަށުން ދޫކޮށްފައިވާ ބިމުގެ ހައްޤުވެރިކަން އެނގޭނޭ ސައްހަނޫން ރަޖިސްޓްރީ އަދި އެއްބަސްވުން އުފައްދާފައިވާތީ އެވެ.

މީގެ އިތުރުން ޞައްޙަނޫން ލިޔުމެއް އުފެއްދުމުގައި ބައިވެރިވުމުގެ ކުށުގެ ދަޢުވާ މ. ފަޅުމަތީގެ، އަރުޝަދު ޢަލީގެ މައްޗަށް ވަނީ އުފުލާފަ އެވެ.

އަދި އެނގިހުރެ ޞައްޙަނޫން ލިޔުމެއް ދިނުމުގެ ކުށުގެ ދަޢުވާ ހަތް މީހެއްގެ މައްޗަށް ވަނީ އުފުލާފަ އެވެ. އެ މީހުންނަކީ ސ. ހިތަދޫ، ހަޒާރުމާގެ، މަރްޔަމް ސާޢީ އާއި މ. ޒޭވަރު، މުޙައްމަދު ފަޟީލް ރަޝީދު އާއި ޏ. ފުވައްމުލައް، ދޫޑިގަން، ދިލް، އީމާ ވަހީދު އާއި ދަފްތަރު. ނަންބަރު ރސ 9044، ޢާއިޝަތު މަޢުރޫފާ އާއި ހުޅުމާލެ. ފްލެޓް ނަންބަރު 02-ޖީ- 46، މުޙައްމަދު އާދަމް އާއި ހއ. ދިއްދޫ، ޖަމީލާ، ޢަބްދުލްމަޖީދު މާހިރު އާއި މ. ވެސްޓްކޯސްޓް، ޙުސައިން ޒާހިރު ޒައިނު އާއި މ. ފަޅުމަތީގެ، އަޝްހަދު ޢަލީ އަދި  މ. ފަޅުމަތީގެ، އަޙްމަދު ޢަލީ އެވެ.

މުޙައްމަދު ފަޟީލް ރަޝީދަކީ އެމްޑަބްލިޔުއެސްސީގެ ކުރީގެ ޑެޕިޔުޓީ މެނޭޖިން ޑިރެކްޓަރެވެ. އޭނާ އަކީ އެޗްޑީސީގެ ކުރީގެ މެނޭޖިން ޑިރެކްޓަރ ފަޒުލް ރަޝީދުގެ އެއްބަނޑު އެއްބަފާ ކޮއްކޮ އެވެ.

ޕީޖީ އޮފީހުން އިތުރަށް ބުނީ ބިންވެރިޔާ ސްކީމާ ގުޅޭ މައްސަލާގައި ކޮރަޕްޝަންގެ ޢަމަލުތަކެއް ހިމެނޭތީ، އެ ބައިތައް ވަކި މައްސަލައެއް ގޮތުގައި އެންޓި-ކޮރަޕްޝަން ކޮމިޝަނުން ގެންދަނީ ތަޙުޤީޤު ކުރަމުން ކަމަށެވެ. އަދި އެ މައްސަލައިގެ ތަޙުޤީޤު ނިމުމުން ދަޢުވާކުރުމާމެދު އެ އޮފީހުން ގޮތެއް ނިންމާނެ ކަމަށެވެ.