ސަލަފުން ފައިސާ އެނބުރޭ ގޮތް ބެލުމަށްވުރެ ލާދީނީ ޖަމާއަތްތަކަށް ބޭރުން ފައިސާދޭ ގޮތް ބެލުން މާ މުހިންމު: ސަލަފް

ޖަމުއިއްޔަތުއް ސަލަފުން ފައިސާ ބޭނުންކުރާގޮތް ބެލުމަށް ވުރެ ރާއްޖޭގައި ހިންގާ ލާދީނީ ޖަމާއަތްތަކަށް ބޭރުގެ ފަރާތްތަކުން ފައިސާ ދޭގޮތް ބެލުން މާ މުހިންމު ކަމަށް ސަލަފު ޖަމުއިއްޔާއިން ބުނެފިއެވެ.

ސަލަފުން މިހެން ބުނެފައިވަނީ ޑރ. އަފްރާޝިމު އަލީ އަވަހާރަކޮށްލި މައްސަލަ، މަރު ކޮމިޝަނުން އަލުން ތަހުގީގު ކުރުމަށްފަހު ނެރުނު ރިޕޯޓާއި ގުޅިގެން މަޖިލީހުގެ 241 ކޮމެޓީން ސަލަފަށް ފިޔަވަޅު އަޅަން ނިންމުމާއި ގުޅިގެން އެޖަމުއިއްޔާއިން މިއަދު ހަވީރު ބޭއްވި ނޫސްވެރިންގެ ބައްދަލުވުމުގައެވެ.

އެބައްދަލުވުމުގައި ވާހަކަ ދައްކަވަމުން އައްޝައިޚު އަބްދުއްސަލާމު ވިދާޅުވީ ސަލަފުގެ މައްޗަށް ފިޔަވަޅު އަޅަން ނިންމީ އެއްވެސް ހެއްކެތްގެ މައްޗަށް ބިނާކޮށްފައި ނޫން ކަމަށެވެ. އޭނާ ވިދާޅުވީ މަރުކޮމިޝަނުގެ ރިޕޯޓުގައި ފާހަގަކޮށްފައިވަނީ ޑރ. އަފްރާޝީމާއި ސަލަފާ ދެމެދު ދީނީ ހިޔާފު ތަފާތުވުމެއް ހުރުމުން އެކަން އޮންނަ ގޮތް ރައްޔިތުންނަށް އޮޅުން ފިލުވައި ދިނުމަށް ނެރުނު ބަޔާނެއްގެ ވާހަކަ ކަމަށެވެ.

''ސަލަފުން ފައިސާ އެނބުރޭ ގޮތް ބެލުމަށްވުރެ ރާއްޖޭގައި ހަރަކާތްތެރިވާ ލާދީނީ ޖަމާއަތްތަކަށް ބޭރުގެ ފަރާތްތަކުން ފައިސާދޭ ގޮތް ބެލުން މާ ރަގަޅުވާނެ. މިއީ އިސްލާމްދީން ފުހެލަން ފުރަތަމަ ގުރުބާންކުރާ ދީނީ ޖަމުއިއްޔާ.'' އަބްދުއްސަލާމު ވިދާޅުވިއެވެ.

އޭނާ ވިދާޅުވީ މިހާރު ކަންތައް ތަރުތީބު ވަމުންދާ ގޮތަަށް ބަލާއިރު، ރައްޔިތުން ނޯށުން ރޯލަން ޖެހޭ ވަގުތާއި ކުރިމަތިލާން ޖެހިއްޖެ ކަމަށެވެ.

އަބްދުއްސަލާމު ވިދާޅުވީ ސަލަފު ޖަމުއިއްޔާއަށް ފިޔަވަޅު އަޅަނީ އެމްޑީއެން އިން ނެރުނު ލާދީނީ ރިޕޯޓަށް އިންކާރު ކުރިކުރުން ފޮރުވަން ކަމަށެވެ.